កើតទឹកនោមផ្អែម! អាហារទាំងនេះល្អខ្លាំងសម្រាប់សុខភាព

គ្នាយើងក្មេងៗគ្មានជំងឺទឹកនោមផ្អែម ច្បាស់ជាមិនយល់អារម្មណ៍ប៉ាម៉ាក់ អ៊ំៗយើងទេ ប៉ុន្តែ “Hello គ្រូពេទ្យ” យល់ច្បាស់ ពិសេសការញ៉ាំតែម្តង។ ចង់ញ៉ាំអីក៏មិនបាន ខ្លាចនេះ ខ្លាចនោះ ប៉ះពាល់នេះ ប៉ះពាល់នោះ ពិបាកសឹងគ្រប់ពេល។ តែប្រាប់គាត់ឈប់បារម្ភទៅ ស្រលាញ់ប៉ាម៉ាក់ អ៊ំៗយើង ព្យាយាមណែនាំសាកល្បងអាហារពិសេសទាំងនេះ សម្បូរវីតាមីនណាស់ ធ្វើឲ្យសុខភាពពួកគាត់កាន់ល្អទៀតផង។

១- សណ្តែក

សណ្តែក មានសារធាតុចិញ្ចឹមជាច្រើន ដូចជា ជាតិសរសៃ ជាតិស្ករ កាបូអ៊ីដ្រាតស៊ាំញ៉ាំ (Complex Carbohydrate) និងប្រូតេអ៊ីន រ៉ែម៉ាញ៉េស្យ៉ូម និងប៉ូតាស្យ៉ូមទៀតផង។ យោងតាមអត្ថបទសុខភាពចុះផ្សាយរបស់សមាគមវេជ្ជសាស្ត្រអាមេរិក (Journal of the American Medical Association ) សណ្តែកអាចជួយឲ្យជាតិស្ករក្នុងឈាមចុះទាប ល្អចំពោះប៉ាម៉ាក់ មានទឹកនោមផ្អែមប្រភេទ ២។

ចង់គណនា BMR ចុចទីនេះ !

ចង់គណនា BMI ចុចទីនេះ !

ចង់គណនារង្វាស់ចង្វាក់បេះដូង ចុចទីនេះ !

ចង់ពិនិត្យសុខភាពប្រព័ន្ធរំលាយអាហារ ចុចទីនេះ !

២- បន្លែគ្មានជាតិស្ករ

បន្លែគ្មានជាតិស្ករ មាន បន្លែពណ៌បៃតង បន្លែស្លឹក ម្រេចជាដើម ជាអាហារមានសារធាតុស្ករកាបូអ៊ីដ្រាតទាប និងជួយប៉ាម៉ាក់ អ៊ំៗឆាប់បាត់ឃ្លាន ដោយសារជាតិសរសៃច្រើន បង្កើនវីតាមីន សារធាតុរ៉ែ និង Phytochemicals (សារធាតុគីមីអាចប្រឆាំងជំងឺ) ជាហេតុអាចជួយសម្រកទម្ងន់ រក្សាកម្រិតជាតិស្ករក្នុងឈាមបានល្អ។ ប៉ាម៉ាក់ អ៊ំៗ អាចញ៉ាំអាហារប្រភេទនេះតាមសប្បាយ ញ៉ាំច្រើនប៉ុណ្ណា ល្អប៉ុណ្ណឹង ហើយអាចច្នៃជាមុខម្ហូបឆ្ងាញ់ៗថែមទៀតផង។

៣- ផ្លែឈើជូរៗ

ផ្លែឈើជូរៗ ដូចជា ក្រូចខ្វិច ក្រូច ទំពាំងបាយជូរ ក្រូចឆ្មារ និងក្រូចលឿង សុទ្ធតែផ្តល់សារធាតុសរសៃច្រើន ញ៉ាំទាំងសាច់ដើម្បីទទួលបានសារធាតុសរសៃគ្រប់គ្រាន់ និងអាចបន្ថយកត្តាប្រឈមជាមួយជំងឺទឹកនោមផ្អែម។

៤- ផ្លែប៊ឺរី

ផ្លែស្រ្តប៊ឺរី និងប្លូប៊ឺរី ជាប្រភពស្ករធម្មជាតិដ៏ល្អ និងជាតិសរសៃ បើលាយជាមួយយ៉ាអួរ ឬក្រឡុក រឹតតែឆ្ងាញ់។

អត្ថបទគួរអាន៖

៥- ផ្លែប៉េងប៉ោះ

អាចញ៉ាំឆៅ ឬកិនឲ្យម៉ដ្ឋ ស្ងោរ និងធ្វើជាទឹកជ្រលក់ក៏បាន។ ប៉ាម៉ាក់ ញ៉ាំបែបណាក៏ដោយ នៅតែទទួលបានវីតាមីន A C E និងជាតិដែកដូចគ្នា។ ផ្លែប៉េងប៉ោះ អាចកាត់បន្ថយកត្តាប្រឈមកើតមហារីក ពិសេសមហារីក្រពេញប្រូស្តាត (សម្រាប់ប្រុសៗ) និងជំងឺបេះដូង។

៦- ខ្លាញ់ត្រី

អាស៊ីដអូមេហ្គា ៣ ក្នុងត្រីសាលម៉ុង និងត្រីផ្សេងៗ កាត់បន្ថយកើតជំងឺបេះដូង ពិសេសជំងឺសរសៃឈាមបេះដូងដែលកើតឡើងដោយសារទឹកនោមផ្អែម។ ពពួកត្រីទឹកត្រជាក់សម្បូរវីតាមីន D និងសារធាតុសេលេញ៉ូម (Selenium) ល្អសម្រាប់សក់ ស្បែក និងក្រចក គ្មានជាតិស្ករ អាចរក្សាលំនឹងជាតិស្ករក្នុងឈាមបានល្អ។ តែបើញ៉ាំខ្លាញ់ច្រើនពេក ក៏មិនល្អដែរ ចឹងគួរញ៉ាំសាច់ត្រីឲ្យបានច្រើន ខ្លាញ់ត្រីញ៉ាំល្មមបានហើយ។

៧- ស្រូវសាឡី

សម្បូរជាតិសរសៃខ្ពស់ និងមិនមានសារធាតុស្ករកាបូអ៊ីដ្រាត ហេតុនេះបើប៉ាម៉ាក់ អ៊ំៗចង់កាត់បន្ថយជាតិស្ករ ស្រូវសាឡីអាចជាអាហារស័ក្ដិសមបំផុត។ ស្រូវសាឡីខ្លះ មានសារធាតុចិញ្ចឹមល្អៗ ដូចជា ម៉ាញ៉េស្យ៉ូម ក្រូម៉្ញូម ប៉ូតាស្យ៉ូម និងវីតាមីន B9 (Folate)។

ស្វែងយល់បន្ថែមតាមរយៈវីដេអូខាងក្រោម៖

៨- គ្រាប់ធញ្ញជាតិ

ដូចខ្លាញ់ត្រី គ្រាប់ធញ្ញជាតិផ្តល់នូវខ្លាញ់ល្អសម្រាប់សុខភាព និងបន្ថយភាពស្រេកឃ្លាន សម្បូររ៉ែម៉ាញ៉េស្យ៉ូម និងជាតិសរសៃផងដែរ។ គ្រាប់ Walnuts និងគ្រាប់ Flaxseeds សម្បូរអាស៊ីដអូមេហ្គា ៣ អាចញ៉ាំច្រើនដងក្នុងមួយថ្ងៃ មិនធ្វើឲ្យឡើងកម្រិតជាតិស្ករក្នុងឈាមនោះទេ។

៩- ផលិតផលទឹកដោះគោគ្មានខ្លាញ់

ផលិតផលពីទឹកដោះគោ សម្បូរវីតាមីន D និងកាល់ស្យ៉ូម ជួយឆ្អឹង និងធ្មេញរឹងមាំ បន្ថយហានិភ័យកើតទឹកនោមផ្អែមរហូតដល់ ៩ ភាគរយ។ តែគ្នាយើង ឬប៉ាម៉ាក់ កំពុងប្រឈមមុខកើតទឹកនោមផ្អែម គួរញ៉ាំទឹកដោះគោគ្មានជាតិខ្លាញ់ (Skim milk) និងយ៉ាអួរ (Yogurt) បានហើយ។

ទាំងនេះសុទ្ធតែជាអាហារដែលល្អ អាចជួយគ្រប់គ្រងជាតិស្ករក្នុងឈាមបានល្អ ខណៈតម្លៃមានច្រើនជម្រើស ងាយរកតាមហាងទំនិញ និងទីផ្សារនានា។

ចំណុចសំខាន់

អាហារទាំងនេះល្អខ្លាំងចំពោះអ្នកកើតជំងឺទឹកនោមផ្អែម៖

សណ្តែក
បន្លែគ្មានជាតិស្ករ
ផ្លែឈើជូរៗ
ផ្លែប៊ឺរី
ផ្លែប៉េងប៉ោះ
ខ្លាញ់ត្រី
ស្រូវសាឡី
គ្រាប់ធញ្ញជាតិ
ផលិតផលទឹកដោះគោគ្មានខ្លាញ់

កើតទឹក​នោម​ផ្អែម! អាហារ​ទាំង​នេះល្អ​ខ្លាំងសម្រាប់សុខភាព