ជំងឺសរសៃឈាមបេះដូងនៅក្នុងប្រទេសកម្ពុជាយើងមានអត្រាអ្នកស្លាប់ខ្ពស់ជាងគេ បើធៀបនឹងជំងឺផ្សេងៗ ក្នុងនោះមានរួមទាំងជំងឺកាចសាហាវមហារីកផងដែរ នេះបើយោងតាមការចុះផ្សាយរបស់ទិនានុប្បវត្តិ PLOS GLOBAL PUBLIC HEALTH កាលពីឆ្នាំ ២០២២។
ថ្ងៃនេះយើងមកដឹងទាំងអស់គ្នាអំពីមូលហេតុ រោគសញ្ញា និងវិធីបង្ការជំងឺសរសៃឈាមបេះដូង តើមានអ្វីខ្លះ?
១- ជំងឺសរសៃឈាមបេះដូងជាអ្វី?
ជំងឺនេះកើតឡើងភ្លាមៗនៅពេលសរសៃឈាមដែលនាំទៅចិញ្ចឹមបេះដូង ក្រិន ឬស្ទះ ធ្វើឲ្យបេះដូងខូច ស្លោក ឬរលួយ។ នេះបើតាមការបកស្រាយរបស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
ជំងឺសរសៃឈាមបេះដូងច្រើនកើតមានឡើងលើក្រុមមនុស្សទាំងបុរសស្ត្រីដែលមានជំងឺលើសឈាម ទឹកនោមផ្អែម ធាត់ខ្លាំង លើសជាតិខ្លាញ់ ជក់បារី ឬញ៉ាំស្រាច្រើន។
![ធាត់](https://cdn.hellokrupet.com/wp-content/uploads/2021/11/shutterstock_383128363-scaled.jpg)
២- រោគសញ្ញា
អ្នកជំងឺសរសៃឈាមបេះដូងនឹងស្តែងចេញជារោគសញ្ញា ដូចជាចុកដើមទ្រូង បែកញើស ថប់ដង្ហើម ឬហត់។ ចំណែករោគសញ្ញាធ្ងន់ធ្ងររួមមាន៖
– ស្ទះសរសៃឈាមបេះដូង
– ស្លោកបេះដូង
– គាំងបេះដូង។
៣- វិធីការពារ
– ចៀសវាងអាហារប្រៃ
– កាត់បន្ថយការញ៉ាំសាច់ និងអាហារសម្បូរជាតិខ្លាញ់
– កុំជក់បារី ផឹកគ្រឿងស្រវឹង
– គ្រប់គ្រងសម្ពាធឈាម និងកម្រិតជាតិស្ករឲ្យបានល្អ
– រក្សាទម្ងន់ឲ្យបានសមស្រប
– ហាត់ប្រាណ និងតាមដានសុខភាពឲ្យបានទៀងទាត់។
ជំងឺសរសៃឈាមបេះដូងជាជំងឺឃាតកទី ១ ដែលឆកយកជីវិតប្រជាពលរដ្ជខ្មែរ ដូច្នេះយើងគួរកែប្រែរបៀបរស់នៅដើម្បីចៀសឱ្យឆ្ងាយពីជំងឺនេះ។