បន្ទាប់ពីវះកាត់ខ្នែងពោះវៀន គួរញ៉ាំអាហារទាំងនេះល្អចំពោះសុខភាព

ការវះកាត់ខ្នែងពោះវៀនជាវិធីព្យាបាល់រលាកខ្នែងពោះវៀនដ៏មានប្រសិទ្ធិភាព ប៉ុន្តែរបបអាហារ​ក្រោយ​ពេលវះកាត់ក៏សំខាន់ណាស់ដែរ ព្រោះ​អាហារមួយចំនួនអាចបង្កើនល្បឿន​នៃការជា​សះ​ស្បើយ និងការពារ​កុំឱ្យយើងឆ្លងមេរោគ។ អ៊ីចឹងបន្ទាប់ពីវះកាត់ខ្នែងពោះវៀនរួច យើងគួរញុំា​អាហារបែបណា?

១. អាហាររាវ និងមានរសជាតិស្រាល

យើងត្រូវញុំាអាហាររាវៗ និងរសជាតិស្រាល ព្រោះអាហារបែបនេះងាយរំលាយ មិន​បន្ថែម​សម្ពាធ​ដល់ប្រព័ន្ធរំលាយអាហារ និងមិនបណ្តាលឱ្យយើងចង្អោរ ឬក្អួត។

· ទឹកស៊ុប៖ សម្បូរទៅដោយសារធាតុចិញ្ចឹម។ យើងអាចញុំាម្តងបន្តិចៗដើម្បី​​ចៀសវាង​ការ​ចង្អោរ ឬ​ក្អួត។ ប្រូតេអ៊ីននៅក្នុងទឹកស៊ុបអាចជួយឱ្យយើងមានកម្លាំងឡើងវិញ។

· ស៊ុបល្ពៅ ការ៉ុត ឬបន្លែ៖ សម្បូរទៅដោយសារធាតុចិញ្ចឹមជាច្រើន​ និង​ បេតាការ៉ូទីន។ បេតាការ៉ូទីនត្រូវបានបំប្លែងទៅជាវីតាមីន A ដែលជួយជំរុញដំណើរការជាសះរបួស។

· យ៉ាអួ៖ ជាអាហារងាយរំលាយ និងមានបាក់តេរីល្អ​ដែលជួយ​ដល់​ប្រព័ន្ធរំលាយ​អាហារ​យើង។ យើងគួរញុំាយ៉ាអួដែលមានជាតិស្ករតិច​ព្រោះងាយរំលាយ​ជាង​យ៉ាអួ​មានជាតិ​ស្ករ​ធម្មតា។

២. ញុំាអាហារពីគ្រប់ក្រុមអាហារ

ពីរបីថ្ងៃបន្ទាប់ពីការវះកាត់ខ្នែងពោះវៀន យើងអាចចាប់ផ្តើមញុំាអាហារដូចធម្មតាវិញបានហើយ ព្រោះយើងនឹងធូរពីអាការៈដូចជា ឈឺពោះ ចង្អោរ ឬក្អួត។ យើងអាចចាប់ផ្តើម​ញុំា​របប​អាហារ​តាម​ធម្មតាបន្តិចម្តងៗ ប៉ុន្តែយើងត្រូវញ៉ាំអាហារសម្បូរសារធាតុចិញ្ចឹមពីគ្រប់ក្រុមអាហារដូចជា គ្រាប់​ធញ្ញជាតិ សាច់ បន្លែ ផ្លែឈើ ត្រី ស៊ុត និងសណ្តែកជាដើម ដើម្បីឱ្យរាងកាយ​យើង​ឆាប់​ជា​សះ​ស្បើយ។

៣. ញ៉ាំអាហារជំរុញការការជាសះស្បើយ

អាហារសម្បូរប្រូតេអ៊ីន កាបូអ៊ីដ្រាត និងខ្លាញ់អាចជំរុញល្បឿនជាសះស្បើយ​​ពីមុខរបួស និង​ជួយ​ឱ្យ​យើង​មានកម្លាំងឡើងវិញ។

• ប្រូតេអ៊ីន៖ ជួយជំរុញការផលិតខូឡាជែន​ដើម្បីបង្កើតជាលិកាភ្ជាប់​សម្រាប់​បំពេញ​ចន្លោះ​នៅ​​មុខ​របួស។ អាហារសម្បូរប្រូតេអ៊ីនរួមមាន ត្រី សាច់មាន់ តៅហ៊ូ សណ្តែក ស៊ុត។

• កាបូអ៊ីដ្រាត៖ ជួយឱ្យយើងមានកម្លាំង និងជួយជួសជុលសរសៃឈាម។ យើងអាចទទួល​បាន​កាបូអ៊ីដ្រាតពីផ្លែឈើ បន្លែ អង្ករសម្រូប និង​គ្រាប់ធញ្ញជាតិ​។

• ខ្លាញ់៖ រាងកាយយើងត្រូវការខ្លាញ់ដើម្បីរក្សាភ្នាសកោសិកាឱ្យរឹងមុំា។ យើងអាចញុំាខ្លាញ់​ដែលល្អ​ចំពោះសុខភាពដូចជា ប្រេងអូលីវ គ្រាប់ផ្លែ​ឈើ និងផ្លែបឺរ។

ចង់ពិនិត្យមហារីកពោះវៀនធំ ចុចទីនេះ!

ចង់គណនា BMR ចុចទីនេះ!

ចង់ពិនិត្យសុខភាពប្រព័ន្ធរំលាយអាហារ ចុចទីនេះ!

ចង់គណនារង្វាស់ចង្វាក់បេះដូង ចុចទីនេះ!

៤. ពង្រឹងប្រព័ន្ធភាពស៊ាំ

វីតាមីន និងសារធាតុរ៉ែអាចជួយពង្រឹងប្រព័ន្ធភាពស៊ាំរបស់យើង អាច​ជួយ​កាត់បន្ថយហានិភ័យឆ្លងមេរោគ ព្រមទាំងជួយឱ្យយើងឆាប់ជាសះស្បើយលឿន។

· ស័ង្កសី៖ ជួយពង្រឹងប្រព័ន្ធភាពស៊ាំដោយជំរុញការផលិតកោសិកាឈាម​ស។ ស័ង្កសីសម្បូរ​នៅ​ក្នុងទឹកដោះគោ គ្រឿងសមុទ្រ គ្រាប់ផ្លែឈើ សណ្តែក និង​គ្រាប់ធញ្ញជាតិ។

· វីតាមីន A៖ អាចជួយការពារការឆ្លងមេរោគ។ វីតាមីន A សម្បូរនៅក្នុងបន្លែបៃតង ការ៉ុត ម្ទេស​ហាវៃពណ៌ក្រហម។

· វីតាមីន C៖ ជួយបង្កើតអង្គបដិប្រាណដែលប្រឆាំងនឹងបាក់តេរី និងវីរុស ព្រមទាំងជួយ​ឱ្យ​របួស​ឆាប់ជា។ វីតាមីន C សម្បូរនៅក្នុងផ្លែឈើអម្បូរ​ក្រូច ត្រសក់ស្រូវផ្អែម បន្លែបៃតង។

• វីតាមីន E៖ គឺជាសារធាតុប្រឆាំងអុកស៊ីតកម្ម​ដែលអាចការពារការ​ខូច​ខាត​ដែល​បណ្តាលមក​ពីរ៉ាឌី​កាល់សេរី និងជួយការពាររចនាសម្ព័ន្ធ​កោសិ​កា។ វីតាមីន E សម្បូរនៅក្នុងគ្រាប់អាល់ម៉ុន ស្ពៃពួយឡេង និង​ផ្លែប័រ ជាដើម។

បន្ទាប់ពីវះកាត់ខ្នែងពោះវៀន យើងមិនត្រូវញុំាគ្រឿងស្រវឹង អាហារមានជាតិខ្លាញ់ និងជាតិ​ស្ករ​ខ្ពស់​ទេ រហូតទាល់តែយើងជាសះស្បើយ​។ លើសពីនេះ​ទៅទៀត យើងត្រូវញុំាអាហារ​សម្បូរ​ជាតិសរសៃដូចជា បន្លែ ផ្លែឈើដើម្បី​ការពារការទល់លាមក។

គួរ​អាន៖