ក្នុងសប្តាហ៍នេះដោយកម្ពុជានៅតែបន្តទទួលឥទ្ធិពលពីបាតុភូត អ៊ែល នីណូ (El Nino) ធ្វើឲ្យកម្តៅនឹងហក់ឡើង ៤០-៤១ អង្សារសេ។ អំឡុងអាកាសធាតុក្តៅខ្លាំងបែបនេះ ដើម្បីបង្ការកុំឲ្យកូនតូចងាយឆ្លងពពួកមេរោគ ឬបាត់តេរី ដែលធ្វើឲ្យរាករូស ក្អួត ខ្វះជាតិទឹកធ្ងន់ធ្ងរ ម៉ាក់ប៉ាអាចធ្វើតាមការណែនាំងាយៗខាងក្រោមនេះ៖

១- ឲ្យកូនញ៉ាំទឹកឲ្យបានច្រើន

ក្តៅខ្លាំង មិនថាក្មេង ឬចាស់ទេ ងាយនឹងខ្វះជាតិទឹក ដូច្នេះម៉ាក់ប៉ាត្រូវឲ្យកូនតូចញ៉ាំទឹកឆ្អិនឲ្យបានច្រើន មិនចាំទាល់តែកូនទារញ៉ាំនោះទេ។

២- កុំឲ្យកូនញ៉ាំភេសជ្ជៈកំប៉ុង

ក្មេងណាក៏ដូចក្មេងណាដែរ ចូលចិត្តណាស់ទឹកក្រូច-ទឹកផ្លែឈើកំប៉ុងផ្អែមៗ ប៉ុន្តែវាមិនល្អចំពោះពោះវៀនក្មេងនោះទេ ភេសជ្ជៈកំប៉ុងសម្បូរជាតិស្ករ-ហ្គាស អាចរាករូសលឿនណាស់។ យកល្អឲ្យកូនញ៉ាំទឹកផ្លែឈើស្រស់ ឬផ្លែឈើជំនួសវិញ ដូចជា ក្រូច ស្វាយ ឪឡឹក ប៉ោម ជាដើម។

៣- កុំឲ្យកូនញ៉ាំរបស់ត្រជាក់ខ្លាំង

មេឃកំពុងតែក្តៅខ្លាំង យើងបែរជាឲ្យកូនញ៉ាំរបស់ត្រជាក់ខ្លាំង ដូចជាទឹកកកឈូស ការ៉េម ច្បាស់ជា កូនតូចឈឺក ឈឺពោះ រាកផងក៏មាន។

អត្ថបទពាក់ព័ន្ធ៖ មូលហេតុទាំងនេះ ធ្វើឲ្យកូនតូចរាករូសញឹកញាប់ ម៉ាក់ប៉ាមិនត្រូវមើលរំលង

៤- កុំឲ្យកូនញ៉ាំផ្លែឈើផ្តេសផ្តាស

ផ្លែឈើមួយចំនួនមានជាតិគីមី ដូច្នេះហើយមុនឲ្យកូនញ៉ាំយើងត្រូវពិនិត្យ ចិតសំបកចេញ ឬលាងសម្អាតឲ្យបានស្អាត ដើម្បីបង្ការការពុល។

៥- លាងដៃកូនឲ្យស្អាត

ដៃមិនស្អាតយកទៅកាន់នំចំណីញ៉ាំជាមូលហេតុចម្បងធ្វើឲ្យអូនតូចរាក ឬក្អួត ដូច្នេះយើងត្រូវលាងសម្អាតដៃកូនជានិច្ចមុននឹងឲ្យកាន់នំចំណី។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ក្តៅ​កាន់​តែ​ខ្លាំង មក​​ដឹង​​ពី​​តិចនិក​​មិន​ឲ្យ​កូន​តូច​ៗ​​ទាស់​​​នំ​​ចំណី រាក-ក្អួត

ក្តៅកាន់តែខ្លាំង មកដឹងពីតិចនិកមិនឲ្យកូនតូចៗទាស់នំចំណី រាក-ក្អួត