ទម្លាប់គេង មាននាទីសំខាន់ណាស់សម្រាប់សុខភាពរាងកាយមនុស្សគ្រប់វ័យ ហើយចំពោះក្មេងៗ រឹតតែសំខាន់ ព្រោះជួយដល់ការលូតលាស់ផ្នែកបញ្ញាស្មារតី និងរាងកាយ។ បើម៉ាក់ប៉ា បង្កើតទម្លាប់គេមិនល្អដល់កូនៗ ច្បាស់ជាធ្វើឲ្យកូនមានសុខភាពមិនល្អ ប្រាជ្ញាក៏អន់ខ្សោយទៅតាមនឹងដែរ។ អ្នកវិទ្យាសាស្ត្រទើបរកឃើញថា ទម្លាប់គេង មានទំនាក់ទំនងទៅលើការធាត់ខ្លាំងចំពោះក្មេងៗ ជាហេតុប៉ាម៉ាក់ គួរពិចារណាឡើងវិញ។
ទម្លាប់គេងមិនល្អ ក៏ធ្វើឲ្យកូនក្មេងធាត់ខ្លាំងដែរ!
ត្រួតពិនិត្យដោយ គឹម កាណែល
១- ទំនាក់ទំនងរវាងការគេងរបស់ក្មេង និងភាពធាត់ខ្លាំង
រយៈពេល ៣ ទសវត្សរ៍កន្លងមកនេះ ក្មេងៗមានអាយុពី ២-៥ ឆ្នាំ អត្រាធាត់ខ្លាំង គឺបានកើនឡើងរហូតដល់ទ្វេដង។ សម្រាប់ក្មេងមានអាយុពី ៦-១១ ឆ្នាំ គឺឡើងជិត ៣ដង ហើយក្មេងជំទង់អាយុពី ១២-១៩ ឆ្នាំវិញមានការកើនឡើងទ្វេដងផងដែរ។ ការសិក្សាមួយ បានធ្វើឡើងអំឡុងខែកញ្ញា ឆ្នាំ ២០១០ បង្ហាញថា ទារក និងក្មេងៗ គេងមិនបានគ្រប់គ្រាន់នៅពេលយប់ អាចងាយប្រឈមវិវត្តទៅជាជំងឺធាត់ មុនពេលធំពេញវ័យ។ ដូចគ្នានេះដែរ ការសិក្សាមួយទៀត បង្ហាញថា ការគេងពេលថ្ងៃ គឺមិនអាចជំនួសដល់ការគេងពេលយប់បាននោះទេ។
២- គេងមិនគ្រប់គ្រាន់អាចបណ្តាលឲ្យក្មេងធាត់ខ្លាំង
ដើម្បីមើលឃើញពីទំនាក់ទំនងគ្នារវាងទម្លាប់គេងរបស់ក្មេង និងភាពធាត់ ធ្លាប់មានការសិក្សាមួយ បានធ្វើឡើងដោយលោកវេជ្ជបណ្ឌិត Janice F. Bell រួមជាមួយសាស្ត្រាចារ្យនៅឯសាកលវិទ្យាល័យវ៉ាស៊ីនតោន សហរដ្ឋអាមេរិក ដោយធ្វើការស្រាវជ្រាវលើក្មេងៗ សរុប ១,៩៣០នាក់ មានអាយុរហូតដល់ ១៣ ឆ្នាំ និងបានប្រមូលទិន្នន័យចំនួនពីរដង គឺនៅឆ្នាំ ១៩៩៧ និងឆ្នាំ ២០០២។
គេបែងចែកក្មេងទាំងអស់ជាពីរក្រុម មួយក្រុមសម្រាប់ក្មេងក្រោមអាយុ ៤ឆ្នាំ និងមួយក្រុមទៀតសម្រាប់ក្មេងអាយុពី ៥-១៣ ឆ្នាំ។ ក្រោយពីធ្វើការត្រួតពិនិត្យលើសន្ទស្សន៍ម៉ាស់រាងកាយ (BMI) ក្មេងៗទាំងអស់មក អ្នកស្រាវជ្រាវរកឃើញថា មានក្មេង ៣៣%ក្នុងក្រុមទី ១ និង ៣៦% ក្នុងក្រុមទី ២ មានបញ្ហាលើសទម្ងន់ ឬជំងឺធាត់។
ចំពោះក្មេងក្នុងក្រុមទី ១ ដោយសារការគេងរយៈពេលខ្លីនៅពេលយប់ បានឃើញថាមានការផ្សារភ្ជាប់នឹងការកើនឡើងហានិភ័យនៃការលើសទម្ងន់។ ចំពោះក្មេងនៅក្នុងក្រុមទី ២ បានឃើញថាពួកគេមានពេលវេលាគេងគ្រប់គ្រាន់នៅឆ្នាំដំបូង ហើយក៏មិនបានឃើញមានការទាក់ទងគ្នាទៅនឹងការឡើងទម្ងន់ដែរ។ នៅឆ្នាំបន្ទាប់ទៀត លទ្ធផលរកឃើញថា ក្មេងៗមិនមានពេលគ្រប់គ្រាន់ដើម្បីគេង នាំឲ្យមានការផ្លាស់ប្តូរពីទម្ងន់ធម្មតា ទៅជាជំងឺធាត់វិញ។ លើសពីនេះ ការសិក្សារកឃើញទៀតថា ការគេងនៅពេលថ្ងៃ អាចមានឥទ្ធិពលតិចតួចលើហានិភ័យការលើសទម្ងន់ ឬជំងឺធាត់ ដូចគ្នា។
អត្ថបទពាក់ព័ន្ធ៖
- តើល្អទេ ឲ្យកូនតូចចូលរៀនមុនគ្រប់អាយុ?
- ស្តាប់ហេតុផលនេះហើយ ប៉ាម៉ាក់ឈប់ប្រើស្លាបព្រាធម្មតាវាស់ថ្នាំឲ្យកូនទៀតទៅ!
៣- អ្វីប៉ាម៉ាក់គួរធ្វើ
ទោះបីជាលទ្ធផលគួរឲ្យពេញចិត្តក៏ដោយ ប៉ុន្តែមូលហេតុស្ថិតនៅពីក្រោយរោគសញ្ញានេះ នៅមិនទាន់អាចពន្យល់បានជាក់លាក់នៅឡើយ។ អ្នកស្រាវជ្រាវ នៅតែមិនទាន់បានដឹងថា តើបញ្ហាការគេង អាចរំខាន និងមានឥទ្ធិពលលើថាមពលក្មេងដូចម្តេចនៅឡើយទេ។ ករណីនេះ អាចមកពីការគេងមិនគ្រប់គ្រាន់នៅពេលយប់ អាចជះឥទ្ធិពលដល់ខួរក្បាល ដែលគ្រប់គ្រងលើភាពអស់កម្លាំង និងការធ្វើមេតាប៉ូលីសក្នុងខ្លួន។
ក្នុងការសិក្សាបានបង្ហាញច្បាស់ថា កង្វះខាតរយៈពេលគេងនៅពេលយប់ ដើរតួនាទីយ៉ាងសំខាន់ក្នុងស្ថានភាពធាត់របស់ក្មេងៗ ដូច្នេះក្នុងនាមជាប៉ាម៉ាក់ ត្រូវយកចិត្តទុកដាក់លើការគេងកូនៗជាទីស្រឡាញ់ឲ្យបានត្រឹមត្រូវ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម