ជាធម្មតា នៅពេលទារកលូតលាស់ធំទៅៗ សមត្ថភាពផ្សេងៗរបស់កូនក៏កាន់តែវិវត្តទៅមុខដូចជា រឹងដៃ រឹងជើង មើលឃើញច្បាស់ ចេះសើច ចេះចង់និយាយ ចឹងហើយ ប៉ាម៉ាក់ គួរប្រើវិធីសាស្ត្របែបណា ដើម្បីជំរុញឲ្យកូនកាន់តែឆាប់ចេះនិយាយ?
តិចនិកសម្រាប់ម៉ាក់ប៉ា ជួយជំរុញដល់ការនិយាយរបស់អាអូនតូចៗអាយុ ១ ឆ្នាំកន្លះ- ២ ឆ្នាំ
តាមការចែករំលែកបទពិសោធន៍របស់បងប្រុស យ៉ាន វឌ្ឍនៈ អ្នករកស៊ីម្នាក់នៅភ្នំពេញ ហើយក៏ជាប៉ាៗម្នាក់ ឲ្យដឹងថា នៅពេលដែលកូនគាត់រៀននិយាយដំបូងៗ គាត់តែងនិយាយឆ្លើយតបទៅកូនវិញ ទោះមិនយល់ពីអ្វីដែលកូននិយាយក៏ដោយ។ បងប្រុសបង្ហើបថា ភាគច្រើន វិធីសាស្ត្រដែលគាត់ប្រើ ដើម្បីជួយកូនឲ្យឆាប់ចាប់ពាក្យបាន គឺគាត់អានតាមអ៊ីនធើណេតខ្លះ និងដឹងតាមការណែនាំរបស់គ្រូពេទ្យជំនាញកុមារ ពេលយកកូនទៅពេទ្យខ្លះដូចជា៖
និយាយពាក្យច្រំដែលៗ៖ ការនិយាយពាក្យមួយដដែលៗ អាចជួយឲ្យកូនឆាប់ចាំពាក្យនោះ។ ឧទាហរណ៖ ពាក្យ”ស្បែកជើង” ម៉ាក់ប៉ា អាចសួរថា ស្បែកជើងកូននៅឯណា? ចាំប៉ាយកស្បែកជើងឲ្យ។ល។
ប្រើពាក្យណែនាំសាមញ្ញៗ៖ នៅចន្លោះអាយុ១-២ខួបនេះ កូនធំល្មមអាចយល់ពាក្យណែនាំស្រួលចាំដូចជា ពាក់អាវ ឬបិទ/បើកទ្វារជាដើម។ យើងជាម៉ាក់ប៉ាគួរប្រើពាក្យស្រួលស្ដាប់ ខ្លីៗ តែច្បាស់ដែលអាអូនងាយយល់។
សួរនាំកូនឲ្យបានច្រើន៖ យើងអាចសួរឲ្យអាអូនចំណាំរបស់ផ្សេងៗដូចជា ឯណាច្រមុះកូន ភ្នែក ឬមាត់កូន។ល។
លើសពីនេះ លោកវេជ្ជបណ្ឌិត ចាន់ ស៊ីណេត ឯកទេសផ្នែកទូទៅ បានណែនាំឲ្យដឹងថា ដើម្បីឲ្យកូនឆាប់ចេះនិយាយលឿន ម៉ាក់ប៉ាអាចប្រើតិចនិកប៉ុន្មាននេះ៖
– ស្នើឲ្យកូនជួយធ្វើអីមួយ
- បង្រៀនកូនច្រៀងចម្រៀង
– និយាយជាមួយកូនឲ្យបានច្រើន
– ឲ្យកូនលេងជាមួយក្មេង ។ល។
វេជ្ជបណ្ឌិតរូបនេះបន្ថែមថា ប៉ុន្តែ ម៉ាក់ប៉ាគ្រប់រូបត្រូវដឹង ការវិវត្តផ្នែកភាសារបស់កូនតូចៗ គឺមិនដូចគ្នាទាំងអស់នោះទេ ព្រោះពេលក្មេងខ្លះអាចឆាប់ចេះនិយាយបានលឿន ចំណែកក្មេងខ្លះមានបញ្ហាក្នុងការចាប់យកពាក្យនីមួយៗ និងពិបាកក្នុងការនិយាយចេញមក ហើយការវិវត្តផ្នែកភាសារបស់ក្មេងគឺអាស្រ័យទៅតាមអាយុ និងពេលវេលា។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕