ការគេងលើកជើងផ្អែកជញ្ជាំង គឺជាលំហាត់យូហ្កាងាយស្រួលដែលយើងអាចធ្វើជំនួសលំហាត់ដាំក្បាលចុះក្រោម ហើយទុកនាទីឱ្យទំនាញផែនដីធ្វើការលើជើង និងរាងកាយរបស់យើង។ តើការគេងលើកជើងផ្អែកជញ្ជាំងផ្តល់ប្រយោជន៍អ្វីខ្លះដល់សុខភាពយើង?
១. ជួយឱ្យយើងស្ងប់អារម្មណ៍
ការគេងលើកជើងផ្អែកជញ្ជាំងប៉ះពាល់ដោយផ្ទាល់ដល់ប្រព័ន្ធសរសៃប្រសាទ និងធ្វើឱ្យអារម្មណ៍យើងស្ងប់ភ្លាមៗ។ ក្នុងអំឡុងពេលធ្វើលំហាត់នេះ យើងអាចដក់ដង្ហើមវែងៗដើម្បីទទួលបានលទ្ធផលទ្វេដង ព្រោះការដកដង្ហើមបានវែងៗអាចកាត់បន្ថយអត្រាចង្វាក់បេះដូងលោតដែលជួយឱ្យយើងបន្ធូរអារម្មណ៍ កាត់បន្ថយការថប់បារម្ភ ភាពតានតឹងបានយ៉ាងមានប្រសិទ្ធភាព។
២. ជួយបំបាត់អាការៈចុករួយស្រពន់ជើង
ការគេងលើកជើងផ្អែកជញ្ជាំងអាចជួយសន្ធឹងសរសៃពួរនៅភ្លៅខាងក្រោយដែលនឹងជួយបំបាត់អាការៈចុករួយស្រពន់ជើង បន្ទាប់ពីការធ្វើដំណើររយៈពេលវែង ការឈរ ឬអង្គុយនៅមួយកន្លែងពេញមួយថ្ងៃ។
កាលណាត្រគាករបស់យើងកាន់តែខិតទៅជិតជញ្ជាំង សរសៃពួរនៅភ្លៅខាងក្រោយរបស់យើងនឹងសន្ធឹងកាន់តែវែងដែរ។
៣. ជួយកាត់បន្ថយអាការៈចុករួយង្កេះផ្នែកខាងក្រោម
ការគេងលើកជើងផ្អែកជញ្ជាំងអាចជួយសន្ធឹងឆ្អឹងខ្នងចង្កេះ និងសាច់ដុំខ្នងដែលនឹងជួយកាត់បន្ថយអាការៈចុករួយចង្កេះផ្នែកខាងក្រោម។
![ឈឺចង្កេះ](https://cdn.hellokrupet.com/wp-content/uploads/2021/11/shutterstock_1271943175.jpg)
ចង់គណនា BMI ចុចទីនេះ!
ចង់គណនា BMR ចុចទីនេះ!
ចង់ពិនិត្យជំងឺសរសៃឈាមបេះដូង ចុចទីនេះ!
ចង់គណនារង្វាស់ចង្វាក់បេះដូង ចុចទីនេះ!
៤. បង្កើនចលនាឈាមរត់
ការធ្វើលំហាត់ប្រាណបែបនេះ អាចជួយកាត់បន្ថយអាការៈហើមជើងដោយជួយបង្ហូរសារធាតុរាវដែលចាល់ក្នុងជើងមករាងកាយវិញ។ លើសពីនេះទៅទៀត ទំនាញផែនដីជួយឱ្យឈាមហូរត្រឡប់ទៅបេះដូងវិញបានល្អដែលនឹងជួយបង្កើនចលនាឈាមរត់ក្នុងខ្លួនរបស់យើង។
៥. ជំរុញការរំលាយអាហារ
ការគេងលើកជើងផ្អែកជញ្ចាំងអាចជួយសម្រួលចរន្តឈាមក្នុងពោះ និងកាត់បន្ថយការសង្កត់ទៅលើក្រពះ និងពោះវៀនដែល ការសង្កត់នេះប៉ះពាល់ដល់ការរំលាយអាហាររបស់យើង និងធ្វើឱ្យយើងហើមពោះ ច្រាល់ទឹកអាស៊ីដក្រពះ និងទល់លាមក។
៦. កាត់បន្ថយអាការៈឈឺក្បាលធម្មតា និងឈឺក្បាលប្រកាំង
ការគេងលើកជើងផ្អែកជញ្ជាំងជាប្រចាំអាចរួមចំណែកកាត់បន្ថយអាការៈការឈឺក្បាលធម្មតា និងឈឺក្បាលប្រកាំង ព្រោះការលើកជើងឡើងលើអាចជំរុញរំហូរឈាមត្រលប់ទៅកាន់បេះដូង និងបង្កើនចលនាឈាមរត់ក្នុងខ្លួនដែលធ្វើឱ្យរាងកាយយើងទទួលបានអុកស៊ីសែនគ្រប់គ្រាន់។
របៀបគេងលើកជើងផ្អែកជញ្ជាំង
យើងអាចអង្គុយនៅលើកម្រាលហាត់យូហ្កា ហើយចំហៀងខ្លួនខាងធ្វេងរបស់យើងត្រូវជាប់នឹងជញ្ជាំង។ បន្ទាប់មកគេងលើកម្រាល លើកជើងទាំងពីរផ្អែកជាប់នឹងជញ្ជាំងដោយយកដៃជួយបង្វិលខ្លួន រួចរំកិលគូទរបស់យើងឱ្យជិតជញ្ជាំងតាមដែលអាចធ្វើបាន។
ជាចុងក្រោយ យើងត្រូវបន្ធូរសាច់ដុំទាំងអស់នៅលើរាងកាយយើង បិទភ្នែក ដាក់ដៃនៅលើពោះ ឬនៅលើឥដ្ឋ និងដកដង្ហើមវែងៗ។ យើងត្រូវស្ថិតនៅក្នុងឥរិយាបទនេះឱ្យបានយូរតាមដែលអាចធ្វើទៅបានប្រហែលជា ១០ ទៅ ១៥ នាទី។
ដើម្បីឈប់ហាត់លំហាត់នេះយើងត្រូវទាញជង្គង់របស់យើងដាក់លើទ្រូង រួចហើយរមៀលខ្លួនទៅចំហៀងខ្លួន។ បន្ទាប់មកសម្រាកមួយសន្ទុះ រួចក្រោកឡើងអង្គុយយឺតៗ។ ជាចុងក្រោយ យើងត្រូវរលាស់ជើងទាំងពីរដើម្បីជួយសម្រួលរំហូរឈាម។
យើងអាចដាក់ទ្រនាប់នៅក្រោមត្រគាក ក្រោមកដើម្បីឱ្យស្រួលខ្លួន និងពាក់ស្រោមជើងក្រាស់ដើម្បីការពារការឈឺកែងជើង។ បន្ទាប់ពីហាត់លំហាត់នេះរួច យើងគួរចៀសវាងញុំាអាហារក្នុងរយៈពេល ២០ នាទី ឬចៀសវាងហាត់លំហាត់នេះបន្ទាប់ពីញុំាអាហាររួច។
ការគេងលើកជើងផ្អែកជញ្ជាំងអាចជួយឱ្យយើងមានសុខភាពល្អ តែអ្នកមានជំងឺពុកឆ្អឹង ដក់ទឹកក្នុងភ្នែក លើសសម្ពាធឈាម ស្រ្តីពពោះ ឬកំពុងមករដូវមិនអាចហាត់លំហាត់នេះបានទេ។
អត្ថបទគួរអាន៖
លំហាត់ប្រាណបែបលាតសន្ធឹងជើងចុះឡើង ជួយដល់លំហូរឈាម ប្រយោជន៍នៃការពត់តម្រង់ខ្លួន មិនគួរមើលរំលង ហាត់ប្រាណមានទំនាក់ទំនងបែបណាជាមួយសុខភាពបេះដូង? ហាត់ប្រាណពេលព្រឹក អាចបន្ថយហានិភ័យកើតជំងឺមហារីក ឈឺជង្គង់ក្រោយដើរច្រើន ឬហាត់ប្រាណរួចគួរធ្វើម៉េច? ដើរហាត់ប្រាណមួយថ្ងៃប៉ុន្មានជំហានទើបល្អ? ចំណុចសំខាន់
ការគេងលើកជើងផ្អែកជញ្ជាំងអាចផ្តល់ប្រយោជន៍ដល់សុខភាពយើងដូចជា៖
- ជួយឱ្យយើងស្ងប់អារម្មណ៍
- បំបាត់អាការៈចុករួយស្រពន់ជើង
- កាត់បន្ថយអាការៈចុករួយចង្កេះផ្នែកខាងក្រោម
- ជួយសម្រួលសាច់ដុំអាងត្រគាក
- បង្កើនចលនាឈាមរត់
- ជំរុញការរំលាយអាហារ
- កាត់បន្ថយអាការៈឈឺក្បាលធម្មតា និងឈឺក្បាលប្រកាំង