លោកវេជ្ជបណ្ឌិតឯកទេសជំងឺមហារីក និងឈាម រូបនេះបានបន្តថា ចំនួនគ្រាប់ឈាមសឡើងតិចតួច ត្រឹម២០ពាន់ មិនចោទជាបញ្ហានោះទេ ហើយក៏មិនមែនមានន័យថា យើងកើតជំងឺមហារីកឈាមដែរ។ ការកើតឡើងបរិមាណគ្រាប់ឈាមសពេលនេះ ដោយសារតែមានមេរោគ ឬបាក់តេរី ចូលឈ្លានពានខ្លួនយើង ហើយខួរឆ្អឹងយើងក៏ផលិតគ្រាប់ឈាមសច្រើន ដើម្បីទប់ទល់ជាមួយនឹងពពួកបាក់តេរី និងមេរោគទាំងនោះ។
ផ្ទុយទៅវិញ បើគ្រាប់ឈាមសដែលកើនឡើងច្រើនខ្លាំង លើសពី១០០ពាន់ លោកវេជ្ជបណ្ឌិតបញ្ជាក់ថា យើងកើតជំងឺមហារីកឈាមហើយ។ ពេលមានជំងឺមហារីកឈាមស មានន័យថាខួរឆ្អឹងមិនអាចបង្កើតកោសិកាឈាមក្រហម និងប្លាកែតបានគ្រប់គ្រាន់ ដើម្បីផ្គត់ផ្គង់តម្រូវការរាងកាយនោះឡើយ។