ខ្លាញ់ដែលសេសសល់ពីចៀន បំពង យកទៅធ្វើអាហារទៀត ហើយបើនៅសេសសល់បន្តទៀត ក៏បន្តទុកទៅថ្ងៃក្រោយ ព្រោះគិតថាធ្វើបែបនេះចំណេញ។ តែជាតិប្រេងចាស់ បូករួមនឹងកម្ទេចកំទីសាច់ អាចប្រតិកម្មជាមួយខ្ទះ ឬឆ្នាំងដែកយប់ថ្ងៃៗ នឹងបង្កទៅជាសារធាតុពុល ដែលធ្វើឲ្យយើងបរិភោគទៅ កើតជាជំងឺផ្សេងៗ ដូចជាមហារីកពោះវៀន មហារីកថ្លើម និងបញ្ហាប្រព័ន្ធរំលាយអាហារ។ មិនតែប៉ុណ្ណោះប្រេងពុះច្រើនម៉ោង និងច្រើនសាចុះឡើងៗ ធ្វើឲ្យកើនបរិមាណជាតិខ្លាញ់បំប្លែង (trans) ហើយពេលញ៉ាំយូរៗទៅ នាំឲ្យមានជំងឺបេះដូង ដូចជាស្ទះសរសៃឈាមបេះដូង ខ្លាញ់រុំបេះដូងជាដើម។
ម្ចាស់សេវាកម្មថែទាំមនុស្សចាស់តាមគេហដ្ឋានរូបនោះបន្ថែមទៀតថា បើគិតគូរពីសុខភាពមែនត្រូវចម្អិនអាហារដោយខ្លួនឯង ទើបមិនសូវប្រឈមមុខនឹងជំងឺកាចសាហាវ ព្រោះយើងលាងសម្អាតបានល្អ និងជ្រើសរើសរបស់ស្រស់ ព្រមទាំងគ្រឿងផ្សំមានគុណភាព មិនហួសកាលបរិច្ឆេទ។