មានមតិជាច្រើនបានលើកឡើងមកកាន់ Helloគ្រូពេទ្យថា ហេតុអ្វីបានជាយើងចាំបាច់ចាក់វ៉ាក់សាំងការពារជំងឺផ្ដាសាយធំ ខណៈដែលចាក់ហើយនៅកើតដដែល? ដើម្បីបកស្រាយបញ្ហានេះលោកវេជ្ជបណ្ឌិត ហ៊ាង រតនា ឯកទេសជំងឺទូទៅ បានឲ្យដឹងថា ហេតុផល គឺដើម្បីការពារខ្លួនពីជំងឺផ្ដាសាយធំនេះតែម្ដង។
លោកបានបញ្ជាក់ទៀតថា ត្បិតហេតុផលនេះស្ដាប់ទៅដូចសាមញ្ញ តែវាពិតជាចាំបាច់ខ្លាំង ព្រោះថាមេរោគនេះ (influenza) បង្កផលប៉ះពាល់ដល់ការរស់នៅប្រចាំថ្ងៃរបស់យើង។ មនុស្សគ្រប់គ្នាអាចកើតមានជំងឺនេះ តែសម្រាប់ទារក កុមារតូចៗ ស្ត្រីមានផ្ទៃពោះ និងមនុស្សចាស់អាយុ ៦០ ឆ្នាំឡើងទៅងាយឆ្លងបំផុត និងអ្នកមានប្រព័ន្ធការពាររាងកាយខ្សោយងាយកើតជំងឺនេះខ្លាំងណាស់។ វីរុស influenza មិនត្រឹមតែបង្កឲ្យកើតជំងឺផ្ដាសាយធំប៉ុណ្ណោះទេ វាក៏អាចបណ្ដាលឲ្យមានជំងឺរលាកទងសួត ហើយបើអ្នកមានជំងឺប្រចាំកាយកាន់តែធ្ងន់ធ្ងរឡើង។
វេជ្ជបណ្ឌិតរូបនេះ ក៏បញ្ជាក់ទៀតថា វ៉ាក់សាំងការពារជំងឺផ្ដាសាយអាចការពារជំងឺនេះបាន ហើយក៏អាចជួយជំងឺនេះមិនឲ្យឆ្លងពីមនុស្សម្នាក់ទៅមនុស្សម្នាក់ទៀតបានដែរ។ ជាធម្មតាជំងឺផ្ដាសាយធំងាយឆ្លងខ្លាំងណាស់ តាមរយៈ ក្អក កណ្ដាស់ និងប៉ះពាល់ជាមួយអ្នកជំងឺ ហើយរោគសញ្ញាវិញមានដូចជា គ្រុន ក្ដៅខ្លួន ហៀរសំបោរ ល្ហិតល្ហៃ ឈឺបំពង់ក ឈឺសាច់ដុំ។
ដូចនេះហើយវេជ្ជបណ្ឌិត ហ៊ាង រតនា បានណែនាំឲ្យយើងចាក់វ៉ាក់សាំងការពារជំងឺផ្ដាសាយមួយឆ្នាំម្ដង និងមួយវិញទៀតវ៉ាក់សាំងនេះការពារបានតែផ្ដាសាយធំមួយមុខប៉ុណ្ណោះ ហើយកុំឆ្ងល់ថា ហេតុអ្វីបានជាចាក់រួច តែនៅមានឈឺជំងឺនេះដដែល ព្រោះមេរោគផ្ដាសាយមានច្រើនប្រភេទខ្លាំងណាស់ តែផ្ដាសាយធំជាប្រភេទធ្ងន់ធ្ងរជាងគេ ទើបយើងចាំបាច់ត្រូវចាក់ឲ្យបានទៀងទាត់។
អត្ថបទពាក់ព័ន្ធ៖
- ចង់ចាក់វ៉ាក់សាំងផ្ដាសាយ ទាំងមនុស្សទូទៅ ក្មេង ស្ត្រីមានផ្ទៃពោះ ត្រូវដឹងរឿងទាំងនេះសិន
- ម៉ាក់ៗចាក់វ៉ាក់សាំងផ្ដាសាយពេលពពោះ អាចជួយការពារដល់កូនកើតបាន ៦ ខែ
- ក្មេងៗបានចាក់វ៉ាក់សាំងផ្ដាសាយ អាចគេចផុតពីវីរុសកូរ៉ូណាថ្មីទេ?
[embed-health-tool-vaccination-tool]
