១- តើអ្វីជាទឹកដោះដំបូង (Colostrum)?
ទឹកដោះដំបូង (Colostrum) គឺជាទឹកដោះដំបូងបំផុត ដែលផលិតចេញពីសុដន់របស់ស្ត្រី ក្នុងអំឡុងពេលពពោះ។ ពេលខ្លះមនុស្សស្រី មិនបានចាប់អារម្មណ៍សង្កេតឃើញទឹកដោះនេះទេ រហូតដល់សម្រាលកូនទើបឃើញ។ ការពិតទៅទឹកដោះដំបូងនោះ ផលិតក្នុងបរិមាណតិចតួចប៉ុណ្ណោះ ដែលវាសម្បូរទៅដោយអង់ទីករ និងពពួក immunoglobulins ដែលដើរតួជាអ្នកការពារទារកទើបកើតពីបាក់តេរី និងវីរុស ហើយវាក៏ទៅភ្ញោចឲ្យទារកជុះលាមកដំបូងដែលហៅថាលាមកព្រៃ( meconium) ដែរ។
២- តើទឹកដោះដំបូងមានផលប្រយោជន៍អ្វីខ្លះ?
ក្រពះរបស់ទារកទើបកើត មានសភាពខ្សោយ និងងាយរងគ្រោះថ្នាក់ណាស់។ ដូចនេះទឹកដោះដំបូង គឺល្អបំផុតសម្រាប់ឲ្យទារកអាចរំលាយក្នុងក្រពះបានស្រួល។ ទឹកដោះដំបូងនេះ ក៏ជួយឲ្យប្រព័ន្ធរំលាយអាហារទើបដំណើរការ ត្រៀមខ្លួនជាមួយទឹកដោះធម្មតា ដែលនឹងផលិតក្នុងពេលដ៏ខ្លីខាងមុខ។
ទឹកដោះដំបូង គឺពោរពេញទៅដោយគ្រាប់ឈាមស ដែលមានមុខងារទៅប្រឆាំងជាមួយបាក់តេរី និងការចម្លងរោគដោយវីរុស។ ក្មេងដែលបានបៅទឺកដោះដំបូង មិនងាយកើតជំងឺរលាកសួត រលាកផ្លូវដង្ហើម រលាកក្រពះពោះវៀន ឬរលាកក្នុងត្រចៀកឡើយ។ ក្រោយកើតបានមួយរយៈក្រោយមក ទារកចាប់ផ្ដើមផលិតអង់ទីករដោយខ្លួនឯង។ មួយវិញទៀតទឹកដោះដំបូង ក៏ជួយកម្ចាត់ប៊ីលីរ៉ូប៊ីន (bilirubin) និងការពារកុំឲ្យទារកកើតជំងឺខាន់លឿងដែរ។
អត្ថបទពាក់ព័ន្ធ:
- បំបៅដោះកូន បើម៉ាក់ៗញ៉ាំអាហារឆៅអាចប៉ះពាល់អីខ្លះ?
- ម៉ាក់ៗបំបៅដោះកូន អាចញ៉ាំថ្នាំ Gluta ឲ្យស្បែកសបានអត់?
- ធ្លាប់វះកាត់ដើមទ្រូង អាចមានបញ្ហាដល់ការបំបៅដោះកូនទេ?
- ម៉ាក់ៗទើបកូនដំបូង! ដឹងថា DHA សំខាន់ប៉ុនណាអត់ ពេលបំបៅដោះកូន?
- ហេតុផលធំៗបញ្ជាក់ថា ថ្នាំវីតាមីនសំខាន់ខ្លាំងប៉ុនណាសម្រាប់ស្រីៗបំបៅដោះកូន
ទឹកដោះដំបូង ជួយដល់ប្រព័ន្ធក្រពះពោះវៀនរបស់ទារក និងការពារមិនឲ្យសារធាតុមិនល្អជ្រៀបចូលក្នុងខ្លួនទារកតាមរយៈអាហារ ដែលម៉ាក់បានទទួលទាន។
គេក៏ជឿដែរថា ទឹកដោះដំបូងជួយកាត់បន្ថយអត្រានៃការកើតជំងឺ Alzheimer’s Disease (អ្នកជំងឺអាចភ្លេចភ្លាំងនៃដំណាក់កាលណាមួយក្នុងជីវិត) និងការចម្លងរោគមួយចំនួន។ ទឹកដោះដំបូងក៏ជួយពង្រឹងរាង្គកាយ និងជួយឲ្យសរីរាង្គក្នុងខ្លួនកាន់តែរឹងមាំ។ ទឹកដោះដំបូងកាន់តែមានប្រសិទ្ធភាពខ្ពស់ បើទទួលទាននៅពេលដងខ្លួនកំពុងមានសកម្មភាពខ្លាំង។ អ្នកស្រាវជ្រាវបានលើកឡើងដែរថា ទឹកដោះដំបូងអាចជួយការពារក្មេងពីជំងឺផ្ដាសាយបានដែរ។
៣- តើម៉ាក់ៗនឹងអស់ទឹកដោះដំបូងនៅពេលណា?
ទឹកដោះដំបូង នឹងវិវត្ដប្រែទៅជាទឹកដោះធម្មតាបន្ទាប់ពីរយៈពេល ប៉ុន្មានសប្ដាហ៍ក្រោយសម្រាល។ ក្នុងអំឡុងពេលនោះ បរិមាណរបស់អង់ទីករចាប់ផ្ដើមថយចុះ ប៉ុន្តែបរិមាណទឹកដោះនឹងកើនឡើង។ រឿងដែលល្អនោះគឺ នៅក្នុងទឹកដោះធម្មតានៅតែមានសារធាតុដើរតួប្រឆាំងជាមួយជំងឺនៅឡើយ។ ដូចនេះបើទារកបៅទឹកដោះរបស់ម៉ាក់ៗបានកាត់តែច្រើន ការទទួលបានប្រព័ន្ធការពាររាងកាយក៏កាន់តែខ្ពស់ដែរ។
ទោះបីជាក្រុមហ៊ុនផលិតទឹកដោះសម្រាប់ទារក ព្យាយាមជំនួសទឹកដោះដំបូងដោយសារធាតុដទៃក្ដី ប៉ុន្តែគេមិនអាចបង្កើតសារធាតុមានប្រយោជន៍ឲ្យបានដូចគ្នាទៅនឹងសារធាតុមានក្នុងទឹកដោះម្ដាយបានឡើយ។ ដូចនេះហើយ ទោះជាយ៉ាងណាក្ដី ម៉ាក់ៗគ្រប់រូបគួរតែព្យាយាមបំបៅដោះកូនឲ្យបានច្រើន យ៉ាងហោចណាស់ក៏បានប៉ុន្មានសប្ដាហ៍ដំបូងដែរ ព្រោះក្នុងរយៈពេលនោះ ទារកអាចទទួលបានសារធាតុល្អៗ សម្រាប់ខ្លួនបានយ៉ាងច្រើន។
[embed-health-tool-vaccination-tool]
