គ្រោះថ្នាក់សរសៃឈាមខួរក្បាល ជាបញ្ហាសុខភាពធ្ងន់ធ្ងរមួយ ដែលអាចធ្វើឲ្យអ្នកជំងឺធ្លាក់ខ្លួនពិការ ឬបាត់បង់អាយុជីវិត។ ចំណែកឯដំណាក់កាលព្យាបាលឲ្យជាសះស្បើយ ក៏មិនមែនជារឿងងាយស្រួលដូចគ្នា គឺអាស្រ័យលើកត្តាសុខភាព ជំងឺប្រចាំកាយ និងភាពធ្ងន់ធ្ងរនៃជំងឺតែម្ដង។
យ៉ាងណាមិញ អ្នកជំងឺក៏អាចអនុវត្តគន្លឹះងាយៗមួយចំនួន ដើម្បីជួយឲ្យឆាប់ជាសះស្បើយ ទោះបីជាមិនបាន១០០% ក៏អាចជួយពង្រឹងកម្លាំង ចលនា និងសុខភាពរបស់អ្នកជំងឺបានមួយកម្រិតដែរ។
គន្លឹះជួយឲ្យជាសះស្បើយក្រោយគ្រោះថ្នាក់សរសៃឈាមខួរក្បាល
១. ញ៉ាំអាហារសុខភាព
អាហារដែលយើងញ៉ាំប្រចាំថ្ងៃ មានឥទ្ធិពលផ្ទាល់ទៅនឹងសុខភាពរាងកាយទាំងមូល។ ដូច្នេះហើយ យើងចាំបាច់ផ្លាស់ប្ដូររបបអាហារ ក្រោយជួបបញ្ហាគ្រោះថ្នាក់សរសៃឈាមខួរក្បាល ដូចជាកាត់បន្ថយអាហារមានជាតិខ្លាញ់ អាហារកែច្នៃ និងគ្រឿងផ្អែម ព្រមទាំងជំនួសមកនូវបន្លែ និងផ្លែឈើស្រស់ៗ។ ទម្លាប់ញ៉ាំអាហារបែបនេះ មិនត្រឹមតែជួយឲ្យឆាប់ជាសះស្បើយនោះទេ ថែមទាំងអាចកាត់បន្ថយហានិភ័យនៃគ្រោះថ្នាក់សរសៃឈាមខួរក្បាលម្ដងទៀតផងដែរ។
២. ធ្វើលំហាត់កាយសម្បទា
យោងតាមការសិក្សាបានបង្ហាញថា រយៈពេលពីរបីខែដំបូងក្រោយគ្រោះថ្នាក់សរសៃឈាមខួរក្បាល មានសារសំខាន់ណាស់ក្នុងដំណើរការជាសះស្បើយ។ ហេតុនេះហើយ អ្នកជំងឺត្រូវធ្វើលំហាត់ប្រាណកាយសម្បទាអំឡុងពេលនេះ។ ជាទូទៅ លំហាត់ប្រាណកាយសម្បទាផ្ដោតទៅលើជំនាញសរសៃប្រសាទ ចលនា និងលំដាប់នៃចលនា។
៣. លំហាត់ប្រាណ
ទន្ទឹមនឹងនេះដែរ លំហាត់ប្រាណអាចជួយបង្កើនកម្លាំង ចលនា និងជួយសម្រួលលំហូរឈាមពេញរាងកាយ។ លើសពីនេះ ការធ្វើលំហាត់ប្រាណជារៀងរាល់ថ្ងៃ ក៏អាចជួយកាត់បន្ថយហានិភ័យនៃគ្រោះថ្នាក់សរសៃឈាមខួរក្បាលនាពេលអនាគតព្រមទាំងជួយដល់ស្ថានភាពជំងឺប្រចាំកាយ។
៤. ប្រើប្រាស់ថ្នាំ
ក្រោយគ្រោះថ្នាក់សរសៃឈាមខួរក្បាល អ្នកជំងឺត្រូវគ្រូពេទ្យណែនាំឲ្យប្រើថ្នាំជាច្រើនប្រភេទ ដើម្បីជួយឲ្យឆាប់ជាសះស្បើយ ព្រមទាំងកាត់បន្ថយហានិភ័យនៃគ្រោះថ្នាក់សរសៃឈាមខួរក្បាលនៅពេលអនាគត។ ដូចនេះហើយ ការញ៉ាំថ្នាំឲ្យបានទៀងទាត់មានសារសំខាន់ណាស់។
![គ្រោះថ្នាក់សរសៃឈាមខួរក្បាល](https://cdn.hellokrupet.com/wp-content/uploads/2022/08/គ្រោះថ្នាក់សរសៃឈាមខួរក្បាល៦.jpg)
៥. គ្រប់គ្រងជំងឺប្រចាំកាយឲ្យបានល្អ
ប្រសិនបើយើងមានជំងឺប្រចាំកាយស្រាប់ ដូចជាជំងឺទឹកនោមផ្អែម លើសសម្ពាធឈាម ឬកូលេស្តេរ៉ូលខ្ពស់ ការគ្រប់គ្រងជំងឺទាំងនេះឲ្យបានល្អ គឺជារឿងសំខាន់បំផុតមួយ ពីព្រោះជំងឺទាំងនេះបង្កើនហានិភ័យដល់បញ្ហាគ្រោះថ្នាក់សរសៃឈាមខួរក្បាល។
អត្ថបទគួរអាន៖
ចំណុចសំខាន់
ការជាសះស្បើយក្រោយគ្រោះថ្នាក់សរសៃឈាមខួរក្បាលឲ្យបានឆាប់រហ័ស គឺមិនមែនជារឿងងាយស្រួលឡើយ ពីព្រោះវាទាមទារការព្យាយាម កំណត់អត់ធ្មត់ឲ្យបានច្រើន ហើយអ្វីដែលសំខាន់បំផុត គឺយើងចាំបាច់ត្រូវផ្ដោតទៅលើការគិតវិជ្ជមាន និងត្រូវប្រកាន់ខ្ជាប់នឹងការផ្លាស់ប្ដូរល្អៗទាំងនោះ។