ចាប់តាំងចូលដល់ខែវស្សាមក ទឹកភ្លៀងបានធ្លាក់ចុះមកជាបន្ដបន្ទាប់ ប៉ុន្ដែពេលឈានដល់ពិធីបុណ្យភ្ជុំបិណ្ឌ ទឹកភ្លៀងហាក់ធ្លាក់ចុះញឹកញាប់ជាមុនក្នុងមួយថ្ងៃៗ ដោយមានពីបរិមាណតិចទៅច្រើន។ នៅពេលទឹកភ្លៀងធ្លាក់ចុះច្រើន កម្ដៅ និងពន្លឺព្រះអាទិត្យ ក៏ពុំសូវជះមកលើភពផែនដីយើងដែរ ដូច្នេះអាកាសធាតុ ក៏ចុះត្រជាក់ជាមុន ប៉ុន្ដែសម្បូរអ្នកឈឺច្រើន។
វេជ្ជបណ្ឌិត William Schaffner អ្នកជំនាញផ្នែកជំងឺឆ្លង នៅសាកលវិទ្យាល័យ Vanderbilt របស់អាមេរិក បញ្ជាក់ថា នៅរដូវភ្លៀងធ្លាក់ សីតុណ្ហភាពត្រជាក់ដូច្នេះ យើងប្រឈមខ្ពស់កើតជំងឺប្រព័ន្ធដង្ហើម។ លោកថា មានមូលហេតុ ២ ដែលយើងប្រឈមឆ្លងមេរោគប្រព័ន្ធដង្ហើម។
គណនាថ្ងៃមេជីវិតញីទុំធ្លាក់ ចុចទីនេះ!
ទី១ ដោយសារនៅរដូវភ្លៀងធ្លាក់ យើងចំណាយពេលច្រើន នៅក្នុងបន្ទប់បិទជិត និងស្ថិតនៅជិតៗគ្នា ដូច្នេះវាងាយបង្កឲ្យឆ្លងមេរោគ នៅពេលយើងមានទំនាក់ទំនងផ្ទាល់ជាមួយគ្នារយៈពេលយូរ។ ទី២ ដោយសារនៅរដូវភ្លៀង សីតុណ្ហភាពធ្លាក់ទាប ដូច្នេះវាជាកត្តាអំណោយផលមួយ សម្រាប់មេរោគ អាចរស់នៅបានកាន់តែយូរ ក្នុងបរិស្ថានដែលអាកាសធាតុត្រជាក់ និងសំណើម។
អ្នកជំនាញបន្ដថា “យើងដឹងថា ជំងឺផ្ដាសាយ បណ្ដាលមកពីវីរុសជាច្រើន ហើយជំងឺរលាកសួត បណ្ដាលមកពីវីរុស ឬបាក់តេរី ដូច្នេះបើយើងឈឺ នោះមានន័យថា យើងរងការប៉ះពាល់វីរុស ឬបាក់តេរី មិនមែនដោយទឹកភ្លៀង ឬអាកាសធាតុទេ“។
![ផ្តាសាយ](https://cdn.hellokrupet.com/wp-content/uploads/2021/09/Re-opt-44.jpg)
ដើម្បីកាត់បន្ថយហានិភ័យ នៃការឆ្លងមេរោគ នៅរដូវភ្លៀង មជ្ឈមណ្ឌលបង្ការ និងគ្រប់គ្រងជំងឺឆ្លងរបស់អាមេរិក ណែនាំឲ្យលាងសម្អាតដៃ ជាមួយសាប៊ូ រយៈពេលយ៉ាងតិច ២០វិនាទី និងចៀសវាងការយកដៃទៅប៉ះជាមួយមុខ ភ្នែក ច្រមុះ ឬមាត់។ មជ្ឈមណ្ឌលដដែលនេះ ក៏ណែនាំឲ្យចៀងវាងរាល់ទំនាក់ទំនងជិតស្និទ្ធិជាមួយ អ្នកដែលកំពុងក្អក និងកណ្ដាស់ និងសម្លាប់មេរោគនៅតាមទីតាំងណា ដែលមានមនុស្សប៉ះពាល់ញឹកញាប់។