ទល់លាមក គឺជាបញ្ហាមួយកើតឡើងញឹកញាប់លើកុមារ។ ប៉ាម៉ាក់ត្រូវដឹងថាពេលណាកូនៗទល់លាមក ដើម្បីដោះស្រាយឲ្យបានត្រឹមត្រូវ។
ម៉ាក់ៗមើលម៉េចទើបដឹងថាអូនៗជួបបញ្ហាទល់លាមក?
ត្រួតពិនិត្យដោយ វេជ្ជ. ចាន់ ស៊ីណេត · ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១– រោគសញ្ញានៃបញ្ហាទល់លាមក
– កូនមិនសូវបន្ទោបង់ (អាចជុះតិចជាងបីដងក្នុងមួយសប្ដាហ៍)
– លាមករបស់ក្មេងមានសភាពរឹង និងស្ងួត ធ្វើឲ្យលាមកមិនងាយចេញមកក្រៅ ឬឈឺចាប់ពេលបន្ទោបង់ ឬទំហំលាមកធំពេករហូតអាចស្ទះបន្គន់។
– ក្មេងៗឈឺចាប់ ឬយំពេលបន្ទោបង់ម្ដងៗ
– ឈឺឆ្អល់ក្នុងពោះ និងហើមពោះ
– អាចចុកពោះ
– ពេលខ្លះអាចមានឈាមនៅជាប់លើលាមក
សញ្ញានៃបញ្ហាទល់លាមកដែលប៉ាម៉ាក់តែងយល់ច្រឡំនោះគឺ រាក។ ការរាកក្នុងបញ្ហាមួយនេះ គឺកើតឡើងដោយសារដុំលាមករឹងនៅស្ទះជាប់ក្នុងទ្វារលាមក ហើយលាមករាវៗហូរមកតាមក្រោយចេញតាមចន្លោះលាមករឹងទាំងនោះ។
ការឈឺចាប់រាល់ពេលបន្ទោបង់ អាចធ្វើឲ្យក្មេងព្យាយាមគេចមិនចង់បន្ទោបង់។ ដូចនេះប៉ាម៉ាក់គួរសង្កេតមើលអាកប្បកិរិយារបស់កូន ពេលបន្ទោបង់ សង្កេតមើលអំពីការខ្ជឹបរន្ធគូទ កូនមានខ្វែងជើងចូលគ្នាឬអត់ ឬពេលប្រឹងបត់ជើងកូនមានប្រែប្រួលទឹកមុខដែរឬអត់។
អត្ថបទពាក់ព័ន្ធ៖
២– មូលហេតុធ្វើឲ្យទល់លាមក
ក្មេងៗខ្លះព្យាយាមទប់លាមក ដោយសារពួកគេមិនចង់ចូលជុះតាមបន្គន់សារធារណៈ មិនចូលចិត្ដពេលរៀនបត់ជើងក្នុងបន្គន់ ឬមិនចង់ឈប់លេងដើម្បីទៅជុះ ឬមានពេលខ្លះដោយសារតែកូនខ្លាចឈឺពេលជុះម្ដងៗជាដើម។ បើក្មេងជុះទៅឈឺ លើកក្រោយៗទៀតកូនច្បាស់ជាមិនចង់ជុះទៀតទេ។
បញ្ហាទល់លាមកអាចកើតឡើងដោយសារតែរបបអាហារ មិនសូវមានបន្លែ និងផ្លែឈើ ដែលមានផ្ទុកជាតិសរសៃ fiber ច្រើន ឬមិនមានទឹកគ្រប់គ្រាន់ក្នុងអាហារ។ ក្មេងៗងាយនឹងជួបបញ្ហាទល់លាមកពេលប្ដូររបបអាហារ យើងអាចសង្កេតឃើញដោយខ្លួនឯងបាន គឺនៅពេលកូនចាប់ផ្ដើមប្ដូរពីញ៉ាំអាហាររាវៗទៅជាអាហាររឹងៗ។
ក្មេងខ្លះអាចទល់លាមកដោយសារតែផលរំខានរបស់ថ្នាំ។ ការទល់លាមកអាចកើតឡើងដោយសារតែផលរំខានរបស់ថ្នាំមួយចំនួនដូចជា ថ្នាំព្យាបាលជំងឺបាក់ទឹកចិត្ដ ឬថ្នាំមួយចំនួនផ្សេងទៀត។ ចំណែកប្រវត្ដិក្រុមគ្រួសារធ្លាប់កើតបញ្ហាទល់លាមក ក៏អាចនាំឲ្យកូនទល់លាមកដែរ។
៣- ការព្យាបាល
ញ៉ាំអាហារសម្បូរជាតិសរសៃ fiber
ប៉ាម៉ាក់ត្រូវឲ្យកូនញ៉ាំអាហារមានបន្លែផ្លែឈើ គ្រាប់ធញ្ញជាតិ ដែលសម្បូរជាតិសរសៃ fiber។ ពពួកដំណាប់គ្រាប់ផ្លែឈើ និងពោតលីង គឺជាក្រុមអាហារដែលសំបូរ fiber ប៉ុន្តែសម្រាប់ពោតលីង យើងមិនត្រូវប្រើស្ករ និងអំបិលច្រើនពេកទេ។ អាហារដែលមានផ្ទុក Probiotics មានដូចជាយ៉ាអួរ គឺអាចទៅជួយពង្រឹងប្រព័ន្ធរំលាយអាហាររបស់ក្មេងបាន។
ក្រៅពីញ៉ាំអាហារមានជាតិសរសៃ Fiber ក្មេងៗក៏ត្រូវញ៉ាំទឹកឲ្យច្រើនដែរ។ បើញ៉ាំតែអាហារមានសរសៃ Fiber ប៉ុន្តែញ៉ាំទឹកមិនបានគ្រប់គ្រាន់ ដើម្បីទៅជួយរុញអាហារទាំងនោះពីក្នុងពោះវៀន នោះនឹងធ្វើឲ្យក្មេងអាចទល់លាមកកាន់តែខ្លាំង។ ដូចនេះយើងត្រូវណែនាំឲ្យកូនញ៉ាំទឹកឲ្យបានញឹកញាប់ ហើយក៏ត្រូវញ៉ាំទឹកដោះគោខ្លះៗដែរ ប៉ុន្តែមិនត្រូវឲ្យគេញ៉ាំគ្រឿងផ្អែមៗច្រើនពេកទេ។
ឲ្យកូនៗចូលបន្ទប់ឲ្យបានញឹកញាប់
និយាយជាមួយកូនៗអំពីគុណសម្បត្តិនៃការបន្ទោបង់នៅពេលព្រឹកភ្ញាក់ពីគេង ឬក្រោយពេលញ៉ាំអាហាររួច។ ក្មេងៗពេលបានស្ដាប់អំពីរឿងទាំងនេះ អាចធ្វើឲ្យពួកគាត់ចង់ចូលបន្ទប់ទឹកបន្ទោបង់ជាងមុន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម