ជាម៉ាក់ប៉ា ជាបងៗ គ្មានអ្វីត្រូវខ្មាសអៀន ពន្យល់មីអូនយើងឲ្យដឹងពីជំងឺមហារីកមាត់ស្បូតនោះទេ ព្រោះវាជាជំងឺកាចសាហាវបំផុតសម្រាប់ស្រីៗ។ ទោះជាមីអូន នៅតូច ឬទើបឈានចូលវ័យជំទង់ក្តី ក៏ត្រូវឲ្យដឹងដែរ ទោះពេលខ្លះរឿងនេះពិបាកពន្យល់យ៉ាងណា គួរតែព្យាយាម។ “Hello គ្រូពេទ្យ” នៅឈរខាងម៉ាក់ប៉ាជានិច្ច ហើយខាងក្រោយនេះជាវិធីសាស្ត្រខ្លះៗ អាចជួយម៉ាក់ប៉ា ងាយពន្យល់មីអូនរឿងនេះ។
១- និយាយដូចធម្មតា
ចំពោះក្មេងៗ ជំងឺមហារីកអាចគួរឲ្យខ្លាចសម្រាប់គេ ប៉ុន្តែអ្វីសំខាន់ម៉ាក់ប៉ា គួរតែចាំថា ព្យាយាមនិយាយជាមួយមីអូនដូចធម្មតា តាមតែអាចធ្វើទៅបាន។ កុំយកអ្វីស្មុគស្មាញទៅពន្យល់ប្រាប់មីអូន និយាយអ្វីបានកើតឡើងដោយសាមញ្ញ និងស្មោះត្រង់។ ដំបូងបង្អស់ ម៉ាក់ប៉ា ត្រូវប្រាប់ និងព្យាយាមពន្យល់អ្វីជាជំងឺមហារីក។
២- ស្មោះត្រង់
វិធីសាស្ត្រនិយាយជាមួយកូនៗ ក្នុងនាមជាប៉ាម៉ាក់ល្អ ត្រូវតែស្មោះត្រង់ ព្រោះគ្រប់យ៉ាងកូនៗទទួលពីយើង នឹងក្លាយជាបទពិសោធន៍សម្រាប់ជីវិតទៅថ្ងៃមុខ។ អ៊ីចឹងហើយ ម៉ាក់ប៉ាត្រូវពន្យល់ និងប្រាកដថាមីអូនអាចយល់។ ហាមលាក់ព័ត៌មាន ទោះបីជាពាក្យមហារីក អាចធ្វើឲ្យមីអូនព្រួយបារម្ភក៏ដោយ បើយើងគិតថាមីអូនអាចយល់ច្បាស់ គួរតែប្រាប់ពីកោសិកាមិនប្រក្រតីទាំងនោះ ដែលធម្មតាលូតលាស់លឿន ជាងកោសិកាប្រក្រតីក្នុងខ្លួនយើង។ ព័ត៌មានកាន់តែត្រឹមត្រូវធ្វើឲ្យការភ័ន្តច្រលំកាន់តែតិច។
៣- រើសពេលល្អ
កត្តាសំខាន់បំផុត គឺការជ្រើសយកពេលវេលា និងទីកន្លែងត្រឹមត្រូវ ដើម្បីនិយាយជាមួយមីអូន។ ម៉ាក់ប៉ា ត្រូវជ្រើសយកពេលណាមួយដែលមីអូនចង់ស្តាប់ និងមានអារម្មណ៍រីករាយ។
រៀបចំបរិយាកាសល្អមួយ អាចការពារមីអូន ចៀសផុតពីការភ័យខ្លាច និងទុក្ខព្រួយ ពិសេសបើកូនៗយើងបង្ហាញទឹកមុខមិនសប្បាយចិត្ត ឬខកចិត្ត ម៉ាក់ប៉ាត្រូវយល់ និងស្តាប់ហេតុផលនាំឲ្យមីអូនព្រួយបារម្ភ។
៤- ត្រូវមានគំនិតវិជ្ជមានជាមួយកូនៗ
ក្មេងៗភាគច្រើន ងាយប៉ះពាល់ផ្លូវចិត្តដោយសារអារម្មណ៍របស់មនុស្សធំ អ៊ីចឹងត្រូវបង្ហាញពីគំនិតវិជ្ជមានទៅលើកូនៗយើង ឲ្យមីអូនដឹងថាម៉ាក់ប៉ា នៅក្បែរខ្លួនមីអូនជានិច្ច។ ចៀសវាងការសន្យាតែធ្វើមិនបាន ព្រោះក្មេងៗភាគច្រើន ចង់ឃើញមនុស្សជាទីស្រលាញ់ ពិសេសម៉ាក់ប៉ា ព្យាយាមធ្វើអ្វីគ្រប់យ៉ាងដើម្បីជីវិតកាន់តែប្រសើរ។
៥- ដឹងពីវិធីនិយាយជាមួយកូនៗតាមវ័យ
បើមីអូនក្រោម ៦ឆ្នាំ ពេលខ្លះអាចមិនទាន់យល់អ្វីបានកើតឡើងនោះទេ ត្រូវធ្វើឲ្យកូនៗយើងមានអារម្មណ៍ផាសុកភាព និងបង្ហាញឲ្យឃើញថាអ្វីៗមិនបានផ្លាស់ប្តូរនោះឡើយ។
មីអូនអាយុ ៦-១២ ឆ្នាំ អាចដឹង និងយល់ពីផលប៉ះពាល់របស់ជំងឺមហារីក។ ហេតុនេះត្រូវពន្យល់គាត់ប្រាប់គាត់ដោយសាមញ្ញ និងស្មោះត្រង់ កុំព្យាយាមធ្វើឲ្យកូនៗមានអារម្មណ៍រំជួលខ្លាំង ជាមួយព័ត៌មានទាំងនោះឲ្យសោះ។
បើមីអូនឈានចូលវ័យជំទង់ អាចជារឿងពិបាក សម្រាប់ម៉ាក់ប៉ា និយាយជាមួយបន្តិច ពិបាកសង្កេតមើលអារម្មណ៍ និងឥរិយាបថរបស់កូនៗ ហេតុនេះត្រូវនិយាយជាមួយមីអូនដោយអារម្មណ៍វិជ្ជមាន និងចាស់ទុំ ពន្យល់គាត់ឲ្យជួយដល់អ្នកដទៃទៀតក្នុងករណីចាំបាច់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
