យើងតែងតែឮជារឿយៗករណីស្រីពពោះមួយចំនួន ស្រាប់តែមានសុកពាំងមាត់ស្បូន ខ្លះសុកពាំងតិចតួច ខ្លះទៀតសុកពាំងខ្លាំង។ តើករណីនេះបណ្ដាលមកពីអ្វី? គ្រោះថ្នាក់យ៉ាងណាខ្លះចំពោះម្ដាយ និងកូន?

បើតាមការបកស្រាយរបស់លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត សុកពាំងមាត់ស្បូនគឺជាតាំងនៅ ឬការទុំរបស់សុកខុសប្រក្រតី អាចនៅគ្របដោយផ្នែក ឬគ្របលើមាត់ស្បូនទាំងស្រុង។ សុកមានតួនាទីផ្តល់អុកស៊ីសែន និងសារធាតុចិញ្ចឹមដល់កូន ពិសេសចម្រាញ់យកជាតិពុលក្នុងឈាម។

លោកថា ករណីដែលស្រីៗពពោះមានសុកពាំងមាត់ស្បូន អាចមកពីមូលហេតុច្រើនយ៉ាង ដោយលោកវេជ្ជបណ្ឌិតយោងទៅលើការសិក្សាស្រាវជ្រាវផ្សេងៗ ដែលក្នុងនោះមាន ករណីមិនដឹងមូលហេតុប្រមាណ ២០-៣០% ករណីចៃដន្យ ២០-៣០% និង ២០-៣០% ទៀតកើតឡើងដោយសារម៉ាក់ៗរំលូត ឬមានកូនញឹកពេក មានដុំស្បូន រលាកដៃស្បូនជាដើម។

អត្ថបទពាក់ព័ន្ធ៖ មកដឹងពីមូលហេតុកូនមិនបង្វិលក្បាលចុះក្រោម និងវិធីសង្គ្រោះ

ពពោះ សុកពាំងមាត់ស្បូន

គេបែងចែកករណីសុកពាំងមាត់ស្បូនជា ៣ សណ្ឋាន នេះតាមការពិនិត្យគ្លីនិកដោយគ្រូពេទ្យ ដែលសណ្ឋានទី១ សុខពាំងមាត់ស្បូនតិចតួច សណ្ឋានទី២ សុកពាំងនៅចំហៀង និងសណ្ឋានទី៣ សុកពាំងពីមុខ។

ចំណែកឯការពិនិត្យអេកូវិញ គេបែងចែកករណីសុកពាំងមាត់ស្បូនដល់ ៤ កម្រិតឯណោះ ទី១ ជាកម្រិតស្រាល ដែលសុកពាំងមាត់ស្បូនតិចតួចប៉ុណ្ណោះ ទី២ សុកពាំងនៅចំហៀង ទី៣ សុកពាំងចំកណ្តាល និងទី៤ សុកពាំងពីមុខ។

សុកពាំងមាត់ស្បូនកម្រិតទី៣ និងទី៤ នេះគ្រោះថ្នាក់ខ្លាំង បើគ្រូពេទ្យពិនិត្យឃើញករណីនេះនៅអំឡុងត្រីមាសទី១ នោះគ្រូពេទ្យនឹងតម្រូវឲ្យរំលូតកូនចោល ឬកាត់ស្បូនចេញ។ តែប្រសិនបើពិនិត្យករណីនេះកើតមាននៅត្រីមាសទី៣ ជិតដល់ពេលសម្រាលកូន នោះគ្រូពេទ្យនឹងតម្រូវឲ្យសម្រាលកូនដោយវះកាត់ ដើម្បីបញ្ចៀសគ្រោះថ្នាក់។ ប្រធានផ្នែករោគស្ត្រី នៃមន្ទីរពេទ្យកាល់ម៉ែត បញ្ជាក់។

ករណីសុខពាំងមាត់ស្បូនគ្រោះថ្នាក់ខ្លាំងណាស់ ដូច្នេះម៉ាក់ៗត្រូវតែទៅពេទ្យ តាមដានសុខភាពគភ៌ជារៀងរាល់ខែ ដើម្បីបានដឹងពីសុខភាពកូន ការវិវត្តគភ៌ ទីតាំងរបស់សុកឲ្យច្បាស់លាស់តើនៅកន្លែងសុវត្ថិភាពឬទេ?

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

មក​ដឹង​លម្អិត​ពី​ករណី​សុក​ពាំង​មាត់​ស្បូន​ពេល​ពពោះ ​គ្រោះ​ថ្នាក់​ខ្លាំង​ណាស់

មកដឹងលម្អិតពីករណីសុកពាំងមាត់ស្បូនពេលពពោះ គ្រោះថ្នាក់ខ្លាំងណាស់