ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ការគេងលើកជើងផ្អែកជញ្ជាំងប៉ះពាល់ដោយផ្ទាល់ដល់ប្រព័ន្ធសរសៃប្រសាទ និងធ្វើឱ្យអារម្មណ៍យើងស្ងប់ភ្លាមៗ។ ក្នុងអំឡុងពេលធ្វើលំហាត់នេះ យើងអាចដក់ដង្ហើមវែងៗដើម្បីទទួលបានលទ្ធផលទ្វេដង ព្រោះការដកដង្ហើមបានវែងៗអាចកាត់បន្ថយអត្រាចង្វាក់បេះដូងលោតដែលជួយឱ្យយើងបន្ធូរអារម្មណ៍ កាត់បន្ថយការថប់បារម្ភ ភាពតានតឹងបានយ៉ាងមានប្រសិទ្ធភាព។
ការគេងលើកជើងផ្អែកជញ្ជាំងអាចជួយសន្ធឹងសរសៃពួរនៅភ្លៅខាងក្រោយដែលនឹងជួយបំបាត់អាការៈចុករួយស្រពន់ជើង បន្ទាប់ពីការធ្វើដំណើររយៈពេលវែង ការឈរ ឬអង្គុយនៅមួយកន្លែងពេញមួយថ្ងៃ។
កាលណាត្រគាករបស់យើងកាន់តែខិតទៅជិតជញ្ជាំង សរសៃពួរនៅភ្លៅខាងក្រោយរបស់យើងនឹងសន្ធឹងកាន់តែវែងដែរ។
ចង់គណនារង្វាស់ចង្វាក់បេះដូង ចុចទីនេះ!
ការធ្វើលំហាត់ប្រាណបែបនេះ អាចជួយកាត់បន្ថយអាការៈហើមជើងដោយជួយបង្ហូរសារធាតុរាវដែលចាល់ក្នុងជើងមករាងកាយវិញ។ លើសពីនេះទៅទៀត ទំនាញផែនដីជួយឱ្យឈាមហូរត្រឡប់ទៅបេះដូងវិញបានល្អដែលនឹងជួយបង្កើនចលនាឈាមរត់ក្នុងខ្លួនរបស់យើង។
ការគេងលើកជើងផ្អែកជញ្ចាំងអាចជួយសម្រួលចរន្តឈាមក្នុងពោះ និងកាត់បន្ថយការសង្កត់ទៅលើក្រពះ និងពោះវៀនដែល ការសង្កត់នេះប៉ះពាល់ដល់ការរំលាយអាហាររបស់យើង និងធ្វើឱ្យយើងហើមពោះ ច្រាល់ទឹកអាស៊ីដក្រពះ និងទល់លាមក។
ការគេងលើកជើងផ្អែកជញ្ជាំងជាប្រចាំអាចរួមចំណែកកាត់បន្ថយអាការៈការឈឺក្បាលធម្មតា និងឈឺក្បាលប្រកាំង ព្រោះការលើកជើងឡើងលើអាចជំរុញរំហូរឈាមត្រលប់ទៅកាន់បេះដូង និងបង្កើនចលនាឈាមរត់ក្នុងខ្លួនដែលធ្វើឱ្យរាងកាយយើងទទួលបានអុកស៊ីសែនគ្រប់គ្រាន់។
យើងអាចអង្គុយនៅលើកម្រាលហាត់យូហ្កា ហើយចំហៀងខ្លួនខាងធ្វេងរបស់យើងត្រូវជាប់នឹងជញ្ជាំង។ បន្ទាប់មកគេងលើកម្រាល លើកជើងទាំងពីរផ្អែកជាប់នឹងជញ្ជាំងដោយយកដៃជួយបង្វិលខ្លួន រួចរំកិលគូទរបស់យើងឱ្យជិតជញ្ជាំងតាមដែលអាចធ្វើបាន។
ជាចុងក្រោយ យើងត្រូវបន្ធូរសាច់ដុំទាំងអស់នៅលើរាងកាយយើង បិទភ្នែក ដាក់ដៃនៅលើពោះ ឬនៅលើឥដ្ឋ និងដកដង្ហើមវែងៗ។ យើងត្រូវស្ថិតនៅក្នុងឥរិយាបទនេះឱ្យបានយូរតាមដែលអាចធ្វើទៅបានប្រហែលជា ១០ ទៅ ១៥ នាទី។
ដើម្បីឈប់ហាត់លំហាត់នេះយើងត្រូវទាញជង្គង់របស់យើងដាក់លើទ្រូង រួចហើយរមៀលខ្លួនទៅចំហៀងខ្លួន។ បន្ទាប់មកសម្រាកមួយសន្ទុះ រួចក្រោកឡើងអង្គុយយឺតៗ។ ជាចុងក្រោយ យើងត្រូវរលាស់ជើងទាំងពីរដើម្បីជួយសម្រួលរំហូរឈាម។
យើងអាចដាក់ទ្រនាប់នៅក្រោមត្រគាក ក្រោមកដើម្បីឱ្យស្រួលខ្លួន និងពាក់ស្រោមជើងក្រាស់ដើម្បីការពារការឈឺកែងជើង។ បន្ទាប់ពីហាត់លំហាត់នេះរួច យើងគួរចៀសវាងញុំាអាហារក្នុងរយៈពេល ២០ នាទី ឬចៀសវាងហាត់លំហាត់នេះបន្ទាប់ពីញុំាអាហាររួច។
ការគេងលើកជើងផ្អែកជញ្ជាំងអាចជួយឱ្យយើងមានសុខភាពល្អ តែអ្នកមានជំងឺពុកឆ្អឹង ដក់ទឹកក្នុងភ្នែក លើសសម្ពាធឈាម ស្រ្តីពពោះ ឬកំពុងមករដូវមិនអាចហាត់លំហាត់នេះបានទេ។
អត្ថបទគួរអាន៖
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម
