ស្រីៗពពោះចង់ឲ្យខួរក្បាលកូនឆ្លាត ភ្នែកភ្លឺ កុំភ្លេចញ៉ាំសារធាតុបំប៉នដ៏សំខាន់នេះ

ពេលពពោះជាវេលាដ៏សំខាន់ដែលស្រីៗចាំបាច់ត្រូវថែទាំសុខភាពឲ្យល្អ សម្រាកឲ្យគ្រប់គ្រាន់ ជាពិសេសត្រូវចេះជ្រើសរើសអាហារបំប៉នណាល្អៗ ដើម្បីទ្រទ្រង់សុខភាពខ្លួនឯង និងកូនក្នុងផ្ទៃឲ្យបានលូតលាស់ល្អ កើតមកឆ្លាតវាងវៃ។

លោកវេជ្ជបណ្ឌិត អ៊ុន យូ បម្រើការងារនៅមន្ទីរពេទ្យកុមារជាតិ បានលើកឡើងថា អាហារដែលមាន DHA ដើរតួនាទីសំខាន់ជួយឲ្យខួរក្បាលទារកក្នុងផ្ទៃលូតលាស់បានល្អ កើតមកឆ្លាតវាងវៃ ឯភ្នែកក៏ភ្លឺច្បាស់។

១. អ្វីទៅជា DHA?

DHA មកពីពាក្យថា Docosahexaenoic Acid វាជាអាស៊ីដខ្លាញ់ល្អ ហើយអាស៊ីដខ្លាញ់អូមេហ្គា ៣ ជាប្រភពដើមផ្តល់នូវ DHA។

២. DHA មាននៅក្នុងអ្វីខ្លះ?

អាស៊ីដខ្លាញ់អូមេហ្គា ៣ ដែលជាប្រភពដើមផ្តល់នូវ DHA សម្បូរនៅក្នុងខ្លាញ់ត្រីរស់នៅក្នុងសមុទ្រទឹកជ្រៅ ដូចជា ត្រីសាលម៉ុន ត្រីធូណា ត្រីសាឌីន បង្គាធំៗ និងមួយផ្នែកតូចនៅក្នុងសាច់ ស៊ុត និងគ្រាប់ធញ្ញជាតិមួយចំនួន។ ក្រៅពីអាហារមុខនេះ ស្រីៗពពោះក៏អាចបន្ថែមនូវសារធាតុ DHA តាមរយៈការញ៉ាំថ្នាំវីតាមីនដែលមានសារធាតុ DHA បំប៉នសុខភាព។

៣. បរិមាណ DHA ដែលស្ត្រីពពោះត្រូវការ

បើតាមអង្គការសុខភាពពិភពលោក (WHO) អំឡុងទារកនៅក្នុងផ្ទៃ គឺជាពេលដែលប្រឈមនឹងការខ្វះអូមេហ្កា ៣ ដែលជាប្រភពដើមនៃ DHA ដោយសារជាលិកាម្ដាយដែលផ្ទុកវាធ្លាក់ចុះ ហើយយើងត្រូវប្រើវាដើម្បីឲ្យទារកលូតលាស់បានល្អ បែបនេះទើបតម្រូវឲ្យស្ត្រីពពោះបំពេញបន្ថែមនូវអាស៊ីដខ្លាញ់អូមេហ្កា ៣ តាមរយៈអាហារ ឬអាហារបំប៉នផ្សេងៗ។ នៅពេលដឹងថាមានផ្ទៃពោះភ្លាម ស្ត្រីត្រូវញ៉ាំ DHA ជាពិសេសនៅត្រីមាសទី៣ ស្ត្រីត្រូវការបរិមាណ DHA ច្រើន ដោយកូនក្នុងផ្ទៃចាប់ផ្តើមបឺតស្រូបយក DHA តាំងពីពេលនោះ រហូតដល់ពេលកូនកើត បន្តដល់កូនអាយុបាន ២ ឆ្នាំ។ បរិមាណ DHA ដែលស្ត្រីពពោះត្រូវការប្រចាំថ្ងៃ ប្រមាណ ២០០ មិល្លីក្រាម។

អត្ថបទពាក់ព័ន្ធ៖ 

• ម៉ាក់ៗទើបកូនដំបូង! ដឹងថា DHA សំខាន់ប៉ុនណាអត់ ពេលបំបៅដោះកូន?
• កូនឆ្លាត ឬមិនឆ្លាត អាស្រ័យលើកត្តាទាំងនេះ
• ហេតុអីស្ត្រីពពោះប្រឈមខ្លាំងនឹងការខ្វះជាតិដែក? ជាតិដែកជួយអីខ្លះ?
• កំពុងត្រៀមខ្លួនជិតក្លាយជាម៉ាក់ៗគេ ត្រូវដឹងរឿងទាំងនេះ
• ៤ចំណុច ពេទ្យហាមដាច់ខាតចំពោះស្ត្រីមានផ្ទៃពោះ

[embed-health-tool-due-date]