ពេលពពោះ គភ៌ត្រូវបានការពារដោយថង់ទឹកភ្លោះ វាកើតឡើងពីទឹករងៃ និងឈាមរបស់ម្តាយដែលជ្រាបចូលតាមរយៈសុក តាំងពីសប្តាហ៍ដំបូងនៃការមានផ្ទៃពោះ និងនៅពេលទារកមានតម្រងនោមនៅសប្តាហ៍ទី ១៦។ កូនក្នុងពោះមិនអាចរស់បានដោយគ្មានទឹកភ្លោះនោះទេ កាលណាទឹកភ្លោះតិចពេកក៏ប៉ះពាល់ការលូតលាស់គភ៌ដែរ អ៊ីចឹងតើម៉ាក់ៗធ្វើម៉េចឲ្យមានទឹកភ្លោះគ្រប់គ្រាន់?

តួនាទីរបស់ទឹកភ្លោះ ជួយការពារកូនក្នុងពោះពីការប៉ះទង្គិចផ្សេងៗ រក្សាសីតុណ្ហភាពរបស់គភ៌ ការពារកូនពីជាតិពុល ឬការបង្ករោគផ្សេងៗ និងជួយឲ្យសរីរាង្គទារកលូតលាស់បានល្អ។

លោកវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត បានឲ្យដឹងថា ទឹកភ្លោះជាវដ្តជីវិតរបស់កូន បរិមាណទឹកភ្លោះចាប់ផ្តើមមានបន្តិចម្តងៗ និងចេះតែកើនឡើងទៅតាមអាយុរបស់គភ៌ ហើយថយចុះមកវិញនៅពេលជិតដល់ថ្ងៃសម្រាល។

១- មូលហេតុទឹកភ្លោះតិច

បរិមាណទឹកភ្លោះត្រូវបានកំណត់តាមរយៈការមើលអេកូប្រចាំខែ ឬប្រចាំត្រីមាស ដោយចាប់ពីត្រីមាស ទី២ ទៅបរិមាណទឹកភ្លោះកើនឡើងកាន់តែខ្លាំង រហូតដល់ ៩៨០ មិល្លីលីត្រ ហើយវានឹងថយចុះបរិមាណបន្តិចម្តងៗ មកត្រឹម ៦០០-៨០០ មិល្លីលីត្រ ពេលគ្រប់ខែ។ ខាងក្រោមនេះជាមូលហេតុមួយចំនួនធ្វើឲ្យបរិមាណទឹកភ្លោះមិនគ្រប់គ្រាន់៖

– ទារកមានបញ្ហាតម្រងនោម

– សុកខ្សោយ

– ប្រើថ្នាំផ្តេសផ្តាសដោយគ្មានវេជ្ជបញ្ជា

– ម្តាយខ្វះជាតិទឹក

– ជក់បារី ឬផឹកស្រា

– ម្តាយឆ្លងជំងឺពីមេរោគមួយចំនួន

– មានផ្ទៃពោះលើសពី ៤២ សប្តាហ៍។

អត្ថបទពាក់ព័ន្ធ៖

ទឹកភ្លោះ

២- ទឹកភ្លោះតិចពេកប៉ះពាល់អីខ្លះ?

កង្វះទឹកភ្លោះ នៅត្រីមាសទី១៖ អាចធ្វើឲ្យកូនអត់មានតម្រងនោម

កង្វះទឹកភ្លោះ នៅត្រីមាសទី២៖ សរីរាង្គកូនលូតលាស់យឺតយ៉ាវ ឬមិនប្រក្រតី

កង្វះទឹកភ្លោះ នៅត្រីមាសទី៣៖ ស្អិតស្បូន កូនកើតមិនរួច។

៣- ធ្វើម៉េចកុំឲ្យខ្វះទឹកភ្លោះ

– ត្រូវញ៉ាំទឹកឲ្យបានច្រើន លើសពី ២លីត្រ/ថ្ងៃ

– ញ៉ាំបន្លែផ្លែឈើសម្បូរជាតិទឹក

– មិនត្រូវប្រើថ្នាំដោយគ្មានវេជ្ជបញ្ជា

– ចៀសវាងការប្រើថ្នាំបុរាណ ឬថ្នាំចិនសែ

– មិនត្រូវផឹកគ្រឿងស្រវឹង ឬជក់បារី។

ពេលពពោះខ្វះទឹកភ្លោះមកពីអី ហើយធ្វើម៉េចឲ្យមានគ្រប់គ្រាន់?