ការចែករំលែកបទពិសោធន៍ជាសះស្បើយពីជំងឺមហារីកពងស្វាស

លោក Shunsuke Miyatake ជាជនជាតិជប៉ុនដែលរស់នៅក្នុងប្រទេស កម្ពុជាបានដឹងថា គាត់មានជំងឺមហារីកពងស្វាសកាលពីខែសីហា ឆ្នាំ ២០២៤។ ដំណឹង​នេះ​ធ្វើឱ្យគាត់​មាន​ការ​ភ្ញាក់ផ្អើលជាខ្លាំង ​ដោយសារគាត់មានការរស់នៅល្អទៀងទាត់ រក្សាតុល្យភាពរវាងការងារ និងជិវិតផ្ទាល់ខ្លួន ដូចជាចូលចិត្តថតរូប និងលេងបាល់ទាត់ពីរដងក្នុងមួយសប្តាហ៍ជាដើម។ មួយវិញទៀត ភាគរយនៃការកើត​​ជំងឺ​មហារីក​ពងស្វាសលើបុរស​មាន​តែ ១% ប៉ុណ្ណោះ តែគាត់បែរជាកើតជំងឺនេះ។

លោក Miyatake ជាមនុស្សម្នាក់ក្នុងចំណោមមនុស្សប្រមាណ ២,៣ លាននាក់នៅអាស៊ីអាគ្នេយ៍ដែលរកឃើញថា កើតជំងឺមហារីក។ ករណីជំងឺមហារីកដែលកើតញឹកញាប់បំផុតមាន ជំងឺមហារីកសុដន់ ជំងឺមហារីកមាត់ស្បូន និងជំងឺមហារីកសួត។

ក្រោយពីឆ្លងកាត់ភាពតក់ស្លុត ភាពសោកសៅ កំហឹង និងការតាំងចិត្ត លោក Miyatake សម្រេចចិត្តប្រយុទ្ធប្រឆាំងនឹងជំងឺមហារីកពងស្វាសដំណាក់កាល 2B របស់គាត់ ដោយស្វែងយល់អំពីស្ថានភាពជំងឺឱ្យបានច្រើនតាមតែអាចធ្វើទៅបាន។ លោក​បាន​ធ្វើការព្យាបាល​នៅ​ប្រទេស​កម្ពុជា បានសហការជាមួយ​វេជ្ជបណ្ឌិត​ជាច្រើន បានធ្វើ​ការ​វះកាត់ និងបាន​ព្យាបាល​ដោយ​ប្រើថ្នាំគីមី​ជាច្រើនវគ្គ។

ក្នុងអំឡុងពេលព្យាបាលជំងឺមហារីកពងស្វាស លោក Miyatake ប្រឈមមុខនឹងបញ្ហាជាច្រើនដូចជា ការកែប្រែរបបអាហារ ការស្វែងរកវេជ្ជបណ្ឌិតដែលយកចិត្តទុកដាក់ក្នុងការព្យាបាល និងទទួលស្តាប់កង្វល់របស់គាត់ និងការសម្រេចចិត្តថា គាត់ត្រូវបន្តធ្វើការព្យាបាលនៅក្នុងប្រទេសកម្ពុជាទៀត ឬបន្តការព្យាបាលនៅក្រៅប្រទេស។

លោក Miyatake បានឱ្យដឹងថា ការបង្ហាញការយកចិត្តទុកដាក់ និងលើកទឹកចិត្តគឺចាំបាច់ និងមាន​ឥទ្ធិពលណាស់សម្រាប់គាត់ក្នុងអំឡុងពេលធ្វើរោគវិនិច្ឆ័យ និងទទួលការព្យាបាល។ គាត់បានអានសារជាច្រើនដែលបានផ្ញើមកគាត់មកពីជុំវិញពិភពលោក ដែលបង្ហាញពីការ យកចិត្តទុកដាក់ចំពោះគាត់ និងលើកទឹកចិត្តគាត់ដោយការដឹងគុណ។

រាល់ការយកចិត្តទុកដាក់ និងលើកទឹកចិត្តដែលគាត់ទទួលបានពីក្រុមគ្រួសារ និងមិត្តភ័ក្តិបាននាំគាត់តស៊ូទៅមុខបន្ត។ ដូចគ្នាដែរប្រសិនបើមិត្តភ័ក្តិ ឬនរណាម្នាក់ដែលគាត់ស្គាល់កំពុងរងទុក្ខ គាត់នឹងផ្ញើសារ ឬផ្តល់ការយកចិត្តទុកដាក់ ឬលើកទឹកចិត្តទៅពួកគេភ្លាមៗ។ ជាពិសេសអ្នកដែលចូលចិត្តគាត់ ឬអ្នកដែលកំពុងឆ្លងកាត់បទពិសោធន៍កើតជំងឺមហារីក និងទទួលការព្យាបាលដូចគាត់។

សព្វថ្ងៃនេះ អាការលោក Miyatake បានធូរស្បើយជាងមុន។ បន្ទាប់ពីការវះកាត់ និងការព្យាបាលដោយថ្នាំគីមីចំនួនបួនវគ្គ លទ្ធផលស្កែន CT នៅខែធ្នូ ឆ្នាំ ២០២៤ របស់លោកមិនឃើញមានសញ្ញាជំងឺមហារីក និងកូនកណ្តុរនៅក្នុងពងស្វាសទៀតទេ។ ប៉ុន្តែ​គាត់​ដឹង​ថា ​រឿង​មិន​ចប់​ត្រឹម​ហ្នឹងទេ។ គាត់ ​និង​ក្រុម​គ្រូពេទ្យ​ត្រូវ​បន្ត​តាម​ដាន​បន្ថែមទៀត។

ទន្ទឹមនឹងការបរិភោគរបបអាហារសុខភាព គាត់បានបន្តគ្រប់គ្រង ផលប៉ះពាល់នៃការព្យាបាល ដូចជាការបាត់បង់ អារម្មណ៍នៅចុងម្រាម ដៃ និងការឈឺជើងជាប្រចាំ។ ទោះជាយ៉ាងណាក៏ដោយ សក់ និងពុក ចង្ការរបស់គាត់កំពុងដុះមកវិញបន្តិចម្តងៗ ហើយការងារ និងជីវិតប្រចំាថ្ងៃរបស់គាត់កំពុងត្រលប់ទៅរកដូចមុនពេលគាត់ធ្វើរោគ វិនិច្ឆ័យរកឃើញថា មានជំងឺមហារីកពងស្វាស។ គាត់​ក៏​មាន​កម្លាំង​អាចចូល​ក្នុង​ការ​លេង​បាល់ទាត់​ម្តងម្កាលដែរ។

លោក Miyatake បានប្រាប់ថា ជំងឺមហារីកពងស្វាសអាចព្យាបាលបាន។ ប៉ុន្តែតាមបទពិសោធន៍ គាត់ធ្លាប់គិតថា គាត់នឹងអស់ជីវិត។ បន្ទាប់ពីបានជួបនឹងជំងឺធ្ងន់ធ្ងរ គាត់មានអារម្មណ៍ដឹងគុណចំពោះមនុស្សគ្រប់គ្នានៅជុំវិញគាត់ ដែលបានជួយលើកទឹកចិត្ត និងយកចិត្តទុកដាក់ចំពោះគាត់ក្នុងគ្រាគាត់កំពុងព្យាបាលជំងឺ។

យុទ្ធនាការទិវាពិភពលោកប្រយុទ្ធប្រឆាំងជំងឺមហារីកប្រារព្ធឡើងជារៀងរាល់ឆ្នាំនៅថ្ងៃទៅ ០៤ កុម្ភៈ។ យើងអាចចូលរួមយុទ្ធនាការនេះតាមមធ្យោបាយជាច្រើន ដូចជាចែករំលែកមូលហេតុកើតជំងឺមហារីក បទពិសោធន៍ប្រយុទ្ធប្រឆាំងនឹងជំងឺមហារីក ឬបទពិសោធន៍ព្យាបាលជំងឺមហារីករបស់ខ្លួនផ្ទាល់ របស់មិត្តភក្តិ ឬក្រុមគ្រួសារ។ល។ តាមរយៈបណ្តាញសង្គមជាដើម ដូចករណីរលោក Miyatake​ ដើម្បីលើកទឹកចិត្តអ្នកជំងឺមហារីកផ្សេងទៀត កុំឱ្យបាក់ទឹកចិត្ត និងកុំបោះបង់ចោលការព្យាបាល។ ជាងនេះទៅទៀត ការគាំទ្រ និងលើកទឹកចិត្តពីសំណាក់មិត្តភក្តិ ញាតិមិត្ត ក្រុមគ្រួសារ និងសហគមជាកម្លាំងចិត្តដល់សំខាន់ក្នុងការជួយអ្នកជំងឺមហារីកដែលកំពុងទទួលការព្យាបាល។

អត្ថបទគួរអាន៖

• ប្រុសៗប្រយ័ត្នផង! សញ្ញា​ព្រមាន​​ទាំង ​៥ នៃ​ជំងឺ​មហារីក​ក្រពេញ​ប្រូស្តាត
• ហេតុ​ផលនេះហើយ អ្នកបើក​រថយន្តធំៗ​ អាចប្រឈមជំងឺមហារីក​​​​​​​​​​​​​​​​​​​​​​​​​​​​​​​​​
• ទម្លាប់សាមញ្ញ ២ តែអាចបង្កជាហានិភ័យជំងឺមហារីក បើមិនចាប់អារម្មណ៍
• ប្រយ័ត្ន! ស្ពឹកជើង ឬប្រអប់ជើង អាចជាសញ្ញានៃជំងឺមហារីកក្រពេញប្រូស្តាត
• ប្រយ័ត្នប្រុសៗ! មានបញ្ហាក្រពេញប្រូស្ដាត អាចងាប់អាអូនតូច
• ប្រុសៗទម្លាប់ផឹកកាហ្វេ កាត់បន្ថយហានិភ័យកើតមហារីកក្រពេញប្រូស្តាត