“ស្បែកជើងស៊ីជើង” ជាសំនួរមួយ សំដៅលើបញ្ហាឈឺ ពង ឬរបួសជើងត្រង់ចំណុចណាមួយ បណ្ដាលមកពីការកកិតជើង ជាមួយស្បែកជើង ហើយប្រហែលជាមានគ្នាយើងមួយចំនួន ធ្លាប់ជួបបញ្ហានេះមិនតិចដងទេ។ នេះដោយសារស្បែកជើងរបស់យើង តឹង ឬចង្អៀតពេក។
១. វិធីការពារស្បែកជើងស៊ីជើង
វិធីល្អបំផុត យើងត្រូវជ្រើសរើសស្បែកជើងណា ដែលសក្ដិសមជាមួយជើងរបស់យើង កុំឲ្យវាតឹង ឬចង្អៀតពេក ដែលបណ្ដាលឲ្យយើងឈឺជើង ពេលពាក់វា។ ប៉ុន្ដែប្រសិនបើយើង ស្រលាញ់ស្បែកជើង ១គូ ដែលតឹង ឬចង្អៀត មានដំណោះស្រាយខ្លះ អាចជួយកាត់បន្ថយការកកិតបាន ដូចជា ពាក់ស្រោមជើង ប្រដាប់ការពារម្រាមជើង ប្រដាប់ទ្រាប់កែងជើង ឬប្រើស្កុតក្រដាសដែលទន់ បិទលើជើងក៏បាន។
ជាមួយគ្នានេះ មានវិធីមួយចំនួនទៀត ដែលយើងអាចធ្វើឲ្យស្បែកជើង ងាយស្រួលពាក់ និងមិនបណ្ដាលឲ្យជើងរបស់យើងឈឺ។ វិធីទាំងនោះ មានដូចជា៖
- យើងអាចប្រើប្រដាប់ពង្រីកស្បែកជើងជាឈើ ឬប្លាស្ទិក រយៈពេល ២-៣យប់ ដើម្បីធ្វើឲ្យស្បែកជើង ធំជាងមុនបន្ដិច
- យើងអាចប្រើប្រេងលាបលើស្បែកជើង ត្រង់ទីតាំងដែលបណ្ដាលឲ្យជើងរបស់យើងឈឺ ដើម្បីឲ្យស្បែកជើងទន់ជាងមុន
- យើងអាចពាក់ស្រោមជើងក្រាស់ក្នុងស្បែកជើង ហើយយកប្រដាប់សម្ងួតសក់ បាញ់ត្រង់កន្លែងតឹង ឬចង្អៀត រយៈពេល ៣០វិនាទី។ បន្ទាប់មក ដើរសាកមើល រហូតស្បែកជើងមានលក្ខណៈសមស្របជាមួយជើងរបស់យើង ទើបយើងដោះស្រោមជើងក្រាស់ចេញវិញ។
២. វិធីព្យាបាល
ស្បែកជើងស៊ីជើង ជាធម្មតា វាបាត់ទៅវិញដោយខ្លួនឯងទេ ប៉ុន្ដែយើងមានវិធីមួយចំនួន ជួយសម្រួល និងព្យាបាលការឈឺចាប់ ឲ្យឆាប់ជាសះស្បើយបាន។ វិធីទាំងនោះ មានដូចជា៖
- បន្ដក់ទឹកឃ្មុំលើជើង ត្រង់កន្លែងឈឺ
- លាបជែល Aleo Vera Gel ត្រង់កន្លែងឈឺ
- ប្រើជែលប្រេង Petroleum ជូតត្រង់កន្លែងឈឺ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
