ប៉ាម៉ាក់មានកូនតូច ឬទើបនឹងកើតប្រាកដជាឆ្ងល់មិនខានបើឃើញអូនៗភ្ញាក់ពីគេងមានញើសសើមជោក ពិសេសនៅពេលយប់។ ការបែកញើសនៅពេលយប់ ឬពេលថ្ងៃក្ដី អាចកើតមានលើមនុស្សគ្រប់វ័យ ហើយការបែកញើសលើកូនតូច ឬកូនទើបកើតក៏ជារឿងធម្មតាដែរក្នុងករណីជាច្រើន។
កូនតូចឧស្សាហ៍បែកញើសច្រើន មានបញ្ហាអីអត់?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ម៉េចបានកូនបែបញើសច្រើន? រឿងមួយដែលម៉ាក់ៗគួរដឹងគឺថាអូននៅតូច កាយសប្បទានៅក្មេងខ្ចី និងកំពុងតែហ្វឹកហាត់គ្រប់គ្រងសីតុណ្ហភាពក្នុងរាងកាយ។ ពេលខ្លះទៀត ម៉ាក់ៗអាចពាក់អាចឲ្យអូនៗច្រើនជាន់ពេក ធ្វើឲ្យអូនៗក្ដៅ នាំឲ្យបែកញើសដែរ។ យ៉ាងណាកុំចេះតែស្មាន តស់ស្វែងយល់ពីមូលហេតុទាំងអស់គ្នា។
១. កូនយំខ្លាំង
ការយំ សម្រាប់អូនៗទើបកើត ប្រៀបដូចជាមនុស្សធំធ្វើការធ្ងន់អ៊ីចឹងដែរ ដែលត្រូវការថាមពលខ្លាំង។ ដូចនេះ ប្រសិនជាអូនៗយំខ្លាំង ឬយំក្នុងរយៈពេលយូរ អូនៗអាចនឹងមានញើសចេញច្រើន ហើយមុខឡើងក្រហមទៀតផង។ បើសិនជាបែកញើសដោយសារតែការយំ នោះញើសនឹងបាត់ទៅវិញ នៅពេល អាអូនឈប់យំ។
២. ពាក់អាវច្រើនជាន់
ម៉ាក់ៗខ្លះពាក់អាវឲ្យកូនច្រើនជាន់ហើយ ថែមទាំងដណ្ដប់ភួយឲ្យទៀត ព្រោះខ្លាចកូនរងារ ដែលនេះវាមិនជារឿងអាក្រក់អីទេ តែថាបើពាក់អាវ ឬគ្រប់ច្រើនជាន់ពេក អាចធ្វើឲ្យកូនក្ដៅស្អុះស្អាប់ ពិបាកនៅ និងធ្វើឲ្យចេញញើស ព្រោះស្បែកមិនអាចដកដង្ហើមបាន។
៣. ផ្ដាសាយ ក្ដៅខ្លួន ឬឆ្លងរោគ
បើអូនៗស្រាប់តែចេញញើសច្រើន ដែលពីមុនមិនសូវបែកញើស នោះអាចថាលើកនេះអូនៗមានជំងឺផ្ដាកសាយ ឬឆ្លងរោគហើយ។ អាការៈក្ដៅខ្លួន ជាសញ្ញាមួយនៃការឆ្លងរោគ ហើយម៉ាក់ៗគួរវាស់កម្ដៅកូនមើលដែរ។ ជាធម្មតាយើងអាចប្រើថ្នាំបញ្ចុះកម្ដៅបានដើម្បីបន្ធូររោគសញ្ញា ប៉ុន្តែយើងក៏គួរពិគ្រោះជាមួយគ្រូពេទ្យមុននឹងប្រើ ពិសេសអូនៗអាយុតិចជាង៦ខែ។
៤. មានជំងឺHyperhidrosis
ជំងឺ hyperhidrosis ធ្វើឲ្យមនុស្សយើងមានចេញញើសច្រើនហួសហេតុ ទោះបីជាស្ថិតក្នុងស្ថានភាពអាកាសធាតុត្រជាក់ក៏ដោយ។ ជំងឺនេះអាចធ្វើឲ្យបែកញើសនៅកន្លែងជាក់លាក់ខ្លះនៃរាងកាយ មានដូចជាដៃ ក្លៀក ឬជើង ហើយអាចបែកញើសនៅកន្លែងទាំងនេះក្នុងពេលតែមួយក៏មាន។
ជំងឺ hyperhidrosis ច្រើនធ្វើឲ្យចេញញើសនៅពេលភ្ញាក់ពីគេង និងពេលគេង។ ពេលខ្លះជំងឺនេះក៏អាចបង្កឲ្យមានស្ថានភាពធ្ងន់ធ្ងរដែរ ដែលយើងត្រូវពិភាក្សាជាមួយគ្រូពេទ្យ ហើយគ្រូពេទ្យអាចធ្វើតេស្តមួយចំនួនដើម្បីដឹងការពិត។
ករណីមួយទៀត ក៏មានដែរជំងឺ hyperhidrosis ដែលគេហៅថាជំងឺhyperhidrosis ទូទៅ ដែលអាចធ្វើឲ្យបែកញើសពេញទាំងរាងកាយ ដែលនេះជាករណីកម្រ តែមិនគ្រោះថ្នាក់ធ្ងន់ធ្ងរនោះទេ ហើយស្ថានភាពនេះនឹងបានធូរស្រាលវិញនៅពេលអូនៗមានវ័យកាន់តែច្រើន។
៥. ជំងឺបេះដូងពីកំណើត
ទារកដែលមានជំងឺបេះដូងពីកំណើត បែកញើសស្ទើរតែគ្រប់ពេល ពីព្រោះរាងកាយរបស់ពួកគេត្រូវការធ្វើការខ្លាំងដើម្បីច្របាច់ឈាមឲ្យរត់ទៅកាន់សព្វរាងកាយ។ អ្នកជំនាញប៉ាន់ស្មានថា ទារកទើបកើតតិចជាង១ភាគរយ កើតមកមានជំងឺនេះ។
ក្មេងដែលមានជំងឺបេះដូងពីកំណើត នឹងជួបការលំបាកក្នុងការញ៉ាំអាហារ ហើយនឹងមានចេញញើសនៅពេលគេប្រឹងញ៉ាំអាហារ។ រោគសញ្ញាមួយចំនួនទៀតមានដូចជាមានឡើងស្នាមលើស្បែកនិងដកដង្ហើមរាក់ៗជាដើម។
ដូចនេះហើយ បើប៉ាម៉ាក់សង្កេតឃើញថាកូនមានបែកញើសច្រើន យើងគួរសម្រួលកន្លែងគេង ឬធ្វើឲ្យបរិស្ថាននៅជុំវិញកូនមានផាសុកភាពកុំឲ្យបែកញើសច្រើនពេក។ យ៉ាងណាបើយើងរៀបចំបែបនោះហើយ កូននៅតែបែកញើសច្រើនទៀត យើងគួរនាំកូនទៅពិគ្រោះជាមួយគ្រូពេទ្យជំនាញ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម