បញ្ហារីងទឹកភ្លោះ កើតឡើងលើម៉ាក់ៗមួយចំនួនដែលពពោះលើសខែ ហើយនាំឲ្យមានបញ្ហាដល់កូនក្នុងផ្ទៃថែមទៀតផង។ លោកវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត បានបកស្រាយថា រយៈពេលគ្រប់ខែ គឺចាប់ពី ៣៧-៤០ សប្ដាហ៍ បើលើសចូលដល់ ៤១ ហើយត្រូវទៅពិគ្រោះជាមួយគ្រូពេទ្យជាបន្ទាន់។
សាស្ត្រាចារ្យវេជ្ជបណ្ឌិតរូបនោះបានបន្ថែមទៀតថា បើករណីទុកកាន់តែយូរទឹកភ្លោះដែលទ្រទ្រង់ទារកក្នុងផ្ទៃក៏កាន់តែអស់ទៅៗ។ ចំណែកមូលហេតុគឺរយៈពេលតាំងពីថ្ងៃពពោះរហូត ៩ ខែ ១០ ថ្ងៃគឺជាវេលាដែលទឹកភ្លោះកកើត ហើយក្រោយពីនោះវាលែងផលិតទៀតហើយ ដែលនេះជាធម្មជាតិរបស់មនុស្ស។ ទឹកភ្លោះជាផ្នែកមួយជួយទ្រទ្រង់ជីវិតទារក ហើយកូននឹងធ្វើចលនាវិលចុះឡើងនៅក្នុងស្បូនរបស់យើង ដោយមានជំនួយពីទឹកភ្លោះនេះឯង។
