លំពែងជាសរីរាង្គមួយដែលមានមុខងារសំខាន់ពីរយ៉ាង គឺជួយដល់ការរំលាយអាហារ និងផលិតអ័រម៉ូនដែលជួយគ្រប់គ្រងកម្រិតថាមពលក្នុងឈាម។ ប្រសិនបើលំពែងមិនផលិតអង់ស៊ីមរំលាយអាហារ នោះរាងកាយក៏មិនអាចស្រួបយកអាហារបានត្រឹមត្រូវដែរ។ ជាលទ្ធផល វានឹងធ្វើឲ្យយើងស្រកទម្ងន់ និងរាករូស។
មួយវិញទៀត បណ្តុំកោសិកាលំពែង ក៏មានតួនាទីជួយគ្រប់គ្រងជាតិស្ករក្នុងឈាម។ នៅពេលដែលការផលិតអាំងស៊ុយលីនតិចពេក វានឹងបង្កើនហានិភ័យនៃជំងឺទឹកនោមផ្អែម។ យ៉ាងណាមិញ គ្នាយើងអាចសង្កេតមើលសញ្ញាព្រមានមួយចំនួន ដែលបញ្ជាក់ថាលំពែងដំណើរការមិនប្រក្រតី។
១. លាមកប្រែពណ៌
ពិតណាស់ លំពែងផលិតអង់ស៊ីមដែលជួយរាងកាយក្នុងការស្រូបយកវីតាមីនរលាយក្នុងខ្លាញ់ ដូចជាវីតាមីនA, E និងK។ ក្នុងករណីដែលយើងសង្កេតឃើញលាមកអណ្ដែត និងមានពណ៌ស្រាល វាអាចជាសញ្ញានៃការស្រូបយកសារធាតុចិញ្ចឹមមិនបានល្អ។
២. ជំងឺទឹកនោមផ្អែមប្រភេទ២
ជាមួយគ្នានេះដែរ លំពែងផលិតអ័រម៉ូនដែលគ្រប់គ្រងការផលិតអាំងស៊ុយលីននៃរាងកាយ ក៏ដូចជាកម្រិតជាតិស្ករក្នុងឈាម។ ដូច្នេះហើយ ប្រសិនបើលំពែងមិនដំណើរការ នោះយើងអាចនឹងកើតជំងឺទឹកនោមផ្អែមប្រភេទ២។
៣. ចង្អោរ និងក្អួត
ដោយសារតែលំពែងផលិតអ័រម៉ូនដែលបំបែកខ្លាញ់ វាអាចប៉ះពាល់ដល់មុខងាររំលាយជាតិខ្លាញ់នៅក្នុងរាងកាយ ដែលនាំឲ្យយើងកើតមានអាការៈចង្អោរ ប្រសិនបើលំពែងដំណើរការមិនប្រក្រតី។
៤. ឈឺពោះ
អាការៈឈឺពោះជារោគសញ្ញាទូទៅមួយនៃជំងឺរលាកលំពែងស្រួចស្រាល់ និងជំងឺមហារីកលំពែង។ ការឈឺចាប់ដោយសារតែជំងឺរលាកលំពែងស្រួចស្រាល់ គឺឈឺចាប់ភ្លាមៗ និងខ្លាំងនៅចំកណ្ដាលពោះ។
៥. ស្រកទម្ងន់
ប្រសិនបើគ្នាយើងប្រឈមនឹងការឈឺចាប់ត្រង់បរិវេណពោះ អមដោយការស្រកទម្ងន់ វាអាចជាសញ្ញានៃជំងឺមហារីកលំពែង។ បញ្ហាក្រពេញទីរ៉ូអ៊ីតក៏អាចបណ្ដាលឲ្យយើងស្រកទម្ងន់ដូចគ្នា។ ដូចនេះហើយ ក្នុងករណីស្រកទម្ងន់ដោយពុំមានមូលហេតុ យើងគប្បីពិគ្រោះយោបល់ជាមួយនឹងគ្រូពេទ្យជំនាញ ទើបជាការប្រសើរ ដើម្បីធ្វើរោគវិនិច្ឆ័យ ក៏ដូចជាធ្វើការព្យាបាលឲ្យទាន់ពេលវេលា។
[embed-health-tool-bmr]
