ពេលម៉ាក់ៗ ពពោះប្រាកដជាពិតជាគិតគូរខ្លាំង ដោយធ្វើយ៉ាងណាឲ្យកូនសុខភាពល្អ សម្រស់ស្រស់សម្បុរសខ្ចី ស្បែកទន់រលោង និងមានសក់ក្រាស់ល្អ។ បញ្ហានេះម៉ាក់ៗធ្លាប់មានបទពិសោធន៍មួយចំនួនបានចូលខ្លួនចែករំលែករបបអាហារដែលជួយឲ្យកូនមានស្បែកសស្អាត សក់ទន់រលោង ក្នុងនោះរឿងចាំបាច់បំផុតទាំងគេទាំងយើងគិតពីការញ៉ាំអាហារប៉ូវ និងថ្នាំជំនួយផ្សេងៗឲ្យកូនពេញលក្ខណៈសិន។
១- ផ្លែទទឹម
សម្រាប់ ប៉ែន ប៉ុណ្ណីកា បានចែករំលែកមកថា អ្នកនាង និងស្វាមីសុទ្ធតែសម្បុរមិនសទេ តែកូនៗវិញសាច់ដូចសំឡី។ ពេលកូនដំបូងស្ត្រីវ័យ ៣០ ឆ្នាំរូបនេះមិនដឹងឡើយថាមកពីអ្វី គ្រាន់តែញ៉ាំផ្លែទទឹមតាំងពីមានភ្លាមៗរហូតដល់កើត ព្រោះជាផ្លែឈើដាំនៅផ្ទះខ្លួនស្រាប់។ ស្ត្រីមេផ្ទះនៅស្រុកបសេដ ខេត្តកំពង់ស្ពឺ បានបន្ថែមទៀតថា ក្រៅពីផ្លែទទឹម ក៏មានញ៉ាំផ្លែឈើដទៃទៀតដូចជាប៉ោម និងទំពាំងបាយជូរ គ្រាន់តែមិនសូវច្រើនប៉ុណ្ណោះ លុះដល់មានកូនទី២ និងទី៣ នៅតែបន្តញ៉ាំផ្លែទន្ទឹម និងចំណីអាហារល្អៗ ផ្លែឈើចម្រុះបន្ថែមទៀតកូនក៏នៅតែស្អាតទាំងអស់។
២- ក្រូចពោធិ៍សាត់ និងទឹកដោះគោឆៅ
អ្នកនាង ឆឺន ឡុងហៀង អ្នកស្រុកខ្សាច់កណ្ដាល ខេត្តកណ្ដាល បានចែករំលែកបទពិសោធខ្លួនថា តាំងពីចាប់ផ្ដើមទម្ងន់ រហូតដល់គ្រប់ខែសម្រាល ម៉ាក់ៗរូបនេះញ៉ាំតែក្រូចពោធិ៍សាត់ ២ ផ្លែ និងទឹកដោះគោឆៅ ២ កំប៉ុង/ថ្ងៃ។ លទ្ធផលគឺកូនអ្នកនាងមានសម្បុរសស្អាត សក់ខ្មៅ ត្រង់ទន់រលោង និងច្រើនខ្លាំងទៀតផង។ ម៉ាក់ៗកូនប្រុសដំបូងរូបនេះ បានបន្តទៀតថា ចំណីអាហារ ឬភេសជ្ជៈដែលមានពណ៌ខ្មៅៗដូចជា សូកូឡា កាហ្វេ កូកា តែ… មិនញ៉ាំបន្តិចសោះឡើយ ព្រោះខ្លាចធ្វើឲ្យប៉ះពាល់សុខភាព និងពណ៌ស្បែកកូន។ ស្ត្រីវ័យ ៣៣ ឆ្នាំរូបនេះបានបន្ថែមទៀតថា ក្រៅពីនេះនៅមានលេបថ្នាំតាមវេជ្ជបញ្ជារបស់គ្រូពេទ្យ បូករួមបន្លែបៃតងជាច្រើនមុខដែលញ៉ាំមិនដែលខានមួយថ្ងៃ ទើបកូនមានស្បែកស្អាតបាន។
៣- អាហារមានជាតិប្រេង ឬខ្លាញ់ពីធម្មជាតិ
អ្នកដែលចង់ឲ្យកូនមានសក់ក្រាស់តាំងពីនៅក្នុងពោះ គួរតែញ៉ាំអាហារ ឬផ្លែឈើមានជាតិខ្លាញ់ច្រើនដូចជាផ្លែ ប៊ើរ វ៉ល់ណាត់ ប្រេងបន្លែ បន្លែស្លឹកៗ សាច់ត្រី …។ អាហារទាំងនេះជួយឲ្យម៉ាក់ៗមានសុខភាពល្អ និងជួយឲ្យទារកលូតលាស់គ្រប់ផ្នែករួមទាំងសក់ច្រើន និងស្បែកទន់ រលោងទៀតផង។ វិធីនេះជាការចែករំលែកពីម៉ាក់ៗ សុផាឡេង។
៤- ពងទាកូន
នេះជាវិធីមួយដែលចាស់ៗពីមុនតែងនិយាយតគ្នា ហើយពេលញ៉ាំទៅមានប្រសិទ្ធិភាពចំពោះ លៀង សុភានី ព្រោះគាត់មានសក់ស្ដើងៗ ហើយខ្លាចកូនបែបនោះដែរ ទើបសាកញ៉ាំតាមចាស់ៗនិយាយ។ ម៉ាក់ៗរូបនេះបន្តទៀតថា ក្រៅពីពងទាកូន គាត់ក៏បានញ៉ាំបន្លែផ្លែឈើជាច្រើនប្រភេទ រួមផ្សំនឹងថ្នាំជំនួយដែលទៅពិគ្រោះជាមួយគ្រូពេទ្យ។
៥- ញ៉ាំថ្នាំវីតាមីន និងបន្លែផ្លែឈើ
ការញ៉ាំថ្នាំវីតាមីន និងបន្លែផ្លែឈើឲ្យបានច្រើន ជំនួយសុខភាពផង ឯស្បែក និងសក់កូនក៏ជួយបានច្រើនដែរ នេះជាបទពិសោធន៍របស់ អ្នកនាង ដាណេ រស់នៅខេត្តកណ្តាល។ ស្ត្រីកូន២នាក់រូបនេះ បញ្ជាក់ថា អ្នកស្រីបានញ៉ាំថ្នាំវីតាមីនតាំងពេលមានគម្រោងយកកូន រហូតដល់ សម្រាលក៏នៅតែញ៉ាំ បូកបន្ថែមនឹងការញ៉ាំបន្លែផ្លែឈើ អ៊ីចឹងហើយទើបកូនកើតមកមានសុខភាពល្អ ស្បែកក៏ស។
ចំពោះអាហារប្រភេទណាធ្វើឲ្យកូនដុះសក់ច្រើន ស្បែកស លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែកសម្ភព និងរោគស្រ្តីមន្ទីរពេទ្យកាល់មែត បានឲ្យដឹងថា ជំនឿទាក់ទិននឹងរបបអាហារនេះ គ្មាននៅក្នុងវេជ្ជសាស្ត្រឡើយ តែបើយើងចំណាំតគ្នាថា អាហារណាអាចជួយផ្នែកទាំងនោះបាន ម៉ាក់ៗអាចទទួលទានបាន។ មួយវិញទៀតម៉ាក់ៗក៏អាចញ៉ាំអាហារ ឬថ្នាំវីតាមីន C E B6 អាស៊ីដហ្វូលិក សារធាតុដែក ជាតិស័ង្កសី ដែលពពួកវីតាមីនអស់ទាំងនេះមាននៅក្នុងបន្លែ ផ្លែឈើ និងត្រី សាច់។
អត្ថបទពាក់ព័ន្ធ៖
- ស្រីៗពពោះចង់ឲ្យខួរក្បាលកូនឆ្លាត ភ្នែកភ្លឺ កុំភ្លេចញ៉ាំសារធាតុបំប៉នដ៏សំខាន់នេះ
- ហេតុអីស្ត្រីពពោះប្រឈមខ្លាំងនឹងការខ្វះជាតិដែក? ជាតិដែកជួយអីខ្លះ?
- ពេទ្យហាមស្រីៗពពោះមិនឲ្យញ៉ាំត្រីសមុទ្រទាំងនេះទេ មានជាតិបារ៉តខ្ពស់ ប៉ះពាល់កូន
- ម៉ាក់ៗលាបឡេលាយពេលពពោះ ប្រយ័ត្នកូនកើតមកមានបញ្ហាទាំងនេះ
- ស្រីៗអាយុតិច មានកូនឆ្លាតជាងអ្នកអាយុច្រើន ព្រោះហេតុផលបែបនេះ
- អ្នកជំនាញថាការបង្កកំណើតក្នុងមន្ទីរពិសោធន៍មានអត្រាជោគជ័យទាប
- ស្ដាប់ជាង និងស្រីៗអ៊ុតសក់ត្រង់ពេលពពោះ ទើបដឹងថាប៉ះពាល់កម្រិតណា
- បន្លែផ្លែឈើ៣មុខនេះ ស្រីៗមានផ្ទៃពោះកុំសាកអី អាចរលូតកូន ឬកូនកើតមុនខែ
- តិចនិកជួយទឹកកាមមានសុខភាពល្អ អត្រាមានកូនកាន់តែខ្ពស់
- ហេតុអ្វីគ្រាន់តែរ៉េស៊ីសឈាមប្តីប្រពន្ធផ្ទុយគ្នា កូនអាចមានគ្រោះថ្នាក់?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
