home

តើអ្នកបារម្ភពីអ្វី?

close
មិនត្រឹមត្រូវ
ពិបាកយល់
ផ្សេងៗ

ឬ​ចម្លង​តំណភ្ជាប់

លំហាត់​ប្រាណ ៤ ប្រភេទ ជួយ​ដល់​សុខ​ភាពបេះដូង

លំហាត់​ប្រាណ ៤ ប្រភេទ ជួយ​ដល់​សុខ​ភាពបេះដូង

លំហាត់ប្រាណ​មាន​ច្រើន​ប្រភេទ និង​តាម​មុខងារ​របស់​វា មិន​មែន​ចេះ​តែ​ហាត់ៗ​តាម​នឹក​ឃើញ​ទេ។ ចង់​បាន​សុខភាព​បេះដូង​ល្អ គេ​មាន​របៀប​ហាត់​ប្រាណ​ពិសេស ធ្វើ​ឲ្យ​បេះ​ដូង​សុខភាព​ល្អ។ ហាត់​ស្រាលៗ​ទេ តែ​បាន​ប្រយោជន៍​ច្រើន​។

១- លំហាត់ប្រាណជួយ​បេះដូង​ និងសរសៃឈាម

លំហាត់ប្រាណ​នេះ​ហៅ​ថា អ៊ែរ៉ូបិក (Aerobics) គឺហាត់ប្រាណ​ស្រាលៗ ដោយ​លើក​ដៃ​លើក​ជើង ដើម្បី​បង្កើន​ការ​ស្រូប​អុកស៊ីហ្សែន​ ឬពង្រឹង​ភាព​អំណត់​រាងកាយ។ Aerobics ធ្វើ​ឲ្យ​យើង​ដក​ដង្ហើម​កាន់​តែ​ញាប់ បេះដូងលោត​កាន់​តែ​លឿន ដោយ​សារ​តែ​យើង​ប្រើ​សាច់​ដុំ​ច្រើន ទើប​បណ្ដាល​ឲ្យ​រាងកាយ​ប្រើ​អុកស៊ីហ្សែន​កាន់​តែ​ច្រើន​ដូចគ្នា។

ធ្វើ​បែប​នេះ​ជួយ​ពង្រឹងបេះដូង និង​សួត កាន់​តែមាន​សុខភាព​ល្អ ជួយ​សម្រួល​សរសៃ​ឈាម បញ្ចុះ​សម្ពាធ​ឈាម និង​ជាតិ​ស្ករ សម្រួល​អារម្មណ៍ កាត់​បន្ថយការ​រលាក និង​បង្កើន​កម្រិត​កូលេស្ដេរ៉ុល​ល្អ។ ចំណុច​ល្អ​ផ្សេង​ទៀត ​គឺ​ជួយ​កាត់​បន្ថយ​ការ​ប្រឈម​ជំងឺ​បេះដូង ដាច់​សរសៃ​ឈាម​បេះដូង និង​បញ្ហា​សុខភាព​ដទៃ​ទៀតបាន​ច្រើន។

បើ​សិន​ទើប​គាំង​បេះដូង​វិញ Aerobics ក៏​អាច​ជួយ​បង្ការ​កុំ​ឲ្យ​កើត​ឡើង​វិញ​ម្ដង​ទៀត​ដែរ តែ​យ៉ាង​ណា​គួរ​ប្រឹក្សា​ជាមួយ​គ្រូពេទ្យ​មុន​ចាប់​ផ្ដើម​ហាត់។

ក្រៅ​ពី​លើក​ដៃ​លើក​ជើង ក៏​អាច​ហែលទឹក ដើរ រត់ រាំ ធាក់កង់ ឬ​ឡើង​ចុះ ជណ្ដើរ ក៏​ជា​ការ​ហាត់ប្រាណ​ងាយៗសម្រាប់​ចាស់ៗ​ដែរ។ គួរ​ហាត់​ឲ្យ​បាន​ទៀងទាត់ ឬ​ហោច​ណាស់ ១៥០ នាទីក្នុង​មួយ​សប្ដាហ៍។

ហាត់ប្រាណជួយបេះដូងល្អ

២- លំហាត់ប្រាណពង្រឹងសាច់ដុំ

ហាត់​ដើម្បី​ឲ្យ​សាច់​ដុំ​ហាប់​ណែន​ល្អ ហើយ​ក៏​អាច​ជួយ​បញ្ចុះ​សម្ពាធ​ឈាម ជាតិ​ស្ករ ធ្វើ​ឲ្យ​ឆ្អឹង​រឹងមាំ គ្រប់គ្រង​ដំណេក​បាន​ល្អ រក្សា​គីឡូ​កុំ​ឲ្យ​ឡើង​ចុះ ព្រម​ទាំង​មាន​ជំហរ​រាងកាយ​ល្អ។ តែ​បើ​គ្នា​យើង ឬ​ចាស់ៗ​មាន​ជំងឺ​បេះដូង កុំ​ហាត់​បែប​នេះ ព្រោះ​អាច​បង្ក​បញ្ហា​ទៅ​វិញ។ ចំពោះ​ក្បាច់​ហាត់ គ្រូ​បង្ហាត់ ឬ​ពេទ្យ​ចលនា អាច​មាន​របៀប​បង្ហាត់ ដើម្បីទទួល​​បាន​ប្រសិទ្ធភាព។ ទោះ​រវល់​យ៉ាង​ណា​ក៏​ដោយ ក៏​គួរ​ឆ្លៀត​ហាត់​ហោច​ណាស់​ឲ្យ​បាន ២-៣ ដងក្នុង​មួយ​សប្ដាហ៍ បើ​មិន​បាន​រាល់​ថ្ងៃ។

៣- លំហាត់ប្រាណពត់ខ្លួន

ដើម្បី​រហ័សរហួន សម្រួល​សាច់ដុំ មាន​ចលនា​ប្រចាំ​ថ្ងៃ​ល្អ គួរ​ហាត់​ពត់​ខ្លួន។ ការ​ហាត់​បែប​នេះ អាច​ល្អ​សម្រាប់​ក្មេងៗ ប៉ុន្តែ​គួរ​កម្ដៅ​សាច់​ដុំ​សិន (ពត់ដៃពត់ជើង) មុន​ចាប់​ផ្ដើម​ហាត់ ដើម្បី​កុំ​ឲ្យ​រមួល​សាច់​ដុំ ឬ​យើង​ហៅ​ថា រមួល​ក្រពើ។ ការ​ពត់​ខ្លួន យើង​អាច​បែងចែក​ផ្នែក​ដែល​យើង​ចង់​ហាត់ ដូចជា ​សាច់ដុំ កំភួន​ជើង ភ្លៅ ខ្នង ក ឬ​ស្មា​ជា​ដើម។ ហោច​ណាស់ ធ្វើ​ឲ្យ​បាន ៣ ដងក្នុង​មួយ​សប្ដាហ៍ បើ​រវល់​ធ្វើ​រាល់​ថ្ងៃ​មិន​បាន។

ហាត់ប្រាណជួយបេះដូងល្អ_

៤- លំហាត់ប្រាណ​រក្សា​លំនឹង​រាងកាយ

ប្រយោជន៍​សំខាន់​បំផុត​ពី​លំហាត់ប្រាណ​មួយ​នេះ គឺ​ជួយ​រក្សា​លំនឹង ការពារ​កុំ​ឲ្យ​ឆាប់​ដួល ហើយ​ជួយ​ឲ្យ​រាងកាយ​មាំទាំ សុខភាព​ល្អ។ ហាត់​យ៉ូហ្កា ឬ​ថៃជី (កន្ធែក​ជើង ឬ​ចលនា​រាងកាយ ផ្ដោត​លើ​ជំហរ) ជា​ជម្រើស​ហាត់ប្រាណ​ល្អ ដែល​ចាស់ៗ​គួរ​ហាត់។ បើ​ចង់​បាន​យោបល់ ឬ​ការ​ហាត់​សមស្ថានភាព​រាងកាយ ឬ​ជំងឺ (បើមាន) ជាពិសេស ​ចាស់​ៗមាន​ជំងឺ​គាំងបេះដូង គួរ​ជជែក​ជាមួយ​ពេទ្យ ឬ​គ្រូបង្ហាត់។

ហាត់​ប្រាណ​ប្រភេទ​នេះ មិន​តម្រូវ​ឲ្យ​ហាត់​ទៀងទាត់​ទេ ហាត់​ពេល​ណា​ក៏​បាន អាស្រ័យ​លើ​ពេល​អំណោយផល​របស់​យើង តែ​យ៉ាង​ហោច​ឲ្យ​បាន ៣ ដង​ក្នុង​មួយ​សប្ដាហ៍។

 

health-tool-icon

គណនា BMI

ប្រើ​រង្វាស់សុខភាព​BMI ដើម្បី​គណនា​រាងកាយ ទម្ងន់ និង​កម្ពស់​សមសួន និង​សុខភាព​ល្អ

ប្រុស

ស្រី

Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ប្រភព

The 4 most important types of exercise. http://www.health.harvard.edu/exercise-and-fitness/the-4-most-important-types-of-exercise. Accessed May 27, 2017.

Your guide to physical activity and your heart. https://www.nhlbi.nih.gov/files/docs/public/heart/phy_active.pdf. Accessed May 27, 2017.

Heart Disease and Exercise for a Healthy Heart. http://www.webmd.com/fitness-exercise/exercise-for-heart-health#1. Accessed May 27, 2017.

Endurance Exercise (Aerobic). http://www.heart.org/HEARTORG/HealthyLiving/PhysicalActivity/FitnessBasics/Endurance-Exercise-Aerobic_UCM_464004_Article.jsp. Accessed May 27, 2017.

Balance Exercise. http://www.heart.org/HEARTORG/HealthyLiving/PhysicalActivity/FitnessBasics/Balance-Exercise_UCM_464001_Article.jsp. Accessed May 27, 2017.

រូបថត​របស់​អ្នក​និពន្ធbadge
ដោយ Leng Pechsovatey កែសម្រួល​ចុងក្រោយ 23/02/2021
ត្រួតពិនិត្យដោយ វេជ្ជ. ចាន់ ស៊ីណេត