ជាតិជាម្ដាយគ្រប់គ្នាតែងតែគិតពីកូនខ្លាំងបើទោះជាទើបសម្រាលមិនបានប៉ុន្មានខែក៏ដោយ។ ក្នុងនោះរឿងដែលត្រូវបានគិតច្រើនជាងគេ គឺអនាគត និងសុខភាពកូន ថាតើធ្វើយ៉ាងម៉េចទើបមានភាពល្អប្រសើរទៅ។ ខាងក្រោមនេះគឺជាការចែករំលែកពីការគិតរបស់ម៉ាក់ៗ បន្ទាប់ពីសម្រាលកូនរួចភ្លាម ឬយូរហើយក៏នៅតែគិត។
សម្រាលកូនរួច ម៉ាក់ៗនាំគ្នាគិតច្រើនពីរឿងទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- គិតពីអនាគតកូន
មានម៉ាក់ៗជាច្រើននាំគ្នាគិតវែងឆ្ងាយពីបញ្ហាអនាគតទាំងកូនទើបសម្រាលបានប៉ុន្មានថ្ងៃ។ ក្នុងនោះអ្នកនាង ម៉េង ធីតា ទើបមានកូនម្នាក់អាយុបានជាង ៦ ខែតែងតែដេកមិនសូវបានគ្រប់គ្រាន់ ព្រោះត្រូវគិតថា ពេលកូនចូលរៀនគួរចូលសាលាណាឯកជន ឬរដ្ឋ? ឯកជនតើគេមើលថែដិតដល់ឬទេ ហើយថ្លៃចំណាយអស់ប៉ុន្មានក្នុងមួយខែ? បើយកដាក់រដ្ឋ តើខ្លាំងភាសាបរទេសដូចកូនគេរៀនឯកជនអត់? ធំឡើងឲ្យកូនធ្វើការងារអ្វីល្អ? ម៉ាក់វ័យក្មេងរូបនេះ បានបន្តទៀតថា តាំងពីកូនកើតបានពេលណា បញ្ហារៀបចំអនាគតឲ្យគេ ជាមូលហេតុធ្វើឲ្យញ៉ាំ និងគេងមិនសូវបាន ព្រោះត្រូវខ្វល់ខ្វាយច្រើន។ អ្នករស់នៅខេត្តកណ្ដាលរូបនេះបាន ឲ្យដឹងទៀតថា ពេលកូនមិនទាន់កើតបែរជាគិតមិនឃើញពីចំណុចអស់ទាំងនេះសោះ តែក្រោយឮសំឡេងកូនយំ ទើបដឹងថាតួនាទីជាម្ដាយ មិនមែនចិញ្ចឹមកូនតែម្យ៉ាង គឺរៀបចំផ្លូវដើរដ៏ល្អ សម្រាប់កូន។
២- ពេលកូនឈឺមិនដឹងយកទៅពេទ្យណា
កូនក្ដៅខ្លួនតិចតួច ឬក៏ខ្លាំង ក្នុងចិត្តពិតជាអន្ទះសា និងស្វែងរកពេទ្យពូកែៗ ដើម្បីយកកូនទៅព្យាបាល។ អ្នកនាង សេត ស្រីនាថ បានចែករំលែកអារម្មណ៍ច្របូកច្របល់ពេលកូនឈឺម្ដងៗ ថាត្រូវរត់ឆ្លេឆ្លាពេញផ្ទះ ដើម្បីស្វែងរកមន្ទីរពេទ្យ ឬគ្លីនិកដែលមានគ្រូពេទ្យធ្លាប់ព្យាបាលក្មេងជាច្រើនបានជាសះស្បើយ និងមិនធ្លាប់មានព័ត៌មានអកុសលណាមួយ។ ម៉ាក់កូន ៣ រូបនេះ បានឲ្យដឹងថា ខ្លួនព្យាយាមថែរក្សា និងការពារមិនឲ្យឈឺផ្ដាសឡើយ តែនៅមិនអាចចៀសបានរហូតឡើយ ហើយពេលមានរឿងនោះកើតឡើង រត់ទៅមន្ទីរពេទ្យរដ្ឋល្បីឈ្មោះបំផុតរបស់ប្រទេសខ្មែរ ក៏មិនអាចចូលពិនិត្យភ្លាមៗ ហើយបើទៅកន្លែងផ្សេងក៏មិនទុកចិត្ត។ បុគ្គលិកផ្នែកទំនាក់ទំនងក្រុមហ៊ុនឯកជន បានបន្ថែមទៀតថា គ្លីនិកខ្លះថ្លៃហួសពីសមត្ថភាពអ្នកមានជីវភាពមធ្យមដូចយើង ខណៈមន្ទីរពេទ្យរដ្ឋ បើដល់រដូវឈឺណាមួយ គឺគ្មានសូម្បីកន្លែងដេក ដូចនេះហ្វាម៉ាស៊ីផ្សំថ្នាំធម្មតា មិនគួរឲ្យទុកចិត្ត ដែលទាំងនេះជាទុក្ខកង្វល់សំខាន់ដំបំផុត។
៣- សុខភាព និងការលូតលាស់របស់កូន
ក្នុងចំណោមក្ដីបារម្ភរបស់ម៉ាក់ៗ សុខភាព និងភាពធំធាត់របស់កូនគឺពិតជាសំខាន់។ អ្នកនាង ណេត រីណា បានឲ្យដឹងថា កូនមិនសូវឡើងសាច់ ទើបចេះតែមានមន្ទិលសង្ស័យថា តើសុខភាពកូនប្រក្រតី ឬទេ។ អ្នករស់នៅភ្នំពេញរូបនោះបានឲ្យដឹងថា ទោះជាមិនឈឺ តែបើមិនឡើងសាច់សោះ ក៏មិនដឹងថាសុខភាពល្អ ឬអត់ ហើយក៏មិនដឹងថារបបអាហារដែលឲ្យកូនញ៉ាំរាល់ថ្ងៃគ្រប់គ្រាន់ផ្គត់ផ្គង់តម្រូវការឬអត់។ បន្ថែមពីនោះ ម៉ាក់វ័យកណ្ដាលចេះតែបារម្ភថា ការញ៉ាំអាហារណាខ្លះល្អ ឬមិនល្អឡើយ ព្រោះមិនសូវច្បាស់ពីពពួកបន្លែ ផ្លែឈើ ត្រីសាច់ ណាមានជាតិគីមី ឬអត់។
អត្ថបទពាក់ព័ន្ធ៖ សម្រាលកូនហើយជ្រុះសក់ តែបើម៉ាក់ៗមានទម្លាប់ធ្វើបែបនេះទៀត ប្រយ័ត្នទំពែក
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម