មួយថ្ងៃៗញ៉ាំអាហារផ្តេសផ្ដាស ជក់បារី ផឹកស្រា ប្រយ័ត្នកើតជំងឺមហារីកបំពង់អាហារ

    មួយថ្ងៃៗញ៉ាំអាហារផ្តេសផ្ដាស ជក់បារី ផឹកស្រា ប្រយ័ត្នកើតជំងឺមហារីកបំពង់អាហារ

    ដោយ​ហេតុ​ថា ជំងឺ​មហារីក ជា​ជំងឺ​សាហាវ គ្រាន់​តែ​យើង​ឭ​ហើយ​ខ្លាច ហើយ​វា​ក៏​ជា​ជំងឺ​មួយ​ដែល​អាច​កើត​បាន​ស្ទើរ​គ្រប់​ទី​កន្លែង​លើ​រាង​កាយ​របស់​យើង ហើយ​ផ្នែក​បំពង់​អាហារ​ក៏​មិន​អាច​ចៀស​ផុត​បាន​ដែរ។ ចុះ​ជំងឺ​មហារីក​បំពង់​អាហារ​ហ្នឹងបណ្ដាល​មក​ពី​អ្វី?

    តាម​ការ​ផ្សព្វ​ផ្សាយ​របស់​មន្ទីរពេទ្យ កាល់ម៉ែត ជំងឺ​មហារីក​បំពង់​អាហារ ជា​ការ​វិវត្ត​មិន​ប្រក្រតី (លឿន​ខុស​ធម្មតា) នៃ​កោសិកា​របស់​បំពង់​អាហារ បង្កើត​បាន​ជា​ដុំ​សាច់​ដែល​យើង​តែង​ហៅ​ថា ដុំ​សាច់​មហារីក។ ជំងឺ​នេះ​ត្រូវ​បាន​ចែក​ជា​ ២​ ប្រភេទ​ធំៗ គឺ ពួក​ស្កេមមើសសែល ការសីណូម៉ា និង​អាដេណូការសីណូម៉ា។ ចំណែក​កត្តា​ប្រឈម​ដែល​អាច​បង្ក​ឲ្យ​មាន​ដុំ​មហារីក​នេះ​កើត​បាន​មាន​ដូច​ជា៖

    – ជក់​បារី​រយៈ​ពេល​វែង

    – ញ៉ាំ​ស្រា ឬ​គ្រឿង​ស្រវឹង​ហួស​កម្រិត

    – អាយុ​ច្រើន(លើស​ពី​៥៥​ឆ្នាំ)

    – ភេទ​ប្រុស

    – ញ៉ាំ​អាហារ​ផ្ដេសផ្ដាស (អនាម័យ​មិន​ល្អ អាហារ​មិន​ល្អ…)

    – ជំងឺ​ច្រាល​ជាតិ​អាស៊ីដ​ក្រពះ និង​រលាក​បំពង់​អាហារ​រ៉ាំរ៉ៃ​ដោយ​មិន​បាន​ព្យាបាល​ត្រឹម​ត្រូវ​តាម​ក្បួន​វេជ្ជសាស្ត្រ។ល។

    ​កើត​ជំងឺ​មហារីក​បំពង់​អាហារ វា​ចេញ​រោគ​សញ្ញា​បែប​ណា​ឲ្យ​យើង​ដឹង?

    យើង​អាច​សង្កេត​បាន​ថា អ្នក​ជំងឺ​ដែល​មាន​ដុំ​មហារីក​បំពង់​អាហារ​នេះ មាន​រោគ​សញ្ញា​ដូចជា​៖

    – អួល​ណែន និង​ពិបាក​លេប​អាហារ​ចូល (ដំបូង​អាហារ​រឹង ក្រោយ​មក​អាហារ​រាវ យូរៗ​ទៅ សូម្បី​ទឹក​ក៏​ពិបាក​លេប)

    – ឈឺ​ចុក​ចាប់ នៅ​ពេល​បរិភោគ​អាហារ

    – ក្អួត​ចង្អោរ ក្រោយ​ញ៉ាំ​អាហារ​រួច

    – ចុក​ណែន​អួល ក្នុង​ដើម​ទ្រូង

    – ស្លេក​ស្លាំង និង​ខ្វះ​គ្រាប់​ឈាម​ក្រហម

    – ចុះ​ខ្សោយ អស់​កម្លាំង ល្ហិតល្ហៃ

    – មិន​ចង់​ញ៉ាំ​អាហារ

    – ស្រក​ទម្ងន់​ខ្លាំង​ខុស​ធម្មតា

    – ជួន​កាល អាច​មាន​ការ​ធ្លាក់​ឈាម ជាដើម។

    ភាគ​ច្រើន​អ្នក​ជំងឺ​ដែល​ទៅ​ពិគ្រោះ​ជាមួយ​គ្រូពេទ្យ​មាន​សភាព​ធ្ងន់ធ្ងរ​បាត់​ទៅ​ហើយ ជា​ហេតុ​ធ្វើ​ឲ្យ​មាន​ការ​យឺត​យាវ​ក្នុង​ការ​ធ្វើ​រោគ​វិនិច្ឆ័យ និង​ព្យាបាល ណា​មួយ​ការ​ព្យាបាល​សម្រាប់​ជំងឺ​មហារីក​បំពង់​អាហារ​នេះ​នៅ​មាន​កម្រិត​នៅ​ឡើយ។ ចំពោះ​ជំងឺ​មហារីក​បំពង់​អាហារ យើង​អាច​ដឹង​បាន​តាម​រយៈ​ការ​ឆ្លុះ​ក្រពះ ហើយ​វា​ក៏​ជា​មធ្យោបាយ​មួយ​ដែល​អាច​ឲ្យ​គ្រូពេទ្យ​ដឹង​មុន​ពេល​ជំងឺ​នេះ​រាល​ដាល​ហួស​ពេល។ ​

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    ត្រួតពិនិត្យដោយ

    វេជ្ជ. ចាន់ ស៊ីណេត

    · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


    អត្ថបទ​ដោយ នាង សុខុមដាលីញ៉ា · កែ 23/09/2020

    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម