គ្នាយើងមួយចំនួនអាចនឹងងើបពីគេងមកមុខឡើងហើម ប៉ុន្តែនេះមិនមែនជារឿងគួរឲ្យបារម្ភទេ។ យើងអាចបន្ធូរអាការៈហើមមុខនេះបានដោយខ្លួនឯងតាមវិធីងាយៗ។
១. លាងមុខនឹងទឹកត្រជាក់
ការលាងមុខនឹងទឹកត្រជាក់អាចជួយបន្ថយការហើមបាន។ សម្រាប់សាប៊ូលាងមុខយកល្អគួរប្រើសាប៊ូដែលមិនមានបន្ថែមក្លិន និងមិនមានផ្ទុកអាល់កុល ម៉ង់តុល ឬស៊ុលហ្វាតដើម្បីបង្ការការរលាកបន្ថែម។ ម៉្យាងទៀតងូតទឹកនឹងទឹកត្រជាក់ល្អជាងទឹកក្ដៅឧណ្ហៗព្រោះទឹកក្ដៅអាចធ្វើឲ្យមុខកាន់តែហើម។
២. ស្អំទឹកកក
យើងអាចយកទឹកកកដាក់ក្នុងកន្សែងនឹងយកមកស្អំនឹងមុខ។ ការស្អំទឹកកកអាចជួយបន្ថយការហើមបាន។
៣. ម៉ាស្សាថ្នមៗនៅលើមុខ
យើងអាចម៉ាស្សាមុខរបស់យើងរយៈពេល១នាទីដោយប្រើម្រាមដៃ២តប់ថ្នមៗនៅឆ្អឹងថ្ពាល់ក្រោមភ្នែក ចំហៀងភ្នែក និងសៀតផ្ការបស់យើង។ បន្ទាប់មកម៉ាស្សាថ្នមៗនៅថ្ពាល់ជិតឆ្អឹងថ្គាមជាចលនារង្វង់រយៈពេល៣០ទៅ៦០វិនាទី។
៤. គេងឲ្យបាន៧ទៅ៩ម៉ោង
ការគេងមិនគ្រប់គ្រាន់អាចបណ្ដាលឲ្យហើមមុខ និងភ្នែក ដូចនេះគួរសម្រាកឲ្យគ្រប់គ្រាន់។ យើងគួរព្យាយាមចូលគេង និងក្រោកពីគេងឲ្យទៀងទាត់ម៉ោងរាល់ថ្ងៃ និងបន្ធូរអារម្មណ៍រយៈពេលពីរម៉ោងមុនចូលគេងដើម្បីឲ្យគុណភាពនៃដំណេកកាន់តែល្អ។
៥. គេងដោយលើកក្បាលឲ្យខ្ពស់
ការគេងបែបនេះអាចជួយការពារមិនឲ្យមុខហើមនៅពេលព្រឹកព្រោះអាចបន្ថយបរិមាណទឹកដែលមកផ្តុំនៅនឹងមុខ និងជុំវិញភ្នែកពេលយើងកំពុងគេងបាន។ យើងអាចប្រើខ្នើយបន្ថែមដើម្បីឲ្យក្បាល និងកខ្ពស់ជាងមុន។
៦. ផឹកទឹកឲ្យបានច្រើន
ក្នុងមួយថ្ងៃគួរផឹកទឹកឲ្យបានចន្លោះ ១,៤ទៅ១,៩លីត្រ។ បន្ថែមពីនេះយើងអាចផឹកទឹកដោះគោ ទឹកផ្លែឈើ តែរុក្ខជាតិ និងភេសជ្ជៈកីឡា។ ការរក្សាជាតិទឹកក្នុងរាងកាយអាចបង្ការការចាល់ទឹកក្នុងរាងកាយបានព្រោះនៅពេលយើងបាត់បង់ជាតិទឹក កោសិការបស់យើងនឹងព្យាយាមស្តុកជាតិទឹកដែលអាចបង្កឲ្យមានអាការៈហើម។ បន្លែ និងផ្លែឈើក៏ជួយបំពេញជាតិទឹកដល់រាងកាយដែរ។
៧. ហាត់ប្រាណ
ការហាត់ប្រាណ៣០នាទីរាល់ថ្ងៃមិនត្រឹមតែសំខាន់សម្រាប់សុខភាពទេ នៅអាចជួយគ្រប់គ្រងការចាល់ទឹកក្នុងរាងកាយបានទៀត។ យើងអាចដើរហាត់ប្រាណ រត់ ជិះកង់ ហែលទឹក ឬលើកទម្ងន់ជាដើម។
៨. បន្ថយការញ៉ាំអាហារមានជាតិប្រៃ
ជាទូទៅ យើងគួរកំណត់ការញ៉ាំអំបិលត្រឹមតែ ២,៣ក្រាមក្នុងមួយថ្ងៃ។ សម្រាប់អ្នកមានសម្ពាធឈាមខ្ពស់ ជំងឺទឹកនោមផ្អែម ឬបញ្ហាសុខភាពផ្សេងៗ គួរកំណត់ការញ៉ាំអំបិលត្រឹមតែ ១,៥ក្រាមក្នុងមួយថ្ងៃប៉ុណ្ណោះ។ ម៉្យាងទៀតគួរចៀសវាងអាហារសម្រន់ដែលមានជាតិប្រៃដូចជានំដំឡូងកញ្ចប់ និងការប្រើប្រាស់អំបិលក្នុងអាហារដោយងាកមកប្រើគ្រឿងទេស និងទឹកក្រូចឆ្មារជំនួសវិញ។
៩. កាត់បន្ថយគ្រឿងស្រវឹង
សម្រាប់បុរសគួរបន្ថយការផឹកគ្រឿងស្រវឹងមកត្រឹម១ទៅ២កែវក្នុងមួយថ្ងៃ និងសម្រាប់ស្ត្រី១កែវក្នុងមួយថ្ងៃ។ ដោយគ្រឿងស្រវឹងអាចបង្កឲ្យមានការបាត់បង់ជាតិទឹក យើងគួរផឹកទឹកបន្ថែមនៅពេលផឹកគ្រឿងស្រវឹង។
គួរបញ្ជាក់ដែរថាប្រសិនជាយើងហើមមុខជាមួយនឹងអាការៈផ្សេងទៀតដូចជាការឈឺចាប់ ក្រហម ក្រហាយ រលាក គ្រុនក្ដៅ ឬពិបាកដកដង្ហើម គួរទៅពិគ្រោះជាមួយគ្រូពេទ្យព្រោះនេះអាចមកពីបញ្ហាសុខភាពផ្សេងៗ។
អត្ថបទពាក់ព័ន្ធ៖
- អ្នកមានគំនិតសុទិដ្ឋិនិយម គេងលក់ស្រួល ហើយអាយុវែង
- ញ៉ាំពពួកបន្លែផ្លែឈើទាំងនេះ ល្អជាងខូឡាជែនកំប៉ុងទៀត
- វិធីធ្វើម៉ាសបិទមុខនៅផ្ទះខ្លួនឯង សម្រាប់ស្បែក ៦ ប្រភេទផ្សេងគ្នា
- ខ្វះជាតិដែកមិនត្រឹមប៉ះពាល់សុខភាពទេ សម្រស់ក៏អន់ថយទៅតាមនោះដែរ!
- បើចេះតែរមាស់ស្បែកមិនដឹងមូលហេតុ អាចបណ្ដាលមកពីជំងឺមួយប្រភេទនេះ
- ស្បែកស្ងួតបណ្ដាលមកពីកត្តាទាំងនេះ តើត្រូវដោះស្រាយបែបណា?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-heart-rate]
