ខែទី ១៣៖ អាអូនចាប់ផ្ដើមប្រែប្រួលរឿងញ៉ាំ និងគេង

ការលូតលាស់ និងអាកប្បកិរិយា

១- កូនចេះអីខ្លះ?

ខែទី១៣ កូនចាប់ផ្ដើមប្តូរទម្លាប់ញ៉ាំដោយរើសចំណីជាងមុន។ វាអាចជាចម្លែក ប៉ុន្តែវាជារឿងធម្មតា ព្រោះជាពេលដែលអូនតូចចាប់ផ្តើមស្គាល់ចំណីប្លែក ឬចូលចិត្តរបស់គេមិនចូលចិត្តពីមុន។ ទាំងនេះមានន័យថាអាអូនកំពុងលូតលាស់ជីវ្ហាវិញ្ញាណ។ តែត្រូវប្រយ័ត្នចំពោះអាហារថ្មីៗ ឬហឹរ ព្រោះអាចធ្វើឲ្យកូនស្រកគីឡូ ឬមានរោគសញ្ញាផ្សេងៗដូចជា ក្តៅខ្លួន ឬរាក ដូច្នេះយើងត្រូវជួបជាមួយគ្រូពេទ្យភ្លាម។

ខែទី ១៣៖ អាអូនចាប់ផ្ដើមប្រែប្រួលរឿងញ៉ាំ និងគេង

មិនត្រឹមតែការញ៉ាំទេ ការគេងក៏ដូចគ្នា។ អាអូនអាចប្រែប្រួលការគេងខ្លះ គេអាចគេងច្រើនជាងមុនហើយភ្ញាក់នៅពាក់កណ្ដាលយប់។ ចន្លោះ ១២-១៤ខែ ក្មេងចាប់ផ្តើមយល់សប្តិ ហើយពេលខ្លះអាចភ្ញាក់ឡើងស្រែកនៅពេលយប់។

២- គួរត្រៀមអីខ្លះ?

ពិបាកដែរ ពេលអាអូនអត់សូវញ៉ាំ ហើយរើសចំណី។ ឲ្យកូនញ៉ាំតាមសម្រួល កុំបង្ខំឲ្យកូនញ៉ាំ ទោះគេខូចបន្តិចក្ដី។ ចៀសវាងឲ្យកូនញ៉ាំអាហារសម្រន់ពពួកជាតិស្ករ និងអាហារដែលមិនល្អចំពោះសុខភាព។ គួរចាប់ផ្ដើមកំណត់អាហារញ៉ាំប្រចាំថ្ងៃ ហើយឲ្យកូនញ៉ាំអាហារដែលផ្តល់ប្រយោជន៍ដល់សុខភាពឲ្យបានច្រើន។ ទោះរើសអាហារបន្តិចក្ដី តែកុំបារម្ភបើកូនមិនញ៉ាំ គេនឹងទារពេលឃ្លាន។

កំណត់ម៉ោងសម្រាប់កូនគេង និងបង្កើតជាទម្លាប់។ ទម្លាប់ទាំងនោះមានដូចជាងូតទឹក ញ៉ាំទឹកដោះគោ ដុសធ្មេញ និងនិទានរឿងមុនគេង។ ទោះអាអូនមិនទម្លាប់ពេលដំបូងប៉ុន្តែយូរៗទៅនឹងទម្លាប់ហើយ។

សុខភាព និងសុវត្ថិភាព

៣- ពិភាក្សារឿងអីខ្លះជាមួយពេទ្យ?

ប្រហែលជាបានពិនិត្យសុខភាពកាលពីខែមុនហើយ តែបើមិនទាន់បានទេគួរតែទៅពេលនេះ កុំបង្អង់។ គួរប្រាប់គ្រូពេទ្យពីការប្រែប្រួលរបស់កូនដូចជាចំណីអាហារ ទម្លាប់គេង ឬអាកប្បកិរិយា ដើម្បីពេទ្យអាចកំណត់បាន។

៤- ត្រូវដឹងពីអីខ្លះ?

អាហារមួយចំនួនអាចធ្វើឲ្យកូនអាលែកហ្ស៊ី។ ហេតុនេះហើយបានជាគ្រូពេទ្យឲ្យយើងចាំដល់អាអូនបាន ១ខួប ទើបញ៉ាំអាហារទាំងនេះ។ ខាងក្រោមនេះជាជំហានដែលយើងអាចធ្វើបាន៖

– ដឹងពីចំណីអាហារដែលធ្វើឲ្យអាលែកហ្ស៊ី។ ចំណីអាហារទាំងនោះរួមមាន ស៊ុត គ្រាប់ធញ្ញជាតិ Strawberry ទឹកឃ្មុំ ទឹកដោះគោ និងផ្លែប៉េងប៉ោះ។

-ឲ្យអាអូនញ៉ាំអាហារមួយមុខម្តងដើម្បីឲ្យយើងអាចដឹងពីប្រតិកម្ម។ យើងអាចចាប់ផ្តើមមុខអាហារថ្មីនៅថ្ងៃទី៤ឬ ទី៥។

-សរសេរកំណត់ត្រាប្រចាំថ្ងៃ ដើម្បីងាយស្រួលតាមដានការប្រតិកម្មកូនជាមួយអាហារ។ យើងអាចយកកំណត់ត្រាទៅឲ្យគ្រូពេទ្យពិនិត្យបាន ព្រោះពេលខ្លះវាអាចជាមិនមែនប្រតិកម្ម ក្រែងមានបញ្ហាផ្សេង។

ការព្រួយបារម្ភ

៥- រឿងអីខ្លះត្រូវបារម្ភ?

អាអូនអាចធ្លាក់ ឬដួលប៉ះទង្គិច តែទោះយ៉ាងនេះក្ដី កុំការពារ ឬថ្នមកូនពេក បណ្ដោយខ្លះទៅ ដើម្បីឲ្យគេរៀនចេះប្រុងប្រយ័ត្នខ្លួនឯង។ កូនចង់លេងអី បណ្ដោយទៅ ឲ្យលេងសេរី អាចជាវិធីជួយការលូតលាស់កូនដែរ។ ការលេង ហើយដួលនឹងបង្រៀនគេពីរាងកាយ និងបរិស្ថានជុំវិញ ហើយវាធ្វើឲ្យពួកគេឲ្យចេះក្រោកពេលដួលដោយមិនត្រូវការម៉ាក់លួងលោមពេលគេឈឺទៀតទេ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Duk Panharat · កែ 11/03/2019

ខែទី ១៣៖ អាអូន​ចាប់​ផ្ដើម​ប្រែប្រួលរឿង​ញ៉ាំ និង​​គេង

ការលូតលាស់ និងអាកប្បកិរិយា

សុខភាព និងសុវត្ថិភាព

ការព្រួយបារ​ម្ភ

ខែទី ១៣៖ អាអូនចាប់ផ្ដើមប្រែប្រួលរឿងញ៉ាំ និងគេង

ការព្រួយបារម្ភ