បញ្ហាធាត់លើសទម្ងន់ ធ្វើឲ្យយើងឈឺសន្លាក់ដែរឬអត់?

យើងសុទ្ធតែដឹងហើយថាបញ្ហាធាត់លើសទម្ងន់ គឺមិនមែនល្អសម្រាប់សុខភាពយើងនោះទេ។ បញ្ហាធាត់លើសទម្ងន់អាចប្រឈមជាមួយនឹងជំងឺបេះដូង ស្ទះសរសៃឈាម និងទឹកនោមផ្អែម នឹងប្រឈមកាន់តែខ្ពស់នៅពេល BMI របស់យើងកាន់តែកើនឡើង។ ដូចគ្នាដែរបញ្ហាឈឺតាមសន្លាក់ដែលតែងតែកើតឡើងជារើយៗនោះ ក៏មានទាក់ទងជាមួយការឡើងទម្ងន់នេះដែរ ហើយមួយទៀតនោះវាមិនមែនកើតតែលើសន្លាក់ដែលទ្រទម្ងន់នោះទេ។

១-តើទម្ងន់ធ្វើឲ្យប៉ះពាល់ដល់សន្លាក់ដូចម្ដេច?

សន្លាក់មានតួនាទីសំខាន់ដើម្បីឲ្យខ្លួនរបស់យើងធ្វើចលនាបានពេញលេញ។ ប៉ុន្តែមានធ្លាប់ឆ្ងល់ទេថា តើទម្ងន់ខ្លួនរបស់យើងអាចមានឥទ្ធិពលដល់ការធ្វើចលនារបស់ដងខ្លួនបានដូចម្ដេច? ពេលយើងដើរលើដីរាបស្មើ ជង្គង់នឹងទ្រទម្ងន់១ដងកន្លះនៃទម្ងន់សរុបនៃដងខ្លួនរបស់យើង។ បានន័យថា បើមនុស្សម្នាក់មានទម្ងន់ ៨០គីឡូក្រាម នោះជង្គង់របស់យើងត្រូវទ្រទម្ងន់រហូតដល់ ១២០គីឡូពេលមនុស្សយើងបោះជំហានម្ដងៗ។

ក្នុងករណីយើងដើរលើកន្លែងមិនរាបស្មើវិញ ទម្ងន់ដែលជង្គង់ត្រូវទ្រគឺកាន់តែខ្លាំងទៅទៀត។ កម្លាំងដែលជង្គង់ត្រូវទ្រនឹងឡើងដល់ ២ ទៅ ៣ដងនៃទម្ងន់សរុបរបស់ដងខ្លួន នៅពេលដើរឡើងទីខ្ពស់ និងពេលយើងចុះជណ្ដើរ ឬឱនចងខ្សែស្បែកជើង ហើយបើពេលឱនរើសរបស់ជ្រុះវិញ កម្លាំងនោះនឹងឡើងដល់ ៤ ទៅ ៥ ដងនៃទម្ងន់ដងខ្លួនឯណោះ។

ពេលសន្លាក់ត្រូវរងទម្ងន់ធ្ងន់កាន់តែយូរ យើងនឹងប្រឈមជាមួយការកើតជំងឺរលាកឆ្អឹង និងសន្លាក់ ដោយសារតែលើសទម្ងន់ជាមិនខាន។ ប៉ុន្តែទោះជាយ៉ាងណាក្ដី ក៏បញ្ហារលាកឆ្អឺង និងសន្លាក់មិនមែនបណ្ដាលមកពីបញ្ហាលើសទម្ងន់តែមួយមុខនោះទេ។ ការសិក្សាស្រាវជ្រាវបានរកឃើញថាបញ្ហារលាកទៅវិញទេជាមូលហេតុចម្បងនោះ។

អត្ថបទពាក់ព័ន្ធ៖

២- លើសទម្ងន់ ជាមួយជំងឺរលាកសន្លាក់

ដោយសារជំងឺរលាក់សន្លាក់ឆ្អឹង និងឆ្អឹង អាចកើតមានឡើងទាំងសន្លាក់ដែលទ្រទម្ងន់ និងសន្លាក់ដែលមិនទ្រទម្ងន់ ទើបបង្ហាញថាការរលាកជាប្រព័ន្ធនៅក្នុងខ្លួន អាចផ្ដល់ការពន្យល់បានពីការដែលទម្ងន់ខ្លួនធ្ងន់ពេកអាចនាំឲ្យមានបញ្ហានេះ។ ទាំងនេះក៏បានពន្យល់ដែរថា ហេតុអ្វីបានជាទម្ងន់ខ្លួនយើងក៏អាចទាក់ទងនាំឲ្យមានជំងឺរលាក់សន្លាក់ Rheumatoid ដែលជាជំងឺប្រព័ន្ធភាពស៊ាំប្រឆាំងខ្លួនឯង នាំឲ្យមានការរលាកនៅក្នុងខ្លួន និងនាំឲ្យឈឺសន្លាក់។

សារធាតុគីមីដែលធ្វើឲ្យរលាកមានក្នុងខ្លាញ់ ត្រូវបានគេរកឃើញថាវាទៅប៉ះពាល់ដល់ប្រព័ន្ធសាច់ដុំ និងឆ្អឹង ប្រព័ន្ធបេះដូង និងសរសៃឈាមបេះដូង។ ក្នុងនោះមាន adipokines ដែលផលិតឡើងចេញពីកោសិកាខ្លាញ់ និងធ្វើឲ្យមានការរលាកកើតឡើង។ កត្តាបង្កការរលាកនេះ អាចបកស្រាយថា មិនថាសន្លាក់ដែលទ្រទម្ងន់ ឬមិនទ្រទម្ងន់ដូចជាសន្លាក់នៅតាមដៃជាដើម ក៏អាចប៉ះពាល់ដូចគ្នា។

៣- វិធីកាត់បន្ថយការឈឺសន្លាក់ដោយការសម្រកទម្ងន់

ការសម្រកទម្ងន់បន្តិចម្ដងៗ ត្រូវប្រើពេលយូរក្នុងការកាត់បន្ថយសម្ពាធនៅលើជង្គង់ និងការពារសន្លាក់ពីបញ្ហារលាក។ ការសិក្សាបានបង្ហាញថា ពេលយើងសម្រកគីឡូបាន ១០ ទៅ ១៥ ផោន ឬប្រហែលពី៤ទៅ៦គីឡូក្រាម នោះយើងអាចកាត់បន្ថយការប្រឈមជាមួយជំងឺរលាកឆ្អឹង និងសន្លាក់នៅពេលខាងមុខបាន។

ប៉ុន្តែការប្រើចលនាច្រើន អាចមានការលំបាក ជាពិសេសពេលសន្លាក់របស់យើងកំពុងតែឈឺ ហើយការហាត់ប្រាណតែមួយមុខ ក៏មិនអាចជួយឲ្យយើងស្រកគីឡូបានងាយនោះទេ។ តែយើងក៏អាចចាប់ផ្ដើមហាត់ប្រាណបន្ដិចម្ដងៗ និងព្យាយាមគ្រប់គ្រងកម្រិតកាឡូរីដែលយើងញ៉ាំចូល ដើម្បីឲ្យងាយស្រួលស្រកគីឡូ ក៏ដូចជាជួយឲ្យមានសុខភាពល្អដូចគ្នា។

ត្រួតពិនិត្យដោយ Editor HK

អត្ថបទដោយ ណៃ ទូច · កែ 18/07/2020

បញ្ហាធាត់លើសទម្ងន់ ធ្វើ​ឲ្យយើងឈឺសន្លាក់ដែរឬអត់?

១-តើទម្ងន់ធ្វើឲ្យប៉ះពាល់ដល់សន្លាក់ដូចម្ដេច?

២- លើសទម្ងន់ ជាមួយជំងឺរលាកសន្លាក់

៣- វិធីកាត់បន្ថយការឈឺសន្លាក់ដោយការ​សម្រកទម្ងន់

បញ្ហាធាត់លើសទម្ងន់ ធ្វើឲ្យយើងឈឺសន្លាក់ដែរឬអត់?

៣- វិធីកាត់បន្ថយការឈឺសន្លាក់ដោយការសម្រកទម្ងន់