ល័ក្តអាហារពណ៌ក្រហមលេខ៣ អាចបង្កឱ្យកើតជំងឺមហារីក

កាលពីថ្ងៃទី ១៦ ខែមករា ឆ្នាំ ២០២៥ រដ្ឋបាលចំណីអាហារ និងឱសថរបស់​​សហរដ្ឋអាមេរិកបានហាមឃាត់ការ ប្រើល័ក្តអាហារពណ៌ក្រហម​លេខ​៣ ក្នុងអាហារ ភេសជ្ជៈ អាហារបំប៉ន និងថ្នាំ ដោយផ្អែកលើភស្តុតាង​​ដែលបាន ស្រាវជ្រាវតាំងពីយូរឆ្នាំមកហើយលើសត្វកណ្តុរដែល ល័ក្តអាហារពណ៌ក្រហមលេខ៣ បណ្តាលឱ្យកើតមហារីកក្រពេញ​ទីរ៉ូអុីត។ យើងធ្វើម៉េចដឹងថា ចំណីអាហារ ភេសជ្ជៈ ថ្នាំ និងអាហារបំប៉ន​ណាខ្លះមាន​ដាក់​ល័ក្ត​អាហារពណ៌ក្រហមលេខ៣?

ល័ក្តអាហារពណ៌ក្រហមលេខ៣ មានឈ្មោះជាភាសាអង់គ្លេសថា FD&C Red No. 3, ​Red Dye​ No. 3, Red Dye 3, ឬ Erythrosine ជាល័ក្តសំយោគ​ដែលត្រូវបានដាក់​ចូលអាហារ ភេសជ្ជៈ ថ្នាំ និងអាហារបំប៉នចំនួន​ដើម្បី​ឱ្យមានពណ៌ក្រហមស្រស់ ដូចផ្លែឆឺរីក្រហម ស្អាតទាក់ភ្នែក។ ចំណីអាហារ ភេសជ្ជៈ អាហារបំប៉ន ឬថ្នាំពេញនិយម ដែល​មាន​ផ្ទុកល័ក្តអាហារពណ៌ក្រហមលេខ៣ មានដូចជា៖

• ស្ករគ្រាប់៖ ជាពិសេស ស្ករគា្រប់សម្រាប់រដូវកាលបុណ្យទាន ដូចជា បុណ្យចូលឆ្នាំចិន បុណ្យទិវា​នៃក្តី​ស្រឡាញ់ បុណ្យហាឡូវីនជាដើម ដែល​មានរសជាតិស្រ្តបឺរី ឬមានពណ៌ក្រហម
• ដំណាប់ផ្លែឆឺរីពណ៌ក្រហមស្រស់ដាក់លម្អស្រាក្រឡុក នំខេក ឬការ៉េម
• ការ៉េមរសជាតិស្រ្តបឺរី ឬមានពណ៌ក្រហម
• វីតាមីនទំពារហ្គាំមី ឬវីតាមីនកុមាររសជាតិស្រ្តបឺរី ឬមានពណ៌ក្រហម
• ថ្នាំប្រភេទស៊ីរ៉ូរសជាតិស្រ្តបឺរី ឬមានពណ៌ក្រហម
• នំ នំខុកឃី នំដូណាត់ នំខេក ឬនំខាប់ខេកជាដើមរសជាតិស្រ្តបឺរី ឬដែលមានស្ករពណ៌ក្រហមស្រោប ឬ​ដាក់ពីលើ
• ទឹកដោះគោជូរ ឬយ៉ាអួររសជាតិស្រ្តបឺរី
• ភេសជ្ជៈរសជាតិស្រ្តបឺរី ឬមានពណ៌ក្រហម
• ចាហ៊ួយ ឬចាហ៊ួយស្វិតរសជាតិស្រ្តបឺរី ឬមានពណ៌ក្រហម
• ដំណាប់ស្រ្តបឺរី
• ទឹកស៊ីរ៉ូរសជាតិស្រ្តបឺរី ឬមានពណ៌ក្រហមជាដើម

ដើម្បីដឹងថា ចំណីអាហារ ភេសជ្ជៈ អាហារបំប៉ន ឬថ្នាំដែលមានផ្ទុកល័ក្តអាហារពណ៌ក្រហមលេខ៣ អត់ យើង​អាចមើលក្នុងតារាងព័ត៌មានអាហារូបត្ថម្ភ ឬជីវជាតិអាហាររបស់ចំណីអាហារ ភេសជ្ជៈ អាហារបំប៉ន ឬថ្នាំ​ទាំងនោះ​ដោយរកមើលពាក្យ FD&C Red No. 3, Red Dye No. 3, Red Dye 3, ឬ Erythrosine។

ក្រៅពីល័ក្តអាហារពណ៌ក្រហមលេខ៣ យើងគួរចៀសវាងចំណីអាហារ ភេសជ្ជៈ អាហារបំប៉ន ឬថ្នាំដែល​មាន​ផ្ទុក​ល័ក្តអាហារពណ៌ក្រហម​លេខ​៤០ (Red No. 40) ល័ក្តអាហារពណ៌លឿងលេខ៥ និង ៦ (Yellow No. 5​ និង Yellow No. 6 ) ល័ក្តអាហារពណ៌ខៀវលេខ១ និង ២(Blue 1 និង Blue 2) ល័ក្តអាហារពណ៌បៃតងលេខ៣ (Green 3) ផងដែរ ព្រោះល័ក្តអាហារទាំងនេះមិនត្រឹមតែប៉ះពាល់សុខភាព ឬបង្កឱ្យកើតជំងឺមហារីកទេ ថែម​ទាំង​អាចប៉ះពាល់ដល់សរសៃប្រសាទ និង​អាកប្បកិរិយាទៀត​ផង ជាពិសេសកុមារ។

អត្ថបទគួរអាន៖

• ដឹងថាធ្វើការរវល់ច្រើនមិន​សូវ​បាន​ចម្អិន​ម្ហូប​ តែអាហារប្រភេទនេះគួរកាត់បន្ថយខ្លះ
• លាបពណ៌សក់ និងអ៊ុតសក់ត្រង់ច្រើន អាចប្រឈមជំងឺមហារីកសុដន់
• គួរជ្រើសរើសក្រែមលាបមាត់បែបណាទើបសុវត្ថិភាព?
• កុំចេះតែផឹក! ភេសជ្ជៈផ្អែម បង្កជំងឺមហារីកច្រើនមុខ
• ករណីមានជំងឺទឹកនោមផ្អែម អាចប្រឈមខ្ពស់ កើតជំងឺមហារីក ១ទៀត
• ញ៉ាំអាហារទាំងនេះប្រចាំថ្ងៃមិនល្អទេ អាចប្រឈមជំងឺមហារីក