ស្រីៗភាគច្រើនប្រាថ្នាចង់បានស្បែកសខ្ចី ម្ល៉ោះហើយអ្នកដែលមានស្បែកខ្មៅស្រអាប់ បានជ្រើសរើសការលាបម្សៅ ឬឡេលាយ។ តើម្សៅ ឬឡេលាយផ្សំឡើងពីអីខ្លះ បានជាលាបទៅមានប្រសិទ្ធភាពលឿន?

បើតាមការលើកឡើងរបស់លោកវេជ្ជបណ្ឌិត ហេង យូសេង បម្រើការងារនៅផ្នែកជំងឺស្បែក នៃមន្ទីរពេទ្យព្រះកុសុមៈ ម្សៅ និងឡេលាយភាគច្រើន លាយតាមតៗគ្នា មិនមានក្បួនខ្នាត ឬរូបមន្តអីច្បាស់លាស់នោះទេ ឯរបៀបនៃការលាយនោះ គឺទិញម្សៅ និងឡេពីផ្សារមកជាមួយថ្នាំពេទ្យ មានដូចជា ម៉ៃដា ព្រួញបី ត្រចៀកកាំ និងពពួកស្តេរ៉យ (ថ្នាំបំបាត់ការរលាក)។

ត្បិតការលាបឡេលាយ មានប្រសិទ្ធភាពធ្វើស្បែកមុខ ដៃជើង ដងខ្លួន ប្រែទៅជាស ក្នុងរយៈខ្លី តែលោកវេជ្ជបណ្ឌិតថា ការលាបឡេលាយគ្មានរូបមន្តអីច្បាស់នោះ ធ្វើឲ្យស្បែក និងសុខភាពយើងរងផលប៉ះពាល់ទៅថ្ងៃក្រោយ។

“ប្រើឡេលាយផលប៉ះពាល់មិនមែនលេចចេញភ្លាមៗទេ ប្រើពេលយ៉ាងតិចពី ១-២ ខែ អាហ្នឹងយើងអាចចាត់ជារយៈពេលខ្លីហើយ។ អ្នកខ្លះគាត់ប្រើដំបូងអ៊ីចឹងទៅ មុខសស្អាត ប៉ុន្តែមានសម្គាល់អត់បន្ទាប់ពីប្រើមួយរយៈ មុខយើងប្រែជាស្តើង ចេញសរសៃក្រហមៗ ប៉ុន្តែពេលយើងខាន ឬឈប់ប្រើវា ស្រាប់តែផ្ទៃមុខយើងឡើងរមាស់ ខ្មៅស្រអាប់ ឡើងមុន ប៉ុន្តែមុននោះមិនមានគ្រាប់ទេ គ្រាន់តែក្រហមកន្ទួលៗ’។ លោកវេជ្ជបណ្ឌិតរៀបរាប់។

ចំពោះអ្នកដែលប្រើម្សៅលាយរយៈពេលយូរវិញ ស្បែកមុខកាន់តែស្តើងទៅៗ ងាយនឹងជាំមុខ មានជំងឺមុនមុខក្រហម មានរលាកស្បែកនៅជុំវិញមាត់ជាដើម។ ប៉ុន្តែបើយើងប្រើឡេលាយលាបលើដងខ្លួន ដៃជើង ដែលមានផ្ទៃធំវិញ អាចទៅជាបែកសង្វារ អាចធ្វើឲ្យជាតិគីមីជ្រាបចូលទៅក្នុងឈាមដោយមិនដឹងខ្លួន ទៅជាខ្សោយតម្រងនោម កើតជំងឺទឹកនោម លើសឈាម ឬស្ពោតឆ្អឹងជាដើម។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ដឹងអត់ ម្សៅ ឬឡេលាយផ្សំពីអីខ្លះ បានលាបទៅមានប្រសិទ្ធភាពលឿនម្ល៉េះ?