ជំងឺសើស្បែកមួយប្រភេទនេះកើតលើទារក បណ្តាលមកពីអ្វី? មានរោគសញ្ញាអ្វីខ្លះ?

ជំងឺ​សើ​ស្បែក ​​Impetigo គឺ​ជា​ការ​បង្ក​រោគ​លើ​ស្បែក​ទូទៅ ដែល​បណ្តាល​ឲ្យ​មាន​ដំបៅ និង​ពង​បែក។ ភាគ​ច្រើន​ ជំងឺ​មួយ​នេះ​កើត​លើ​កុមារ និង​ទារក ដោយ​អាច​ឆ្លង​ពី​​កុមារ​​ម្នាក់​ទៅ​​កុមារ​ម្នាក់​ទៀត ព្រម​ទាំង​មាន​គ្រោះថ្នាក់​ខ្លាំង​ចំពោះ​ទារក​ទើប​កើត។ ក្នុង​ករណី​ដែល​ក្មេង​កើត​ជំងឺ​សើ​​ស្បែក​មួយ​​នេះ ប៉ា​ម៉ាក់​គួរ​តែ​​ឲ្យ​កូន​សម្រាក​ព្យាបាល​នៅ​ផ្ទះ រហូត​ដល់​រោគសញ្ញា​បាន​ជា​សះស្បើយ​ទាំង​ស្រុង។

រោគសញ្ញា​នៃ​ជំងឺ​សើ​ស្បែក​លើ​កុមារ និង​ទារក

​​ជំងឺ​សើ​ស្បែក ​​Impetigo អាច​បណ្តាល​ឲ្យ​មាន​ដំបៅ​នៅ​លើ​ស្បែក​ និង​​ពង​បែក​ដែល​លូតលាស់​យ៉ាង​ឆាប់​រហ័ស។ ជួនកាល​ ដំបៅ​ទាំង​នោះ​មាន​សភាព​រឹង ឬ​ទន់​ និង​រមាស់។ ជា​ទូទៅ ដំបៅ​លេច​ឡើង​នៅ​រយៈពេល​១​ថ្ងៃ ទៅ​៣​ថ្ងៃ​ បន្ទាប់​ពី​ឆ្លង​មេរោគ និង​អាច​ឆ្លង​​បាន​នៅ​ពេល​ដែល​មាន​សារធាតុ​រាវ​ហូរ​ចេញ​ពី​ដំបៅ​ទាំង​នោះ។ យ៉ាង​ណា​មិញ ការ​ចម្លង​រោគ​នឹង​ត្រូវ​បាន​បញ្ឈប់ នៅ​ពេល​ដែល​ដំបៅ​មាន​ក្រមរ ឬ​បន្ទាប់​ពី​ការ​ព្យាបាល​ដោយ​ប្រើ​ថ្នាំ​ផ្សះ​រយៈពេល​២៤​ម៉ោង។

រោគសញ្ញា​ផ្សេង​ទៀត រួម​មាន​ គ្រុន​ក្តៅ ហើម​កូន​កណ្តុរ ឬ​មាន​អារម្មណ៍​មិន​ស្រួល​ខ្លួន។

​មូលហេតុ​ដែល​នាំ​ឲ្យ​កើត​ជំងឺ​សើ​ស្បែក​​Impetigo

ជំងឺ​មួយ​នេះ កើត​ឡើង​បណ្តាល​មកពី​បាក់តេរី​ Staphylococcus ឬ ​Streptococcus ដែល​ជ្រាប​ចូល​ទៅ​ក្នុង​ស្បែក​ នៅ​ពេល​អេះ​ ឬ​ការ​របើក​ក្រមរ ឬ​សត្វ​ទិច។

ជា​ធម្មតា ជំងឺ​សើ​ស្បែក​​Impetigo​ច្រើន​តែ​កើត​លើ​កុមារ​តូច​ៗ ពីព្រោះ​ការ​ឆ្លង​មេរោគ​អាច​រាលដាល​នៅ​ក្នុង​បរិយាកាស​ដូចជា​សាលារៀន​ ឬ​មណ្ឌល​ថែទាំ​កុមារ។ ​

​យើង​អាច​បញ្ចៀស​ជំងឺ​សើ​ស្បែក​​Impetigo​ដោយ​របៀប​ណា?

​ដើម្បី​កាត់បន្ថយ​ហានិភ័យ​នៃ​ការ​រីក​រាលដាល​នៃ​ជំងឺ​សើ​ស្បែក​​Impetigo ប៉ា​ម៉ាក់​គួរ​ណែនាំ​ឲ្យ​កូន​អនុវត្តន៍​វិធីសាស្ត្រ​ខាង​ក្រោម​៖

• ជៀសវាង​ប៉ះពាល់​ដំបៅ
• លាង​សម្អាត​ដៃ​ជា​ទៀងទាត់ ជា​ពិសេស​ក្រោយ​ពេល​លាប​ក្រែម​ទៅ​លើ​ដំបៅ
• ជៀសវាង​ប្រើ​កន្សែង ឬ​កំណាត់​ជូត​មុខ​រួម​គ្នា។

អត្ថបទគួរអាន៖

• ក្មេង​កើត​អូទីស្សឹម​អាច​ព្យាបាល​ជា​ទេ?
• អូទីស្សឹម អាចជាមូលហេតុធ្វើឲ្យខ្លាញ់ល្អក្នុងឈាម HDL ធ្លាក់ចុះទាប
• អាហារ​ស្រីៗពពោះ​គួរញ៉ាំ និង​មិនគួរ​ញ៉ាំ​ ​ការ​ពារ​កូន​កុំឲ្យ​កើត​មកមាន​បញ្ហា​អូទីស្សឹម
• តិចនិក​សាមញ្ញ​ អាចជួយ​ក្មេងៗរើ​បម្រះ​ពី​ជំងឺ​អូទីស្សឹម​បាន
• ពិតទេ ក្មេងៗ​មើល​ទូរស័ព្ទយូរ អាច​កើត​អូទីស្សឹម?
• បើ​កូនកើត​​អូទីស្សឹម គួរយក​ទៅ​ព្យាបាល​នៅ​ពេទ្យ​ណា?

ការ​ព្យាបាល​ជំងឺ​សើ​ស្បែក​​Impetigo

• លាង​សម្អាត​ដំបៅ​ជាមួយ​នឹង​ទឹក​អំបិល (លាយ​អំបិល​មួយ​ស្លាបព្រា​កាហ្វេ​ទៅ​ក្នុង​ទឹក​ក្តៅ និង​ទុក​ឲ្យ​ត្រជាក់​) ចំនួន​២ ទៅ​៣​ដង​ក្នុង​មួយ​ថ្ងៃ រួច​ជូត​ឲ្យ​ស្ងួត សឹម​លាប​ក្រែម​ថ្នាំ​អង់ទីប៉្យូទិច តាម​ការ​ណែនាំ។
• គ្រប​ដំបៅ​ជាមួយ​នឹង​​បន្ទះ​បិទ​ដំបៅ​ដែល​មិន​ជ្រាប​ទឹក និង​មិន​មាន​រន្ធ។
• ជៀសវាង​អេះ​បរិវេណ​ដែល​ប៉ះពាល់ បើ​ទោះ​បី​ជា​មាន​អាការៈ​ក្រហាយ និង​រមាស់​។