មេឃក្ដៅខ្លាំង អ្នកណាខ្លះងាយរងគ្រោះជាងគេ ហើយគួរជួយម៉េចទៅ?

មួយរយៈនេះ ទៅណាមកណា មានតែអ្នករអ៊ូរទាំរឿងក្តៅខ្លាំង ហើយបើដាច់ភ្លើងយប់ទៀត មិនបាច់ថ្លែងទេ ម្នាក់ៗព្រឹកឡើងក្រោកទៅធ្វើការ ភ្នែកឡើងរូង មុខឡើងស្លក់ មិនបាច់សួរក៏ដឹង ច្បាស់ជាគេងមិនគ្រប់ គេងមិនលក់ហើយ។ មិនមែនលេងសើចទេណា អាកាសធាតុក្តៅខ្លាំងបែបនេះ អាចប៉ះពាល់សុខភាពយើងបាន “Hello គ្រូពេទ្យ” នឹងប្រាប់ពីផលប៉ះពាល់ អ្នកណាខ្លះងាយរងគ្រោះ ក៏ដូចជាវិធីការពារឲ្យគ្នាយើងដឹង។

១- ផលប៉ះពាល់សុខភាពពីរលកកម្តៅ

– បេប៊ី និងក្មេងៗ៖

ស្ងួតស្បែក បបូរមាត់ និងមាត់
ស្បែកប្រែពណ៌ខុសធម្មតា
ឈឺក្បាល
ភ្នែកខូងមានរង្វង់ខ្មៅ
នោមតិច និងល្អក់
ឈឺពោះ និងរាក
ក្អួត
អារម្មណ៍ឆេវឆាវ រវើរវាយ
ពិបាកដកដង្ហើម
ងងុយគេង គេងយូរ និងពិបាកងើបឡើង

សម្រាប់បេប៊ី និងក្មេងៗ សុខភាពចុះខ្សោយលឿន និងពិបាកកត់សម្គាល់ ហេតុនេះពេលបេប៊ី និងក្មេងៗ បង្ហាញរោគសញ្ញាទាំងនេះ ម៉ាក់ប៉ា ចាំបាច់នាំកូនៗ ទៅជួបពេទ្យភ្លាម។

ចង់គណនា BMI ចុចទីនេះ !

ចង់គណនា BMR ចុចទីនេះ !

ចង់គណនារង្វាស់ចង្វាក់បេះដូង ចុចទីនេះ !

ចង់ពិនិត្យសុខភាពប្រព័ន្ធរំលាយអាហារ ចុចទីនេះ !

– មនុស្សពេញវ័យ៖

ឈឺក្បាល
រមួលសាច់ដុំ
ហើមដៃ ជើង និងកជើង
លេចឡើងកន្ទួលក្រហមតូចៗលើស្បែក
អស់កម្លាំង និងល្ហិតល្ហៃខុសធម្មតា
មិនស្រួលខ្លួន
ខ្វះជាតិទឹក ដូចជា ស្រេកទឹកខ្លាំង នោមតិច ស្បែកស្ងួត ជីពចរ និងដង្ហើម ដើរញាប់

សម្រាប់មនុស្សពេញវ័យ បើរោគសញ្ញាកើតឡើង ក្នុងរយៈពេល ២ម៉ោង ចាំបាច់ត្រូវទៅពេទ្យ។

ក្តៅខ្លាំងអ៊ីចឹង ត្រូវដឹងអ្នកណាខ្លះងាយរងគ្រោះជាងគេ Hello គ្រូពេទ្

២- កត្ដាប្រឈមខ្លាំង

– នៅពេលមានខ្យល់តិចតួច ឬគ្មានខ្យល់ទាល់តែសោះ

– នៅពេលមានរលកកម្ដៅកើតឡើង ហើយរាងកាយមនុស្ស មិនអាចសម្របនឹងកម្ដៅ

– ទីក្រុង ជាកន្លែងមានសីតុណ្ហភាពខ្ពស់ជាងជនបទ

៣- ក្រុមមនុស្សងាយរងគ្រោះ

– បេប៊ី និងក្មេងៗ អាយុតិចជាង ៥ឆ្នាំ

– មនុស្សចាស់

– រស់នៅម្នាក់ឯង

– មានជំងឺរ៉ាំរ៉ៃ ឬបញ្ហាសុខភាពផ្លូវចិត្ត

– ប្រើប្រាស់ថ្នាំញឿន ឬផឹកគ្រឿងស្រវឹង

– ធ្វើការនៅក្រោមកម្ដៅថ្ងៃ រយៈពេលយូរ

– ធ្វើការនៅមុខកម្ដៅភ្លើង

– គ្មានឧបករណ៍បញ្ចុះកម្ដៅ ឬម៉ាស៊ីនត្រជាក់

៤- វិធីការពារផលប៉ះពាល់ពីរលកកម្តៅ

– បេប៊ី និងក្មេងៗ៖

រក្សាជាតិទឹកក្នុងខ្លួន ដោយឲ្យអូនៗ ញ៉ាំទឹក ១កែវ រៀងរាល់ ២០នាទី និងបំបៅដោះបេប៊ីឲ្យញឹកញ៉ាប់
ជូតខ្លួនដោយកន្សែងត្រជាក់ឲ្យបានច្រើនដងក្នុងមួយថ្ងៃ
ការពារពីកម្ដៅ ដូចជា ស្លៀកពាក់ស្រាលៗ ពាក់មួក កុំទុកក្មេងៗឲ្យនៅក្នុងបន្ទប់ ឬរថយន្តម្នាក់ឯង
កម្រិតផលប៉ះពាល់កម្ដៅ ដូចជា កម្រិតការចេញទៅខាងក្រៅ និងកម្រិតសកម្មភាពរាងកាយ សម្រាប់ក្មេងៗ។

– មនុស្សពេញវ័យ៖

រក្សាជាតិទឹកក្នុងខ្លួន ដោយផឹកទឹក ៦-៨ កែវ/ថ្ងៃ។ បើចាំបាច់ ធ្វើតាមការណែនាំរបស់ពេទ្យ សម្រាប់ចំនួនសារធាតុទឹក គួរបំពេញក្នុងរាងកាយ
ចៀសវាងគ្រឿងស្រវឹង ព្រោះជាតិអាល់កុល កាត់តែធ្វើឲ្យខ្សោះជាតិទឹកថែមទៀត
ងូតទឹកឲ្យត្រជាក់ខ្លួនរាល់ថ្ងៃ
ចំណាយពេល ២ ម៉ោង/ថ្ងៃ នៅក្នុងបន្ទប់ម៉ាស៊ីនត្រជាក់ ឬទីតាំងត្រជាក់នានា
ការពារឲ្យរាងកាយពីកម្ដៅ ដូចជា កម្រិតការងារបញ្ចេញកម្លាំងរាងកាយ និងស្លៀកពាក់ស្រាលៗ
តាមដានព័ត៌មាន និងការព្រមានពីការឡើងកម្ដៅឲ្យជាប់លាប់។

អត្ថបទគួរអាន៖

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ គីង ច័ន្ទវាសនា · កែ 03/04/2024

មេឃក្ដៅ​ខ្លាំង ​អ្នកណាខ្លះ​ងាយ​រង​គ្រោះ​ជាង​គេ ហើយគួរ​ជួយ​ម៉េចទៅ?

មេឃក្ដៅខ្លាំង អ្នកណាខ្លះងាយរងគ្រោះជាងគេ ហើយគួរជួយម៉េចទៅ?