គ្នាយើងកើតជំងឺលើសឈាមខ្លះ ព្រួយបារម្ភរឿងលេបថ្នាំឲ្យសម្ពាធឈាមធ្លាក់ចុះ ព្រោះបើភ្លេចលេបអាចធ្វើទុក្ខសុខភាព។ យើងត្រូវដឹងថា របៀបរស់នៅរាល់ថ្ងៃដើរតួនាទីសំខាន់ក្នុងការព្យាបាលជំងឺលើសសម្ពាធឈាមរបស់យើង។ ប្រសិនបើយើងគ្រប់គ្រងវាបានជាមួយការរស់នៅល្អ យើងអាចចៀសវាង ឬកាត់បន្ថយតម្រូវការថ្នាំបាន។
១. សម្រកទម្ងន់ និងតាមដានប្រវែងចង្កេះ
ជារឿយៗ បើយើងឡើងទម្ងន់ សម្ពាធឈាមក៏ឡើងតាមហ្នឹងដែរ។ កាលណាឡើងទម្ងន់ ក៏អាចរំខានដល់ការដកដង្ហើមពេលគេងបាន ជាហេតុបណ្ដាលឲ្យសម្ពាធឈាមឡើងខ្ពស់។ ដូចនេះ ការសម្រកទម្ងន់ជាវិធីមានប្រសិទ្ធភាពមួយ ជួយកាត់បន្ថយការឡើងសម្ពាធឈាម។ ក្រៅពីការស្រកទម្ងន់ យើងក៏ត្រូវតាមដានប្រវែងចង្កេះដែរ បើត្រង់កន្លែងចង្កេះមានទម្ងន់ច្រើន អាចប្រឈមនឹងការកើតជំងឺលើសឈាមខ្ពស់។
២. ហាត់ប្រាណទៀងទាត់
ការហាត់ប្រាណជាប្រចាំ ៣០នាទី/ថ្ងៃ អាចកាត់បន្ថយសម្ពាធឈាមពី៥-៨ មិល្លីម៉ែត្របារត ប្រសិនបើយើងមានជំងឺសម្ពាធឈាម។ វាជាការចាំបាច់មួយដែលយើងត្រូវហាត់ប្រាណជាប្រចាំ បើមិនដូច្នោះទេ សម្ពាធឈាមនឹងអាចរើឡើងម្ដងទៀត ។ បើយើងមានសម្ពាធឈាមកើនឡើង ការហាត់ប្រាណរាល់ថ្ងៃ អាចចៀសវាងការវិវត្តទៅជាជំងឺលើសឈាម ហើយបើយើងកើតលើសឈាមហើយនោះ ហាត់ប្រាណអាយជួយកាត់បន្ថយសម្ពាធឈាមយើង ឲ្យធ្លាក់ចុះមកនៅកម្រិតសុវត្ថិភាព។
![ហាត់ប្រាណ](https://cdn.hellokrupet.com/wp-content/uploads/2020/10/ហាត់ប្រាណ១.jpg)
៣. ញ៉ាំរបបអាហារល្អ
ការមានរបបអាហារដែលសម្បូរដោយគ្រាប់ធញ្ញជាតិ បន្លែ ផ្លែឈើ និងផលិតផលធ្វើពីទឹកដោះគោដែលមានជាតិខ្លាញ់ទាប អាចធ្វើឲ្យសម្ពាធឈាមធ្លាក់ចុះរហូតដល់ទៅ ១១ មិល្លីម៉ែត្របារត បើយើងឈឺសម្ពាធឈាម។ ការដែលផ្លាស់ប្ដូរទម្លាប់ញ៉ាំមិនមែនងាយស្រួលទេ តែគ្នាយើងអាចចាប់ផ្ដើមអនុវត្តតាមតិចនិកនេះបានដោយ កត់ទុកនូវអាហារដែលត្រូវញ៉ាំ បន្ថែមជាតិប៉ូតាស្យូម អាននូវពាក្យណែនាំរាល់ទំនិញដែលទិញ និងកាត់បន្ថយជាតិសូដ្យូម (អំបិល) ដែលយើងញ៉ាំ។
៤. កាត់បន្ថយផឹកគ្រឿងស្រវឹង
គ្រឿងស្រវឹងអាចជាអាវុធមុខពីរសម្រាប់សុខភាពយើង ព្រោះវាផ្ដល់ទាំងផលល្អ និងផលអាក្រក់ បើយើងផឹកច្រើនជ្រុល។ ជាទូទៅ ស្រីៗអាចផឹកស្រាបាន ១កែវ/ថ្ងៃ និងប្រុសៗអាចផឹក ២កែវ/ថ្ងៃ អាចជួយកាត់បន្ថយសម្ពាធឈាមបានប្រហែល ៤ មិល្លីម៉ែត្របារត។ ប៉ុន្តែបើយើងផឹកច្រើនជ្រុល ផលល្អដែលជួយដល់សុខភាពពីការផឹកស្រាបៀរ នឹងត្រូវរលាយបានសូន្យឈឹង ហើយថែមទាំងនាំទុក្ខដល់សុខភាពលើសដើម។
លើសពីនេះ យើងក៏ត្រូវបញ្ឈប់ការជក់បារីដែរ ព្រោះបារីគ្រប់ដើមដែលយើងជក់ចូលទៅ នឹងបង្កើនសម្ពាធឈាមឡើងខ្ពស់។ ឈប់ជក់បារីក៏ជួយដល់សុខភាពបេះដូង និងពង្រឹងសុខភាពជាទូទៅតែម្ដង។
៥. តាមដានសម្ពាធឈាម
ការតាមដានសម្ពាធឈាមនៅផ្ទះ អាចជួយយើងរក្សាសម្ពាធឈាមបានល្អ ជួយឲ្យយើងប្រាកដថា ការផ្លាស់ប្ដូរទម្លាប់រស់នៅដំណើរការបានល្អក្នុងការកាត់បន្ថយសម្ពាធឈាម និងអាចបញ្ជាក់ច្បាស់ពីបញ្ហាសុខភាពអ្វីមួយដែលយើងជួប។ ប៉ុន្តែ មុននឹងសម្រេចចិត្តតាមដានសម្ពាធឈាមដោយខ្លួនឯង ត្រូវទៅពិនិត្យជាមួយគ្រូពេទ្យសិន។
ទាក់ទងនឹងការព្យាបាលជំងឺលើសសម្ពាធឈាមនេះ លោកស្រីវេជ្ជបណ្ឌិត គុជ ឆោមដាលីន ថា ជំងឺលើសសម្ពាធឈាម ជាជំងឺរ៉ាំរ៉ៃ ព្យាបាលមិនជាដាច់ ១០០% នោះទេ។ បើយើងដឹងខ្លួនថា មានជំងឺលើសឈាមហើយ ត្រូវតែប្រយ័ត្នប្រយែង និងត្រូវទៅជួបគ្រូពេទ្យជំនាញដើម្បីទទួលបានការព្យាបាលដ៏ត្រឹមត្រូវ មិនត្រូវប្រើថ្នាំបញ្ចុះសម្ពាធឈាមតាមគ្នានោះទេ។