ចំពោះស្រីៗគ្នាយើង ស្បូនជាអវយវៈសំខាន់់មួយដែលធ្វើឲ្យខ្លួនយើងមានភាពជាមនុស្សស្រី ហើយស្បូនជាអ្នកបង្កើតវដ្ដរដូវ ក៏ដូចជាមាននាទីសំខាន់បំផុតមួយដែលមានមនុស្សស្រីធ្វើបាននោះគឺការបង្កកំណើត ឬបន្តពូជនេះឯង។ ប៉ុន្តែ ស្បូនក៏ប្រឈមនឹងជំងឺកាចៗច្រើនគួរសមដែរដូចជា កើតដុំសាច់ គីស ឬជំងឺមហារីកស្បូន ឬមហារីកភ្នាសស្បូនជាដើម។
គណនាថ្ងៃមេជីវិតញីទុំធ្លាក់ នៅទីនេះ
តាមការឲ្យដឹងរបស់វេជ្ជបណ្ឌិត សឿច័ន្ទ វិសាល ឯកទេសផ្នែកសម្ភព និងរោគស្ត្រី បើយើងនិយាយពាក់ព័ន្ធនឹងជំងឺមហារីកកោសិកាភ្នាសស្បូន គឺជាជំងឺមួយដែលកោសិកាភ្នាសស្បូនលូតលាស់ធំឡើងៗ ដោយខ្លួនប្រាណរបស់យើងមិនអាចគ្រប់គ្រងបាន និងក្លាយជាកោសិកាមហារីក។ ចំពោះជំងឺមហារីកភ្នាសស្បូននេះ បើមិនប្រយ័ត្នខ្លួន ស្រីៗងាយកើត ជាពិសេសមនុស្សដែលមានកត្តាប្រឈមទាំងនេះដូចជា៖
- ស្ត្រីធាត់លើសទម្ងន់ លើសសម្ពាធឈាម
- ស្ត្រីកើតជំងឺទឹកនោមផ្អែម
- ស្ត្រីចូលចិត្តញ៉ាំខ្លាញ់សត្វច្រើន
- ស្ត្រីអស់រដូវយឺតពេក
- ត្រីឆាប់មានរដូវនៅអាយុក្មេងពេក
- មានបញ្ហាបញ្ចេញពងញី
- មានជំងឺពងញីកន្តាញ់ (PCOS)
- លើសអ័រម៉ូនEstrogen រយៈពេលយូរ
- ប្រើប្រាស់ថ្នាំភ្ញោចពងញីឲ្យឆាប់ទុំ
- កត្តាតំណពូជគ្រួសារដែលធ្លាប់មានអ្នកកើតជំងឺមហារីកកោសិកាភ្នាសស្បូន មហារីកដោះ ឬពោះវៀនធំ។ល។
លោកបន្តថា ជំងឺមហារីកកោសិកាភ្នាសស្បូននេះ មានចេញរោគសញ្ញាមួយចំនួនដែលស្ត្រីគ្រប់រូបគួរតែកត់ចំណាំដោយខ្លួនឯងផ្ទាល់ដូចជា៖
– ស្ត្រីអស់រដូវ៖ មានធ្លាក់ឈាមតាមទ្វារមាស ខុសធម្មតា
– ស្ត្រីនៅដំណាក់កាលបន្តពូជ៖ មានរដូវមិនទៀងទាត់ ឈាមរដូវធ្លាក់យូរថ្ងៃ ធ្លាក់ឈាមខុសធម្មតា
– ដំណាក់កាលយឺត (កើតយូរខែឆ្នាំ)៖ ឈឺចាប់នៅក្នុងអាងត្រគៀក បទជើងតូចនោមមានលាយឈាម ទឹកដក់ក្នុងពោះ(ពោះប៉ោងធំ) ជាដើម។
វេជ្ជបណ្ឌិតឯកទេសសម្ភព និងរោគស្ត្រីរូបនេះបញ្ជាក់ថា សម្រាប់ការព្យាបាលជំងឺមហារីកភ្នាសស្បូននេះ គ្រូពេទ្យជំនាញអាចព្យាបាលដោយការប្រើកាំរស្មី ប្រើប្រាស់ថ្នាំគីមី ឬមួយក៏វះកាត់ស្បូន វះយកកូនកណ្ដុរចេញ។ល។ ដូចនេះហើយ បើស្ត្រីមានរោគសញ្ញាធ្លាក់ឈាមខុសធម្មតា ពិសេសស្ត្រីជិតអស់រដូវ និងក្រោយអស់រដូវគួរទៅពិនិត្យសុខភាព ដើម្បីធ្វើរោគវិនិច្ឆ័យ និងព្យាបាលទាន់ពេលវេលា។
[embed-health-tool-ovulation]
