អ្នកជំនាញមកពីប្រទេសអូស្រ្តាលី បានបង្ហាញពីផលប្រយោជន៍មួយចំនួន ដែលអ្នកលេងហ្គេម ឬអ្នកដែលអាចនឹងចូលចិត្តលេងហ្គេមកម្សាន្ត អាចស្វែងយល់ តែទន្ទឹមនឹងនោះ លោកក៏រំលឹកពីរឿង គិតគូរឲ្យមានតុល្យភាពចំពោះសុខភាពផងដែរ។
សាស្រ្តាចារ្យ និងជាអ្នកចិត្តវិទ្យា នៃសាកលវិទ្យាល័យ Queensland អូស្រា្តលី គឺលោក Daniel Johnson ដែលលោកធ្លាប់មានបទពិសោធន៍ផ្តល់ជាគំនិត ក្នុងវិស័យបង្កើតហ្គេមផងដែរនោះ បានលើកឡើងថា ហ្គេមដែលជាល្បែងកម្សាន្តឌីជីថល អាចបំពេញគុណសម្បត្តិបីយ៉ាង។ គុណសម្បត្តិទាំងបីនោះ មានដូចជា អារម្មណ៍ល្អរីករាយ ការស្វែងយល់ពីខ្លួនឯងដោយឯករាជ្យ និងការផ្សារភ្ជាប់ទំនាក់ទំនង (តែក្នុងបណ្តាញអ៊ិនធឺណិត)។
លោកសាស្រ្តាចារ្យបានពន្យល់ពីគុណសម្បត្តិមួយៗថា ទី១៖ អារម្មណ៍ល្អរីករាយ គឺអារម្មណ៍របស់លេងហ្គេមកម្សាន្តនោះ គឺអាចស្វែងរក ប្រភេទហ្គេមណា ដែលត្រូវនឹងចំណូលចិត្តរបស់ខ្លួន ហើយអាចបង្កឲ្យពួកគេមានអារម្មណ៍រីករាយបាន។
ទី២៖ ឯករាជ្យ បែបនេះ មានន័យថា ប្រភេទហ្គេមដែលគេលេង តួយ៉ាងដូចជា ហ្គេមខ្លះបង្កើតឡើងតាម សាច់រឿងភាគ ហើយទាមទារឲ្យអ្នកលេងដើរតួជាវីរបុរស RPG (Role-Play Gaming) ដូចនេះគេអាចប្រើយុទ្ធសាស្រ្ត និងការពិចារណាររបស់ខ្លួន ឲ្យអស់ពីលទ្ធភាពដើម្បីដោះស្រាយបញ្ហាក្នុងហ្គេម។
ទី៣៖ គឺទំនាក់ទំនង ការលេងហ្គេម ប្រភេទអនឡាញ បានធ្វើឲ្យពួកគេ (អ្នកលេងហ្គេម) អាចបង្កើនទំនាក់ទំនង យ៉ាងប្រសើរ និងស្មារតី ធ្វើការងារជាក្រុមល្អ (តែយ៉ាងណាមិញ លោកសាស្រ្តាចារ្យ បញ្ជាក់ថា វាគ្រាន់តែជាទំនាក់ទំនងលើអនឡាញ មិនប្រាកដថា ទំនាក់ទំនងខាងក្រៅ នឹងល្អដូច ពិភពពិតនោះឡើយ)។
អត្ថបទពាក់ព័ន្ធ៖
- អាល្លឺម៉ង់ ប្រើចិត្តសាស្ត្រព្យាបាលអ្នកញៀនហ្គេមបាន
- ប្រយ័ត្ន! អត់កម្លាំងនឹងការងារ វក់ជាមួយហ្គេម គឺជាជំងឺ
ខាងលើនេះ សុទ្ធសឹងជាគុណប្រយោជន៍ ដែលអ្នកចង់លេងហ្គេមអាចស្វែងយល់ ប៉ុន្តែទន្ទឹមនឹងនេះ អ្នកជំនាញចិត្តសាស្រ្តមកពីអូស្រ្តាលីខាងលើនេះ ក៏បានរំលឹកដែរថា លោកឯកភាពចំពោះគុណវិប្បត្តិរបស់ហ្គេមផងដែរ ពោលគឺវាធ្វើឲ្យមនុស្សវក់នឹងវា(ញៀន) ដូចនេះ លោកសាស្រ្តាចារ្យបាននិយាយថា៖ ‘ ការលេងហ្គេម អ្នកអាចទាញយកប្រយោជន៍ល្អទាំងនេះសម្រាប់ខ្លួន តែក៏ត្រូវដឹងខ្លួនឯងធ្វើយ៉ាងម៉េចឲ្យមានសមាមាត្រសម្រាប់សុខភាពខ្លួនផងដែរ’៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
