កើតមហារីកមាត់ស្បូន ពិតជាគួរឲ្យបារម្ភខ្លាំងក៏ពិតមែន ប៉ុន្តែបើប្រហេសបន្តិច អាចនឹងធ្វើឲ្យទំនាក់ទំនងរវាងប្តីប្រពន្ធយើងល្អក់កករដោយសារវាទៀតផង។ ព្រោះគ្នាយើងសុទ្ធតែដឹងស្រាប់ HPV ដែលជារោគចម្បងបង្កឲ្យកើតមហារីកមាត់ស្បូន គឺឆ្លងតាមការរួមភេទតែម្តង។ បើមិនចង់មានបញ្ហានេះកើតឡើង “Hello គ្រូពេទ្យ” មានវិធីសាស្ត្រខ្លះៗអាចជួយស្រោចស្រង់បាន។
ចង់ចាកចេញពី Hellokrupet?
ប្រាកដហើយថា អ្នកចង់ចាកចេញ?
សាកវិធីសាស្ត្រនេះ កុំឲ្យមហារីកមាត់ស្បូនបំផ្លាញទំនាក់ទំនងប្តីប្រពន្ធយើង
១- ពិភាក្សាគ្នា
ត្រូវនិយាយគ្នាពីបញ្ហាមេរោគ HPV ឲ្យបានដឹងច្បាស់ ព្រោះពេលណាទាំងពីរនាក់យល់ពីមេរោគនេះ យើងសុទ្ធតែអាចការពារពីការឆ្លងរោគ និងមហារីកមាត់ស្បូនបាន។ អាចនាំគ្នាទៅជួបពេទ្យ ដើម្បីកាន់តែមានទំនុកចិត្ត។
ករណីមានផ្ទុក HPV មានន័យថា យើងធ្លាប់ប៉ះពាល់ជាមួយមេរោគ HPV ពីមុន ប៉ុន្តែមិនមែនថា យើងធ្វើរឿងមិនល្អទេ (រួមភេទជាមួយស្រីផ្សេង)។ អ៊ីចឹង ត្រូវនិយាយគ្នាឲ្យច្បាស់ ចៀសវាងមានការយល់ច្រឡំ។
២- រឿងសំខាន់ៗត្រូវដឹង
– មេរោគ HPV មានជាង ១០០ប្រភេទ ក្នុងនោះប្រមាណ ៣០ប្រភេទ ដែលកើតលើប្រដាប់ភេទ និងឆ្លងតាមការរួមភេទ។ ទោះមានប្រព័ន្ធភាពស៊ាំប្រឆាំងមេរោគ HPV ប្រភេទណាមួយក៏ដោយ យើងនៅតែអាចឆ្លងមេរោគ HPV ពិសេសពេលប៉ះជាមួយ HPV ប្រភេទផ្សេងទៀត។
– ឆ្លងមេរោគ HPV មិនមែនមានន័យថា ប្ដី ឬប្រពន្ធ គ្មានភាពស្មោះត្រង់ទេ ព្រោះករណីខ្លះ អាចឆ្លងតាមបន្ទប់ទឹកសាធារណៈ ឬការដាច់រលាត់ស្បែក។
– មិនមែនឆ្លង HPV សុទ្ធតែកើតមហារីកមាត់ស្បូនទាំងអស់ទេ។ ភាគច្រើនប្រព័ន្ធការពារខ្លួន អាចទប់ទល់មេរោគ មុនពេលកកើតទៅជាមហារីក។ ប៉ុន្តែ HPV អាចបង្កឲ្យកោសិកាប្រែប្រួលរយៈពេលយូរ ហើយកោសិកានោះនឹងក្លាយទៅជាមហារីក បើមិនរកឲ្យឃើញទាន់ពេល។ ករណីខ្លះ HPV អាចបង្កមហារីកផ្សេងៗ ដូចជា មហារីករន្ធគូទ មហារីកទ្វារមាស និងលិង្គ ជាដើម។
៣- នាំគ្នាធ្វើតេស្តរកមេរោគ
បើយើងមានផ្ទុក HPV ដៃគូយើងក៏អាចមានផ្ទុកមេរោគនេះដែរ។ ទាំងពីរនាក់គួរពិនិត្យតេស្ដ Pap (កៀរកោសិកាមាត់ស្បូន) ឬធ្វើតេស្ត HPV DNA រកមេរោគ។ ប៉ុន្តែការធ្វើ HPV DNA នៅមានកម្រិត ហើយក៏មិនច្បាស់បញ្ជាក់ពីមហារីកមាត់ស្បូនទេ ដោយអាចបញ្ជាក់បានតែការប្រែប្រួលកោសិកាមាត់ស្បូនប៉ុណ្ណោះ។
តាមមន្ទីរពេទ្យខ្លះ គេប្រើអាស៊ីដអាសេទិក ដើម្បីរកមើលការប្រែពណ៌មាត់ស្បូន ប៉ុន្តែតេស្តនេះមិនត្រូវធ្វើដើម្បីរកមើល HPV ទេ វាអាចធ្វើឲ្យយើងមានការច្រឡំ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនឡើយ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ប្រភព
HPV and Relationships. http://www.nccc-online.org/hpvcervical-cancer/hpv-and-relationships/. Accessed December 20, 2016.
My World of HPV. http://psychcentral.com/lib/my-world-of-hpv/. Accessed December 20, 2016.
Marriage and childbearing in relation to cervical cancer. http://www.ncbi.nlm.nih.gov/pubmed/264057 . Accessed December 20, 2016.
Share