ស្រីៗមានផ្ទៃពោះប្រាកដជាបានត្រៀមលក្ខណៈ និងសម្ភារៈផ្សេងៗមុនពេលគ្រប់ខែយ៉ាងហោចណាស់ ក៏១ ឬ២ខែដែរ។ ទន្ទឹមនឹងការត្រៀមលក្ខណៈនោះ ស្រីៗគ្នាយើងគួរតែធ្វើរឿងប៉ុន្មានយ៉ាងក្រោមនេះដែរ ពេលត្រៀមខ្លួន ដើម្បីសម្រាលកូន។
១. ដោះគ្រឿងអលង្ការទុក
បើមានពាក់គ្រឿងអលង្ការជាប់ខ្លួន ដូចជាខ្សែក ខ្សែដៃ កងដៃ ក្រវិល ចិញ្ចៀននោះ យកល្អម៉ាក់ៗគួរតែដោះទុកសិន ដើម្បីបង្កលក្ខណៈងាយស្រួលពេលសម្រាលកូន ឯការបីថ្នាក់ថ្នមកូនក្រោយសម្រាល មិនបារម្ភការប៉ះទង្គិចខ្លួនប្រាណកូន។
២. កាត់សក់ឲ្យខ្លី
គ្រូពេទ្យមិនតម្រូវឲ្យស្រីៗគ្រប់គ្នាត្រូវតែកាត់សក់ឲ្យខ្លីមុនសម្រាលកូននោះទេ តែការទុកសក់វែងពេក ធ្លាក់រញ៉េរញ៉ៃទើសមុខមាត់ ពិបាកកក់ ពិបាកសិត ឬអាចធ្លាក់ចូលភ្នែកកូន។ ដូចនេះយើងគួរតែតម្រឹម ឬកាត់សក់ឲ្យខ្លី នោះអារម្មណ៍យើងក៏ស្រឡះទៅតាមនោះដែរ។
៣. ងូតទឹក កក់សក់ ជម្រះកាយឲ្យស្អាត
រឿងនេះចាំបាច់សម្រាប់ម៉ាក់ៗដែលត្រូវសម្រាលកូនដោយវះកាត់ ព្រោះយើងបានដឹងមុនពេលពេលវេលាច្បាស់លាស់ក្នុងការសម្រាល។ ហេតុអីចាំបាច់ងូតទឹក កក់សក់ ជម្រះកាយឲ្យស្អាតមុននឹងសម្រាលកូន? នេះក៏ដោយសារតែក្រោយសម្រាលហើយភ្លាមៗ យើងមិនអាចងូតទឹកបានភ្លាមៗនោះទេ ត្រូវរង់ចាំដល់១ ឬ២ថ្ងៃ ឯណោះ។
៤.កាត់ក្រចកដៃ ក្រចកជើង
ក្រចកដៃ ក្រចកជើង ជាបណ្តុំនៃមេរោគ ហើយបើមិនកាត់ឲ្យខ្លីទេ ពេលសម្រាលកូនរួច ម៉ាក់ៗបីបេប៊ីអាចប៉ះធ្វើឲ្យរលាត់ស្បែកកូន។
អត្ថបទពាក់ព័ន្ធ៖
- អាថ៌កំបាំង ៥ យ៉ាងអំពីការសម្រាលកូនតាមធម្មជាតិ ម៉ាក់ៗគួរស្វែងយល់
- កូនកើតភ្លាម ហេតុអីគ្រូពេទ្យតែងដាក់នៅលើទ្រូងម៉ាក់ ចុះបើដាក់លើទ្រូងប៉ាបានអត់?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
