គ្នាយើងទំនងជាបានដឹងហើយថាថ្លើមសត្វមានផ្ទុកសារធាតុចិញ្ចឹមច្រើនយ៉ាងមានទាំងវីតាមីន រ៉ែ និងប្រូតេអ៊ីន ហើយថ្លើមក៏មានផ្ទុកវីតាមីន A ក្នុងកម្រិតខ្ពស់ផងដែរ។ ទោះយ៉ាងណា ការទទួលបានវីតាមីន A ពីថ្លើមសត្វច្រើនពេកគឺមិនល្អសម្រាប់ស្រីៗមានផ្ទៃពោះនោះទេ។
ថ្លើមសត្វមានផ្ទុកជាតិដែក វីតាមីន B12 វីតាមីនA ស័ង្កសី ស៊ីលីស្យូម(selenium) និងស្ពាន់ ដែលអ្វីទាំងអស់នេះសុទ្ធតែជាសារធាតុចិញ្ចឹមល្អ សម្រាប់រាងកាយ។ ប៉ុន្តែស្រ្តីមានផ្ទៃពោះមិនគួរញ៉ាំអាហារប្រភេទនេះច្រើននោះទេ។
ការញ៉ាំថ្លើមសត្វមានទម្រង់វីតាមីន A (preformed vitamin A)ច្រើន ជាពិសេសនៅត្រីមាសទី១ អាចធ្វើឲ្យកូនក្នុងផ្ទៃលូតលាស់មិនពេញលេញ ឬអាចរលូតផងក៏មាន។ ក្រៅពីក្នុងថ្លើមសត្វ អាហារធ្វើពីថ្លើមសត្វដូចជាសាច់ក្រក ក៏នៅតែមានផ្ទុកវីតាមីនA នេះច្រើនដូចគ្នា។
គ្នាយើងទំនងជាឆ្ងល់ដែរថា វីតាមីនA ក្នុងថ្លើមសត្វអាចមានបញ្ហាចំពោះស្រ្តីមានផ្ទៃពោះ ចុះវីតាមីនA ក្នុងបន្លែមានបញ្ហាដែរឬទេ? ចម្លើយខ្លីគឺមិនមានបញ្ហាទេ។ នៅក្នុងបន្លែ ផ្លែឈើ វីតាមីនA យើងអាចហៅបានម្យ៉ាងទៀតថាប្រូវីតាមីនA ការ៉ូទីន(provitamin A carotenoids)។ ការទទួលបានវីតាមីនA នៅក្នុងបន្លែ ផ្លែឈើ គឺមិនមានគោលការណ៍ណែនាំឲ្យកំណត់បរិមាណញ៉ាំនោះទេ ពោលគឺថាមានសុវត្ថិភាពក្នុងការញ៉ាំសម្រាប់ស្រីៗមានផ្ទៃពោះ។
បើអ៊ីចឹងស្រ្តីមានផ្ទៃពោះមិនគួរញ៉ាំថ្លើមសត្វ? មិនមែនបែបនេះទេ ប៉ុន្តែត្រូវកំណត់បរិមាណត្រូវញ៉ាំ គឺអាចញ៉ាំប្រហែលជា៨០ក្រាមក្នុងមួយសប្ដាហ៍ ដោយមិនត្រូវញ៉ាំរាល់ថ្ងៃនោះទេ។ គ្នាយើងដឹងទេនៅក្នុងថ្លើមគោត្រឹមមួយចំហៀងមានផ្ទុកវីតាមីន A ច្រើនជាងតម្រូវការអតិបរមារបស់ស្រីៗរហូតដល់ទៅបីដង។
នាយកដ្ឋានកសិកម្មរបស់សហរដ្ឋអាមរិកបានណែនាំឲ្យញ៉ាំវីតាមីនA ពីសរីរាង្គសត្វ ឬអាហារបំប៉នមានប្រភពពីសរីរាង្គសត្វត្រឹម១០ ០០០IU សម្រាប់ស្រីៗមានអាយុលើសពី១៩ឆ្នាំ បើក្រោម១៩ឆ្នាំ ត្រូវញ៉ាំតិចជាងនេះ។ ប៉ុន្តែនៅក្នុងថ្លើមគោគឺមានទម្រង់វីតាមីនA នេះរហូតដល់៣០ ០០០IU បើយើងញ៉ាំត្រឹមមួយចំហៀងក៏ដោយ។ ដូចនេះហើយបើស្រីៗមានផ្ទៃពោះញ៉ាំថ្លើមសត្វរាល់ថ្ងៃអាចធ្វើឲ្យលើសវីតាមីន A និងអាចប៉ះពាល់ដល់កូនក្នុងផ្ទៃដូចបានបញ្ជាក់ខាងលើអ៊ីចឹង។
[embed-health-tool-pregnancy-weight-gain]
