មហារីក ជាជំងឺដែលកោសិកាខុសប្រក្រតីលូតលាស់មិនអាចគ្រប់គ្រងបាន និងមានលទ្ធភាពរាលដាលទៅដល់ជាលិកាផ្សេងៗទៀត។ កោសិកាមហារីក អាចរាលដាលទៅកាន់ផ្នែកផ្សេងទៀតនៃរាងកាយ តាមរយៈឈាម និងប្រព័ន្ធទឹករងៃ ដែលប្រព័ន្ធនេះជួយកម្ចាត់ជាតិពុលពីក្នុងរាងកាយ។ ជំងឺមហារីកកើតពីការជក់បារី ឬស្រូបផ្សែងបារី ត្រូវគេដឹងថាជាប្រភេទជំងឺដែលអាចការពារបាន ដោយគ្រាន់តែឈប់ជក់បារី ឬកុំជក់បារី។ សារធាតុគីមីក្នុងផ្សែងបារី អាចបង្កគ្រោះថ្នាក់ដល់សុខភាព និងបង្កជាជំងឺមហារីកផ្សេងៗ។
សារធាតុគីមីក្នុងផ្សែងបារីគ្រោះថ្នាក់ណាស់ បង្កជាមហារីកច្រើនប្រភេទ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ជំងឺមហារីកមានជាង១០០ប្រភេទផ្សេងគ្នា ហើយឈ្មោះជំងឺមហារីកមួយៗហៅតាមប្រភេទសរីរាង្គដែលកើតមហារីក ឬកោសិកាដែលកើតមហារីក ដូចជាជំងឺមហារីកសួត កើតនៅលើសួត និងជំងឺមហារីកប្រអប់សំឡេង កើតលើប្រអប់សំឡេង។
១. រោគសញ្ញាជំងឺមហារីក
រោគសញ្ញាជំងឺមហារីកអាចមានដូចជា៖
- ឡើងរឹង ឬឡើងកូនកណ្ដុរនៅផ្នែកណាមួយនៃរាងកាយ
- ឡើង ឬស្រកទម្ងន់ដោយគ្មានមូលហេតុច្បាស់លាស់
- មានការឈឺចាប់ ដែលមិនជាសះស្បើយ
- ក្អកមិនបាត់
- ពិបាកលេបអាហារ
- មិនស្រួលខ្លួនក្រោយញ៉ាំអាហារ
- បត់ជើងតូច ឬបត់ជើងធំប្រែប្រួល
- មានធ្លាក់ឈមខុសប្រក្រតី
- មានអារម្មណ៍ខ្សោយ ឬអស់កម្លាំង
២. ជក់បារីទាក់ទងនឹងមហារីកបែបណា?
ជក់បារីអាចបង្កឲ្យមានជំងឺមហារីក ហើយសារធាតុនៅក្នុងបារីអាចរារាំងរាងកាយមិនឲ្យប្រឆាំងនឹងមហារីក។ នៅក្នុងផ្សែងបារីគេជឿថាអាចមានសារធាតុគីមីជាង៥ ០០០ប្រភេទ និងអាចមានគ្រោះថ្នាក់ដល់សុខភាព ហើយក្នុងចំណោមនោះគេដឹងច្បាស់ថាមានយ៉ាងតិច៧០ប្រភេទ អាចបង្កជាជំងឺមហារីក។
- សារធាតុពុលក្នុងផ្សែងបារី អាចធ្វើឲ្យប្រព័ន្ធភាពស៊ាំចុះខ្សោយ ធ្វើឲ្យពិបាកក្នុងការប្រឆាំង ឬសម្លាប់កោសិកាមហារីក។ ពេលបញ្ហាបែបនេះកើតឡើង កោសិកាមហារីក អាចបន្តលូតលាស់បានដោយគ្មានការរំខាន។
- សារធាតុពុលក្នុងថ្នាំជក់ អាចបំផ្លាញ ឬផ្លាស់ប្ដូរDNAរបស់កោសិកា។ DNA ជាភ្នាក់ងារត្រួតពិនិត្យរបស់កោសិកា ដែលគ្រប់គ្រងលើការលូតលាស់ និងដំណើរការរបស់កោសិកាធម្មតា។ នៅពេលដែល DNA ត្រូវបំផ្លាញ កោសិកាចាប់ផ្ដើមលូតលាស់មិនអាចគ្រប់គ្រងបាន និងបង្កើតបានជាដុំសាច់មហារីក។
ក្រុមគ្រូពេទ្យបានដឹងជាច្រើនឆ្នាំមកហើយថាការជក់បារីជាមូលហេតុបង្កឲ្យមានជំងឺមហារីកសួត។ រឿងនេះ នៅតែជាការពិតរហូតមកពេលនេះ មានមនុស្សស្លាប់ដោយសារជំងឺមហារីកសួតជិត៩នាក់ក្នុងចំណោម១០នាក់ កើតចេញពីការជក់បារី ឬស្រូបផ្សេងបារី។ ការសិក្សាខ្លះបញ្ជាក់ថាអ្នកជក់បារីបច្ចុប្បន្នមានហានិភ័យកើតជំងឺមហារីកសួតខ្ពស់ជាងអ្នកជក់បារីក្នុងទសវត្សឆ្នាំ១៩៦០ទៅទៀត។ ហេតុផលអាចមកពីការផ្លាស់ប្ដូរវិធីផលិតបារី និងសារធាតុគីមីដែលគេប្រើនៅក្នុងបារី។
នៅសហរដ្ឋអាមេរិកអ្នកស្រូបផ្សេងបារី ច្រើនជាង៧ ៣០០នាក់បានស្លាប់ជារៀងរាល់ឆ្នាំដោយសារតែជំងឺមហារីកសួត។
៣. ជក់បារីបង្កជាជំងឺមហារីកផ្សេងៗទៀត
ការជក់បារី អាចបង្កជាជំងឺមហារីកជាច្រើនផ្សេងទៀត ស្ទើរតែពាសពេញរាងកាយ។ ជំងឺមហារីកទាំងនោះរួមមាន ជំងឺមហារីកឈាម មហារីកប្លោកនោម មហារីកមាត់ស្បូន មហារីកពោះវៀនធំ មហារីកបំពង់អាហារ មហារីកថ្លើម មហារីកបំពង់សំឡេង មហារីកមាត់ និងបំពង់ក មហារីកលំពែង និងមហារីកក្រពះជាដើម។
សម្រាប់អ្នកចុកថ្នាំ (ទំពាថ្នាំជក់) វិញក៏អាចប្រឈមនឹងជំងឺមហារីកបំពង់អាហារ មហារីកមាត់ និងបំពង់ក និងជំងឺមហារីកលំពែងដែរ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម