តិចនិក​ហាត់ប្រាណសម្រាប់ស្រីៗពពោះត្រីមាសដំបូង

    តិចនិក​ហាត់ប្រាណសម្រាប់ស្រីៗពពោះត្រីមាសដំបូង

    មានស្រីៗយើងមួយ​ចំនួន គិតថា ពេល​ពពោះ​ មិនគួរ​ហាត់​ប្រាណ លើក​ដៃ​លើក​ជើង ព្រោះ​ខ្លាច​ប៉ះពាល់​កូន​ក្នុង​ផ្ទៃ។ តែតាម​វេជ្ជសាស្ត្រ ស្រីៗ​មាន​ផ្ទៃ​ពោះ គួរចាប់​ផ្តើម​ហាត់​ប្រាណ​ពី​ត្រីមាស​ដំបូង ដល់​ត្រីមាស​ទី៣ ដោយវាមាន​ប្រយោជន៍​ច្រើន​ណាស់​ ទាំង​សុខភាពម្តាយ និងគភ៌ក្នុង​ផ្ទៃ។ “Hello គ្រូពេទ្យ នឹង​ប្រាប់តិចនិក​ហាត់​សម្រាប់​ស្រីៗ​ពពោះ​ ដើម្បីសុខ​ភាព​ល្អ។

    ហាត់​ប្រាណ​នៅ​ត្រី​មាស​ដំបូង (ខែ​ទី ១-៣)

    ដឹង​ថាពពោះ​ភ្លាម យើង​​មិន​ចាំ​បាច់​ផ្លាស់​ប្ដូរ​ទម្លាប់ ឬ​សកម្មភាព​ប្រចាំ​ថ្ងៃ​អី​ច្រើន​ទេ បើ​ធ្លាប់​ធ្វើ​អី បន្ត​ធ្វើ​ធម្មតា​ទៅ ដូច​ជា ដើរ ​រត់​ហាត់​ប្រាណ និង​ហែល​ទឹក​ជាដើម សុទ្ធ​តែ​ល្អ​សម្រាប់​សុខភាព។ នៅ​ត្រី​មាស​ដំបូង ស្ត្រីពពោះ​ភាគ​ច្រើន ​ចាប់​ផ្ដើម​ចាញ់ អស់​កម្លាំង ចង់​ក្អួត ល្ហិតល្ហៃ មិន​ចង់​ធ្វើទាំង​អស់ កុំ​ថា​ឡើយ​​ហាត់​ប្រាណ។ ​ដើម្បី​សុខភាព​ខ្លួន​ឯង និង​កូន​ជា​ទី​ស្រលាញ់ ​គួរ​ព្យាយាម​ហាត់​ប្រាណ​យ៉ាងហោចក៏​បាន​ ៥-១០​ នាទី/ថ្ងៃ​ ដែរ។ យើង​អាច​សាកល្បង​វិធី​រៀបរាប់​ខាង​ក្រោម ងាយ​ៗ និង​ចំណាយ​ពេល​តិច ជឿថា​យើង​អាច​ធ្វើ​បាន៖

    ១- ដើរ​ហាត់ប្រាណ

    ដើរ ជា​វិធី​ដ៏​ល្អ និង​ងាយ​ស្រួល​បំផុត​សម្រាប់​ស្រីៗទើបពពោះត្រីមាស​ដំបូង អាច​ដើរ​តិច​ៗ​នៅ​ពេល​ព្រឹក​ព្រលឹម មិន​ត្រឹម​តែ​ជួយ​ឲ្យ​សុខភាព​ល្អ​​ទេ ថែម​ទាំង​ជួយ​ឲ្យ​យើង និងគភ៌​ អាច​ស្រូប​យក​វីតាមីន D ពី​ពន្លឺ​ព្រះអាទិត្យ​បាន​គ្រប់គ្រាន់ និង​គេង​លក់​ស្រួល​ទៀត​ផង។

    ២- ហាត់ប្រាណ​ពង្រឹង​សាច់​ដុំ​ត្រគាក (Kegels)

    Kegels ជា​វិធី​ហាត់ប្រាណ​មួយ​ប្រភេទ ជួយ​ពង្រឹង​សាច់ដុំ​អាង​ត្រគាក​ ​ជា​កន្លែង​ទ្រទ្រង់​ស្បូន ប្លោក​នោម និង​ពោះវៀន។ មាន​ផ្ទៃពោះ សម្រាល​កូន វ័យ​ចាស់​ជរា និងលើស​ទម្ងន់ សុទ្ធ​តែ​អាច​ធ្វើ​ឲ្យ​សាច់​ដុំ​អាង​ត្រគាក​ស្រី​ៗ​ចុះ​ខ្សោយ ហើយ​សំខាន់​នៅ​ពេល​វា​ចុះ​ខ្សោយ យើង​អាច​ប្រឈម​បញ្ហា​ធ្លាក់​ត្រគាក ទ្វារមាស​ឡើង​ប៉ោង ឬ​កើត​ជំងឺ​​ស្រុតស្បូន​ជាដើម។ ហាត់ Kegels មិន​ពិបាក​ទេ ស្រដៀង​ទៅ​នឹង​ការ​ប្រឹង​ទប់​នោម យើង​គ្រាន់​តែ​ប្រឹង​ខ្ជឹប​សាច់ដុំ​អាង​ត្រគាកយើង ហើយ​ទប់​វា​ប្រមាណ ២-៣ វិនាទី ទើប​ប្រលែង​វិញ ធ្វើ​បែប​នេះ​ឲ្យ​បាន ១០​ដង។

    ៣- ហាត់​យ៉ូហ្កា​កម្រិតដំបូង Yoga Asanas

    Yoga Asanas ជា​ប្រភេទ​យ៉ូហ្កា​ថ្នាក់​ដំបូងសម្រាប់​ស្រីៗ​​មិន​ធ្លាប់​ហាត់​សោះ វា​ទាក់​ទង​នឹង​ឥរិយាបថ​រាងកាយ ដើម​ឡើយ​ដូច​អង្គុយ​សមាធិ​ដែរ តែ​ក្រោយ​មក​ គេ​បញ្ចូល​ការ​ពត់​ពែន​ខ្លួន​បែប​ស្រាល​ៗ ហើយ​​ត្រូវ​គេ​អះអាង​ថា​ មិន​មាន​អ្វី​ប៉ះពាល់​ដល់​គភ៌​​ក្នុង​ផ្ទៃ​ឡើយ។ ហាត់ Yoga Asanas មាន​ច្រើន​របៀប សូមពិភាក្សាជាមួយគ្រូបង្វឹក។

    អត្ថបទ​ពាក់ព័ន្ធ៖

    ស្ដ្រី​ពពោះ​ហែល​ទឹក_Hello_គ្រូពេទ្យ

    ៤- ហែល​ទឹក

    ហែល​ទឹក ជា​លំហាត់​ប្រាណ​មួយ​ ​ត្រូវ​ប្រើ​កម្លាំង​សាច់​ដុំ​ស្ទើរ​គ្រប់​កន្លែង ហើយស្រីៗ​យើង​អាច​មាន​អារម្មណ៍​ពិបាក​ដកដង្ហើម​បន្តិច ឬ​ឆាប់​ហត់ ដូចនេះ គួរ​ចាប់​ផ្ដើម​ហាត់​យឺត​ៗ និង​កុំ​ប្រឹង​ខ្លាំង​ពេក យើង​អាច​ហាត់បែប Aqua AerobicsKiddiespool ដោយ​ដើរ​ក្នុង​អាងទឹក (ដើរ​ពី​ដើម​ទៅ​ចុង​អាង​ ​មាន​ទឹក​ត្រឹម​ចង្កេះ ឬ​ជ្រៅ​ជាង​នេះ) ដើម្បី​កម្ដៅ​សាច់ដុំ​សិន។ ធ្វើ​បែប​នេះ​ឲ្យ​បាន ​២-៣ សប្ដាហ៍ ចាំ​ចាប់​ផ្ដើម​ហែល​ទឹក​ប្រវែង​ខ្លី (គួរ​ស្ទាប​ស្ទង់​កម្លាំង និង​អារម្មណ៍​របស់​យើង ថា​តើ​មាន​បញ្ហា​អី​អត់)។ បើ​មិន​មាន​អាការៈ​ណា​ប្លែក យើង​អាច​បន្ត​ហែល​បែប​នេះ ៥នាទី ចាំ​ឈប់​ម្ដង និង​ឲ្យ​បាន ៤-៥ ដង បែប​នេះ​សរុប​ទៅបាន ៣០ នាទីពេញ​តែ​ម្តង។

    ទោះបី​ហាត់ប្រាណ​ក្នុង​ត្រីមាស​ដំបូង​នៃ​ការ​ពពោះ អាច​ផ្ដល់​ផលប្រយោជន៍​ច្រើន​ដល់​សុខភាព​ម្ដាយ និង​កូន តែ​មិន​ត្រូវ​ប្រឹង​ហាត់​ខ្លាំង​ជ្រុល​នោះ​ទេ។ ម្យ៉ាង​ទៀត ​គួរ​ពិគ្រោះ​ជាមួយ​គ្រូពេទ្យ​ជំនាញ​ ពី​សកម្មភាព​ហាត់​ប្រាណ​មួយ​ចំនួន ព្រោះ​​អាច​ទាក់​ទង​នឹង​ស្ថានភាពសុខភាពទាំង​ម៉ាក់​ៗ ​និង​គភ៌​ក្នុង​ផ្ទៃ​ដែរ។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ CHHOEUNG Sothearoth កែសម្រួល​ចុងក្រោយ 28/04/2021
    ត្រួតពិនិត្យដោយ វេជ្ជ. ចាន់ ស៊ីណេត