បើនិយាយពីបញ្ហាក្បាលមូល ឬសំប៉ែតម៉ាក់ៗប្រាកដជាយកចិត្តទុកដាក់ខ្លាំង ពិសេសអ្នកមានកូនស្រីតែម្ដង ព្រោះកូនណាមានទម្រង់ក្បាលមូលមើលទៅស្អាត។ ដូចនេះហើយម៉ាក់ៗមានបទពិសោធន៍ថែទាំកូនបានក្បាលមូលស្អាតល្អនឹងចូលខ្លួនមកចែករំលែកវិធីជួយឲ្យក្បាលមូលស្អាត។
១- ដេកផ្អៀង
ម៉ាក់ៗ ចេន ចានី អ្នករស់នៅទីក្រុងភ្នំពេញបានឲ្យដឹងថា អ្នកនាងមិនដែលឲ្យកូនគេងផ្ងារឡើយ គឺគេងផ្អៀង ឬផ្កាប់មុខរហូត ដើម្បីមិនឲ្យផ្នែកខាងក្រោយរងសម្ពាធ ឬដេកផ្ទាល់ទៅនឹងគ្រែ។ អ្នកម៉ាក់កូន ២ បានបន្តទៀតថា ពេលបៅគឺខ្លួនអង្គុយ ហើយកម្របំបៅដេកណាស់ ហើយបើបែងចែកពេលវេលាគេងរបស់កូនឲ្យបានត្រឹមត្រូវ ក្រោយកូនភ្ញាក់ពីគេង ក៏មិនទម្លាប់ឲ្យដេកលេងរហូតដែរ គឺលើកមកបីលេង កុំឲ្យក្បាលប៉ះជាប់ទៅនឹងផ្ទៃរាបស្មើច្រើនពេក បើទោះជាមានខ្នើយកើយក៏ដោយ។ មួយវិញទៀត ការគេងរបស់កូនត្រូវតែផ្អៀងតាំងពីកើតភ្លាម ដោយឆ្លាស់គ្នាមួយថ្ងៃផ្អៀងឆ្វេង ស្អែកឡើងផ្អៀងស្ដាំ រហូតដល់កូនអាយុ ៣ ឆ្នាំឡើង ឆ្អឹងក្បាលចាប់ផ្ដើមរឹងមាំ លែងក្រពិតទៀតហើយ។
២- កំណត់របៀបគេងរបស់កូន
ស លីដា ដែលទៅរស់នៅប្រទេសបារាំងបានឲ្យដឹងថា កូនទាំង ៤ នាក់របស់អ្នកនាងមានតែម្នាក់ប៉ុណ្ណោះក្បាលសំប៉ែត ព្រោះជាកូនដំបូងមិនបានដឹងពីរបៀបដាក់ឲ្យកូនដេកត្រឹមត្រូវ ទើបកូនទៅជាបែបនោះ។ កូនក្រោយៗទៀតអ្នកម៉ាក់វ័យ ៣៤ ឆ្នាំរូបនេះ បានទៅប្រឹក្សាជាមួយអ្នកជំនាញ គេក៏ប្រាប់ឲ្យដាក់កូនគេងផ្អៀង បើកូនមិនចេះ ត្រូវយកខ្នើយតូចៗមកកល់ ដើម្បីឲ្យគេទម្លាប់គេងបែបនោះ ហើយត្រូវយកកូនខ្នើយមួយទៀតមកដាក់ឲ្យកូនឱប ដើម្បីទល់លំនឹងខ្លួន ហើយអាចគេងលក់ស្កប់ស្កល់។ អ្នកជំនាញផ្នែកកុមារនៅបារាំងបានណែនាំ លីដា ឲ្យកូនគេងទាល់តែធំ ចាំបណ្ដោយឲ្យគេងតាមបែបចិត្តចង់របស់គេ។ មួយវិញទៀតយើងអាចទិញខ្នើយសម្រាប់ទារក ដែលមានប្រហោងក្នុងអាចឲ្យក្បាលផ្នែកខាងក្រោយធ្លាក់ចុះទៅក្រោម នាំឲ្យទម្រង់ក្បាលមូលល្អបានដូចគ្នា ប្រសិនបើយើងគ្មានពេលតំរែតម្រង់ក្បាលកូនពេលគេង។
៣- ត្រូវគេងឆ្លាស់ខាងគ្នា
អ្នកនាង តែន មករា បានឲ្យដឹងថា បើចង់កូនគេងផ្អៀងឆ្លាស់គ្នាសងខាង យើងត្រូវគេងឆ្លាស់ខាងគ្នាទៅវិញទៅមកដែរ។ មានន័យថា ម្ដងគេងខាងឆ្វេងដៃកូន ស្អែកឡើងទៅគេងខាងស្ដាំវិញ ព្រោះកូនភាគច្រើនគេងបែរមុខរកមកម៉ាក់ បើយើងគេងនៅតែមួយកន្លែងកូនផ្អៀងតែមួយចំហៀង បែបនេះក្បាល និងមុខប្រាកដជាវៀចមិនខាន។ មួយវិញទៀតកន្លែងកូនគេងត្រូវតែមានកម្រាលទន់ៗ ព្រោះពេលក្បាលកូនធ្លាក់ពីខ្នើយក៏មិនប៉ះទង្គិច នាំឲ្យមានការឈឺចាប់ ហើយរឿងសំខាន់មួយទៀតបើចង់ឲ្យកូនគេងផ្កាប់មុខ មិនត្រូវមានភួយ ឬខ្នើយនៅក្បែរឡើយ ដើម្បីចៀសវាងថប់ដង្ហើមកូន។
អត្ថបទពាក់ព័ន្ធ៖
- បើកូនកើតមកវៀចក មានផលប៉ះពាល់អីអត់?
- គួរយកកូនស្រីទៅចោះក្រវិល នៅវ័យណាទើបល្អ?
- របៀបថែទាំកូនកើតមិនគ្រប់ខែ ឲ្យមានសុខភាពល្អ
- កូនកើតមកមានជាប់សៗដូចម្សៅជាអ្វី? ល្អ ឬអាក្រក់?
- ពេលទារកមានបញ្ហាស្បែក ម៉ាក់ៗគួរធ្វើបែបណាទើបល្អ?
- ក្មេងជាប់គល់អណ្ដាត បើមិនបានកាត់ រងផលប៉ះពាល់ទាំងនេះ
- ក្មេងអាយុក្រោម២ឆ្នាំ ហាមដាច់ខាតប្រើប្រេងកូឡា-ប្រេងរឹតគ្រប់ប្រភេទ
- ថែទាំកូន
[embed-health-tool-vaccination-tool]
