គ្នាយើងតែងតែមានតម្រូវការរបបអាហារខុសៗគ្នា ប៉ុន្តែរបបអាហារដែលសម្បូរទៅដោយសាច់ច្រើនពេកក៏មិនល្អចំពោះសុខភាពយើងដែរ។ ការញ៉ាំសាច់ច្រើនអាចលេចចេញនូវផលវិបាកមួយចំនួនដែរ ហើយប្រសិនបើគ្នាយើងសម្គាល់ឃើញសញ្ញាមួយចំនួនដូចខាងក្រោមនេះ គួរកាត់បន្ថយការញ៉ាំសាច់ហើយ។
អ្នកចូលចិត្តញាំសាច់ច្រើន គួរដឹងរឿងទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
មានអ្វីកើតឡើងប្រសិនបើគ្នាយើងញាំសាច់ច្រើន?
មានមតិខុសៗគ្នាជាច្រើន អំពីការញ៉ាំសាច់ល្អ ឬអាក្រក់សម្រាប់សុខភាព។ ចម្លើយត្រឹមត្រូវក៏នៅតែមានភាពស្រពិចស្រពិលខណៈអ្នកជំនាញខ្លះអះអាងថាការញ៉ាំសាច់ច្រើនពេកអាចធ្វើឲ្យមានហានិភ័យអាក្រក់ចំពោះសុខភាព។
១.អាចមានអារម្មណ៍ងងុយគេង
ប្រូតេអ៊ីនមានមុខងារក្នុងការផ្ដល់ថាមពល ដូច្នេះគ្នាយើងអាចនឹងភ្ញាក់ផ្អើលនៅពេលឮថារបបអាហារមានសាច់ច្រើនធ្វើឱ្យយើងបែរជាងងុយគេង។ នៅពេលដែលប្រូតេអ៊ីននៅក្នុងខ្លួនយូរ ដោយសារតែក្ររំលាយ នោះរាងកាយនឹងមិនបំបែកកាបូអ៊ីដ្រាតទៅជាគ្លុយកូសគ្រប់គ្រាន់សម្រាប់បង្កើនថាមពលនោះទេ។ ដោយសារតែដំណើរការបង្កើនថាមពលយឺតយ៉ាវ នោះវាអាចធ្វើឲ្យយើងបាត់បង់ការផ្ចង់អារម្មណ៍ និងធ្វើឲ្យអស់កម្លាំង។
២.ធ្វើឲ្យសក់និងស្បែកមានសុខភាពមិនសូវល្អ
គ្នាយើងដែលចូលចិត្តញ៉ាំសាច់ច្រើនជាងបន្លែអាច នឹងមានបញ្ហាដល់សុខភាព សក់ ក៏ដូចជាសុខភាពស្បែក ព្រោះថាក្នុងសាច់ កម្រមានវីតាមីន C ប្រសិនបើគ្នាយើងញាំសាច់ច្រើនជាងបន្លែ នោះអាចនិងខ្វះសារធាតុ ខូឡាជែន។ ខូឡាជែន ជាប្រូតេអ៊ីនដែលផ្ដល់ទម្រង់ដល់ ស្បែក សក់ ក្រចក ឆ្អឹង និងអ្វីៗជាច្រើនផ្សេងទៀត។ អ្នកជំនាញផ្នែកអាហារូបត្ថម្ភបាននិយាយថា ប្រសិនបើយើងខ្វះសារធាតុ ខូឡាជែន នោះ ស្បែកយើងអាចជាគ្រើម និងមានកន្ទួល ចំពោះសក់អាចធ្វើឲ្យមានការជ្រុះច្រើន ហើយមានការលូតលាស់យឺត។
៣.ឈឺញឹកញាប់
ស្បែករបស់យើងមិនមែនជាកន្លែងតែមួយដែលនឹងឃើញពីកង្វះវីតាមីន C នោះទេ ចំពោះបញ្ហាសុខភាពក៏ត្រូវការវីតាមីននេះដែរ។ ប្រសិនបើគ្នាយើងញាំសាច់ច្រើនជាង បន្លែ នោះរាងកាយយើងនិងពិបាកក្នុងការរំលាយសាច់បានត្រឹមត្រូវ ដែលជាមូលហេតុអាចបង្កឲ្យមាន ចង្អោរ ក្អួត និងអស់កម្លាំងបន្ទាប់ពីញ៉ាំសាច់រួច។ គ្នាយើងក៏អាចជួបប្រទះនឹងការបាត់បង់សាច់ដុំ បញ្ហាប្រព័ន្ធភាពស៊ាំ និងថ្លើមផងដែរ។
៤.ពិបាកក្នុងការបន្ទោរបង់
សាច់ភាគច្រើនមិនសូវសម្បូរជាតិសរសៃទេ។ ជាធម្មតាជាតិសរសៃទទួលបានពី ផ្លែឈើ បន្លែ និងធញ្ញជាតិ។ ការទល់លាមក និងការឈឺចាប់ពេលបន្ទោបង់ ជាសញ្ញាដំបូងដែលគ្នាយើងខ្វះនូវជាតិសរសៃ។
៥.មានគ្រោះថ្នាក់ដល់បេះដូង
អត្ថប្រយោជន៍មួយទៀតនៃជាតិសរសៃ គឺជួយឲ្យរាងកាយយើងស្រូបយក កូលេស្តេរ៉ូល ហើយអាចការពារបេះដូងរបស់យើងបាន។ ប្រសិនបើគ្នាយើងញាំសាច់ច្រើនដូចជា សាច់ក្រហម និងសាច់កែច្នៃ នោះអាចធ្វើឲ្យបេះដូងយើងកាន់តែមានបញ្ហាអាក្រក់ទៅៗ។ ប្រភេទសាច់ទាំងនោះមានខ្លាញ់ឆ្អែតខ្ពស់ ដែលតាមការស្រាវជ្រាវបានបង្ហាញថា សាច់អាចបង្កើន កូលេស្តេរ៉ូល អាក្រក់ LDL ហើយបង្កើនហានិភ័យជា ជំងឺបេះដូង។
៦.បង្កឲ្យមានក្រួសក្នុងតម្រងនោម
ប្រូតេអ៊ីនច្រើនពេកអាចប៉ះពាល់ដល់តម្រងនោមរបស់យើង។ ជាពិសេស ប្រូតេអ៊ីនមាននៅក្នុងសាច់ ដែលពោរពេញទៅដោយសារធាតុ purines បំបែកទៅជា អាស៊ីតអ៊ុយរិច។ ដោយ អាស៊ីតអ៊ុយរិក ច្រើនពេកអាចបង្កើនហានិភ័យជាក្រួសក្នុងតម្រងនោមបាន។ ប្រសិនបើយើងមានប្រវត្តិគ្រួសារមានបញ្ហាតម្រងនោម នោះត្រូវប្រយ័ត្នក្នុងការញាំអាហារ។
៧.បង្កើនហានិភ័យនៃជំងឺមហារីកពោះវៀនធំ
ការសិក្សាបានបង្ហាញថា ការញាំសាច់ក្រហមច្រើន អាចបង្កើនឱកាសនៃជំងឺមហារីកពោះវៀនធំ។ របាយការណ៍ឆ្នាំ ២០១៨ របបអាហារ អាហារូបត្ថម្ភ សកម្មភាពរាងកាយ និងជំងឺមហារីកបានរកឃើញថា ការញាំសាច់ក្រហមច្រើនជាង ៥០០ ក្រាម ក្នុងមួយសប្ដាហ៍អាចបង្កើនហានិភ័យនៃជំងឺមហារីកពោះវៀនធំបាន។
ចំពោះគ្នាយើងដែលចូលចិត្តញាំសាច់ច្រើនជាង បន្លែ និងផ្លែ គួរតែមានការកាត់បន្ថយជាតិសាច់ ដើម្បីទទួលបាននូវសុខភាពល្អ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម