ទឹកភ្លោះបែកអាចកើតឡើងបានគ្រប់ពេល ពេលថ្ងៃឆ្លងទន្លេកាន់តែកៀក ឬដល់ពេលសម្រាល។ ការត្រៀមខ្លួនជាប៉ាម៉ាក់ថ្មីថ្មោង (មានកូនដំបូង) អាចបារម្ភ ឬធ្វេសប្រហែសច្រើនជុំវិញករណីបែកទឹកភ្លោះ។ កាលវិភាគដែលពេទ្យប្រាប់ពីថ្ងៃឆ្លងទន្លេ មិនប្រាកដ ១០០% ទេ គឺតែងតែចន្លោះពីថ្ងៃនេះទៅថ្ងៃនោះ។ ចុះបើទឹកភ្លោះបែក ពេលកំពុងដើរផ្សារទិញ ឲ្យធ្វើយ៉ាងម៉េច? មានគ្រោះថ្នាក់ទេ បើបែកទឹកភ្លោះ ទាំងមិនបានត្រៀមខ្លួន ឬកំពុងនៅពេទ្យ?
ស្រីៗកូនដំបូងត្រូវដឹង បើបែកទឹកភ្លោះ គ្រោះថ្នាក់អត់?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ករណីនេះ ជារឿងសំខាន់មែនទែន ដែលស្រីៗគួរស្វែងយល់ ព្រោះភាគច្រើននឹងត្រូវឆ្លងកាត់បទពិសោធនេះហោចណាស់ម្ដង (សម្រាប់ឆ្លងទន្លេកូនដំបូង)។ តើគួររៀបចំខ្លួន និងប្រុងប្រយ័ត្នអីខ្លះ?
១- ទឹកភ្លោះហ្នឹងអីគេ?
ទារកក្នុងផ្ទៃម្ដាយត្រូវបានការពារដោយថង់ស្រោមភ្នាសមួយពោរពេញដោយទឹក ហៅថា “ទឹកភ្លោះ”។ ពេលស្រោមទឹកភ្លោះបែក ទឹកហូរពីស្បូន ហើយចេញតាមទ្វារមាស។ អាការៈបែកទឹកភ្លោះនេះ ជាសញ្ញាប្រាប់ថាដល់ពេលសម្រាល ឬពេលខ្លះក៏អាចកើតឡើងមុនថ្ងៃកំណត់សម្រាលដែរ។
២- អារម្មណ៍ពេលបែកទឹកភ្លោះ
ស្រីៗអាចមានអារម្មណ៍ខុសគ្នាពេលបែកទឹកភ្លោះ។ អ្នកខ្លះមានអារម្មណ៍ថាដូចផ្ទុះបែកអ្វីមួយ ដូចសាចហូរទឹក ឬដូចហូរទឹកនោមខ្សោយៗ។
យើងអាចសម្គាល់ ឬបែងចែកដាច់ថា ការហូរទឹកមកជោកចេញពីទ្វារមាសនេះ មិនមែនជាទឹកនោមទេ បើសិនគ្មានក្លិនឆ្អេះ ឬពណ៌ដូចទឹកនោម ប៉ុន្តែបែរជាក្លិនបែបផ្អែមៗ ដូចទឹកកាម ឬសារធាតុក្លរ។ កាន់តែស្រួលចំណាំជាងនេះទៀត គឺទឹកដែលហូរចេញមកអាចមានសភាពថ្លា ឬមានឈាមលាយមកជាមួយ។
៣- ពេលណាបែកទឹកភ្លោះ?
រាងកាយខុសគ្នា ការបែកទឹកភ្លោះ ក៏អត់ដូចគ្នាទាំងស្រុងដែរ តែស្ត្រីភាគច្រើនអាចបែកទឹកភ្លោះក្នុងដំណាក់កាលដំបូងនៃការសម្រាល ពេលសាច់ដុំស្បូនចាប់ផ្ដើមកន្ត្រាក់។ តាមការពិសោធកន្លងទៅ ស្ត្រីម្នាក់ក្នុងចំណោម ១០នាក់ បែកទឹកភ្លោះមុនសម្រាល។ បើក្នុងករណីកម្រវិញ ស្រ្ដី ៣នាក់ លើ១០០នាក់ អាចបែកទឹកភ្លោះកូនមិនគ្រប់ខែ មុនថ្ងៃត្រូវសម្រាល (ធម្មតារយៈពេល ៣៧ សប្ដាហ៍)។ បើសិនបែកទឹកភ្លោះមុនថ្ងៃសម្រាល បានសេចក្ដីថា ដល់ពេលសម្រាលហើយ។
៤- គួរធ្វើម៉េចពេលបែកទឹកភ្លោះ?
– ពង្រឹងស្មារតីថាមិនអី
– កុំព្យាយាមនៅតែឯង អំឡុងកៀកដល់ថ្ងៃសម្រាល
– ហៅអ្នកក្នុងផ្ទះ ឬទូរសព្ទហៅមនុស្សសំខាន់បំផុតដែលអាចដឹកទៅពេទ្យបាន (ប្ដី/បងប្អូន)
– លេខជំនួយ៖ លេខឡានពេទ្យ ឬតាក់ស៊ី គួរសាកួរទុកឲ្យហើយមុនឈឺពោះ ឬករណីបែកទឹកភ្លោះកើតឡើង
– អ្វីដែលស្រីពពោះត្រូវធ្វើចំពោះខ្លួនឯង៖ ទឹកភ្លោះដែលនៅក្នុងពោះ អាចមានទៅដល់ ៨០០ មិល្លីលីត្រ (ជិត ១លីត្រ)។ យើងអាចប្រើសម្លីអនាម័យជួយទប់ការហូរ ឬបើទឹកភ្លោះហូរច្រើន គួរទ្រាប់កំណាត់ពីក្រោមជាមួយថង់កៅស៊ូ ដើម្បីការពារកន្លែងអង្គុយក្នុងឡាន ឬពេលធ្វើដំណើរតាមផ្លូវទៅមន្ទីរពេទ្យ ដោះស្រាយបរិមាណនៃការហូរសិន។
៥- ចុះបើបែកទឹកភ្លោះមុនថ្ងៃសម្រាល?
ទោះជាបែកទឹកភ្លោះក៏ដោយ គឺត្រូវរង់ចាំដល់ពេលសាច់ដុំស្បូនចាប់ផ្ដើមកន្ត្រាក់បើកស្បូន អំឡុង ២៤ ម៉ោង បន្ទាប់ពីបែកទឹកភ្លោះ។ យ៉ាងណាមិញ បើលើស ២៤ ម៉ោងហើយ ស្បូននៅតែអត់បើកដល់លេខដែលកើតបែបធម្មជាតិបាន ពេទ្យអាចមានជម្រើស ២ ទៀតដើម្បីបង្កើតកូន គឺ (១) ចាក់ថ្នាំជំនួយស្បូនឲ្យបើក និង (២) វះកាត់។
បើបែកទឹកភ្លោះមុនដល់ ២៤ ម៉ោង ស្ត្រីជាម្ដាយអាចងូតទឹកបាន តែចៀសវាងរួមភេទ ព្រោះអាចបង្កើនហានិភ័យចម្លងរោគទៅកាន់កូន បើទោះករណីនេះសឹងមិនអាចកើតឡើង ពេលដែលស្ត្រីកំពុងឈឺពោះ ហើយមានអារម្មណ៍ចង់រួមភេទ។
ករណីកូនមិនគ្រប់ខែ៖ បើបែកទឹកភ្លោះមុនគភ៌អាយុ ៣៧ សប្ដាហ៍ ប្រញាប់ទូរសព្ទ ឬទៅពេទ្យភ្លាម កុំបង្អង់។
ប្រុងប្រយ័ត្នបំផុត៖ ជាពិសេសពេលធ្វើដំណើរទៅមន្ទីរពេទ្យ (ពិសេសសម្រាប់ស្វាមី ឬបងប្អូនរួមដំណើរ) ត្រូវចាប់អារម្មណ៍លើទឹកភ្លោះ ព្រោះការបាត់បង់ទឹកភ្លោះច្រើនពេកអាចបណ្ដាលឲ្យប៉ះពាល់ទារកក្នុងផ្ទៃ។ បញ្ហាអាចកើតមានចំពោះទារក ប្រសិនបើពណ៌ទឹកភ្លោះប្រែទៅជាពណ៌បៃតងចាស់ ពណ៌ខ្មៅព្រឿងៗ ថែមទាំងក្លិនមិនល្អ (ស្អុយ) ឬក៏មានលាយឈាម ជាដើម។ ក្នុងករណីនេះ ទារកអាចឆ្លងមេរោគតាមរយៈទឹកភ្លោះមិនល្អនេះ។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម