ពិតណាស់ ដោយសារតែជំងឺកូវីដ-១៩នៅតែបន្តកើតឡើងឥតឈប់ឈរ គ្នាយើងគប្បីយកចិត្តទុកដាក់ឲ្យបានដិតដល់ចំពោះសុខភាពប្រព័ន្ធផ្លូវដង្ហើម។ ជាក់ស្ដែង មានជំងឺប្រព័ន្ធផ្លូវដង្ហើមធ្ងន់ធ្ងរជាច្រើន ដែលប៉ះពាល់ដល់សុខភាពរបស់យើងដូចជាជំងឺរលាកសួត ជំងឺមហារីកសួត និងជំងឺស្ទះសួតរ៉ាំរ៉ៃ ។
មូលហេតុបង្កជំងឺផ្លូវដង្ហើមទូទៅ
១. ជំងឺហឺត
ជំងឺផ្លូវដង្ហើមរ៉ាំរ៉ៃនេះបណ្ដាលឲ្យពិបាកដង្ហើម ដោយសារតែផ្លូវដង្ហើមរលាក។ រោគសញ្ញាទូទៅនៃជំងឺហឺត រួមមានក្អកស្ងួត កណ្ដាស់ តឹងទ្រូង និងដកដង្ហើមខ្លីៗ។ ភាគច្រើន ជំងឺនេះចាប់ផ្ដើមកើតឡើងនៅវ័យកុមារ ប៉ុន្តែវាក៏អាចកើតនៅពេលដែលយើងពេញវ័យផងដែរ។ អាលែកហ្ស៊ី ការបំពុល និងការឆ្លងមេរោគសុទ្ធតែជាភ្នាក់ងារបង្កជំងឺនេះ។
២. ជំងឺស្ទះផ្លូវដង្ហើមរ៉ាំរ៉ៃ
ជាមួយគ្នានេះដែរ ជំងឺនេះត្រូវបានប្រើប្រាស់សម្រាប់ជំងឺផ្លូវដង្ហើមជាច្រើនប្រភេទដែលពាក់ព័ន្ធនឹងការស្ទះចរន្តខ្យល់ និងបញ្ហាដែលទាក់ទងនឹងការដកដង្ហើម។ ជំងឺស្ទះផ្លូវដង្ហើមរ៉ាំរ៉ៃនេះត្រូវបានផ្សារភ្ជាប់ជាមួយនឹងការជក់បារី ឬការប៉ះពាល់នឹងផ្សែងបារី។ រោគសញ្ញាទូទៅ រួមមានកណ្ដាស់ ហៀរសំបោរ ក្អក និងពិបាកដកដង្ហើម។
៣. ជំងឺមហារីកសួត
ជំងឺមហារីកដ៏គ្រោះថ្នាក់មួយនេះ អាចកើតឡើងនៅផ្នែកណាមួយនៃសួត។ រោគសញ្ញាត្រូវការចំណាយពេលយូរឆ្នាំក្នុងការវិវត្ត ហើយរោគសញ្ញាទូទៅភាគច្រើនមានដូចជាក្អករ៉ាំរ៉ៃ សំឡេងស្អក ពិបាកដកដង្ហើម ។ ដូចទៅនឹងជំងឺស្ទះដង្ហើមរ៉ាំរ៉ៃដែរ ជំងឺនេះមានទំនាក់ទំនងនឹងការជក់បារី ឬការស្រូបយកផ្សែងបារី។ វាអាចកើតឡើងដោយការប៉ះពាល់ទៅនឹងរ៉ាដុង (ធាតុវិទ្យុសកម្មម្យ៉ាង) ប្រេងម៉ាស៊ូត ឬការបំពុល។
៤. ជំងឺរលាកសួត
ចំណែកឯជំងឺនេះវិញ កើតឡើងមកពីការបង្ករោគនៅក្នុងថង់ខ្យល់នៅក្នុងសួត ដោយពពួកបាក់តេរី វីរុស ឬផ្សិត។ ជំងឺនេះកើតឡើងជាញឹកញាប់ចំពោះកុមារ ឬមនុស្សពេញវ័យ។ អាការៈទូទៅនៃជំងឺនេះមានដូចជាគ្រុនក្ដៅ ក្អក និងពិបាកដង្ហើម។
តិចនិកទាំង៤ជួយឲ្យសួតមានសុខភាពល្អ
១. ជៀសវាងប៉ះពាល់នឹងផ្សែងបារី
មិនថាយើងជក់បារី ឬស្រូបយកផ្សែងបារីឡើយ គឺសុទ្ធតែអាចបណ្ដាលឲ្យកើតជំងឺប្រព័ន្ធផ្លូវដង្ហើមជាច្រើនប្រភេទ។ ហេតុនេះហើយ យើងគប្បីបញ្ឈប់ការជក់បារី ឬប៉ះពាល់នឹងផ្សែងបារី ទើបជាការប្រសើរ។
២. ធ្វើលំហាត់ប្រាណ
សកម្មភាពរាងកាយដើរតួនាទីយ៉ាងសំខាន់នៅក្នុងការថែទាំសុខភាពផ្លូវដង្ហើម។ ការដើរ ហែលទឹក រត់ ឬជិះកង់សុទ្ធតែអាចជួយពង្រឹងសមត្ថភាពសួតរបស់យើងបានយ៉ាងប្រសិទ្ធភាព។ លំហាត់ប្រាណទាំងនេះអាចជួយផ្លាស់ទីអុកស៊ីសែនទៅពាសពេញរាងកាយបានយ៉ាងប្រសើរ។
៣. ជៀសវាងពីការបំពុល
មិនថាយើងនៅក្នុងផ្ទះ ឬខាងក្រៅផ្ទះឡើយ ចូរប្រុងប្រយ័ត្នចំពោះជាតិពុលផ្សេងៗដែលស្រូបយកទៅក្នុងរាងកាយតាមរយៈការដង្ហើម។ ជាតិពុល សារធាតុគីមី សម្ភារៈលាងសម្អាត និងវិទ្យុសកម្មសុទ្ធតែជាកត្តាដែលនាំឲ្យគុណភាពខ្យល់អន់ថយ។
៤. ចាក់វ៉ាក់សាំងបង្ការ
ទន្ទឹមនឹងនេះដែរ ការចាក់វ៉ាក់សាំងបង្ការជំងឺផ្ដាសាយជារៀងរាល់ឆ្នាំ អាចជួយឲ្យសួតរបស់យើងមានសុខភាពល្អ។ ជាធម្មតា មនុស្សចាស់ចាប់ពីអាយុ៦៥ឆ្នាំ ឬលើសពីនេះ គប្បីចាក់វ៉ាក់សាំងប្រភេទនេះ។
[embed-health-tool-vaccination-tool]
