ក្លិនពីរុក្ខជាតិទាំង ៤ នេះអាចកាត់បន្ថយភាពតានតឹងបាន

    ក្លិនពីរុក្ខជាតិទាំង ៤ នេះអាចកាត់បន្ថយភាពតានតឹងបាន

    ភាពតានតឹង (ស្ត្រេស) គឺជាការឆ្លើយតបរបស់រាងកាយទៅនឹងសម្ពាធផ្លូវចិត្ត ឬអារម្មណ៍។ ពេល​មាន​ភាពតានតឹង រាងកាយយើងនឹងបញ្ចេញអ័រម៉ូនដែលធ្វើឱ្យបេះដូងយើងដើរលឿន ដកដង្ហើម​ញាប់​ និងធ្វើឱ្យសាច់ដុំឡើង​តឹង ។ យូរៗទៅវាអាចបង្កឱ្យមានជំងឺដូចជា បេះដូង ធាត់ ឈឺក្បាល គេង​មិនលក់ ថប់អារម្មណ៍ បាក់ទឹកចិត្តជាដើម។ យើងអាចកាត់បន្ថយភាពតានតឹងតាមវីធីជាច្រើន ក្នុង​នោះការព្យាបាលដោយក្លិនក៏ជាជម្រើសមួយដ៏មានប្រសិទ្ធភាពដែរ។

    តាមការសិក្សាបានឱ្យដឹងថាក្លិនពីរុក្ខជាតិងាយរកទាំង ៤ ខាងក្រោមនេះអាចកាត់បន្ថយភាពតានតឹងបាន៖

    ១. ផ្លែឈើអម្បូរក្រូច៖ ការស្រាវជ្រាវពីបណ្ណាល័យ​វេជ្ជសាស្ត្រជាតិអាមេរិកបានបង្ហាញ​ថាក្លិនពី​​សម្បក​ផ្លែឈើ​អម្បូរ​ក្រូចដូចជា ក្រូចឆ្មា ក្រូចឈ្វិច ក្រូច ឬក្រូចថ្លុង​ជាដើមអាចជួយកាត់​បន្ថយភាព​តានតឹង និង​រំងាប់​ប្រព័ន្ធ​សរសៃ​ប្រសាទ។ ពេលយើងច្របាច់សម្បកផ្លែឈើអម្បូរក្រូចណាមួយ វា​នឹង​បញ្ចេញក្លិនក្រអូប ហើយ​ធ្វើឱ្យយើងមានអារម្មណ៍ល្អភ្លាមៗ។

    ២. ជីរអង្កាម៖ យោងតាមវិទ្យាស្ថាន Sense of Smell ក្លិន​ប្រហើរ​របស់ជីរអង្កាម​​អាចជួយ​បង្កើន​ការ​ចង​ចាំ ជំរុញទឹកចិត្ត សម្រួលដល់ការដកដង្ហើម កាត់បន្ថយអារម្មណ៍សោកសៅ និងភាពតាន​តឹង​ផ្លូវ​ចិត្ត។

    ៣. ផ្កាម្លិះ៖ ក្លិនក្រអូបរបស់ផ្កាម្លិះធ្វើឱ្យអារម្មណ៍របស់យើងល្អ និងកាត់បន្ថយ​​ការថប់បារម្ភ ព្រមទាំង​ជួយ​ឱ្យយើងគេងលក់ស្រួល ។ ការហិតក្លិនផ្កាម្លិះបង្កើនឥទ្ធិពលរបស់សារធាតុ GABA ដែល​ជួយរា​រាំង​ ​ឬកាត់​​បន្ថយសកម្មភាព​របស់ណឺរ៉ូន ឬកោសិកាប្រសាទ នៅពេលមានអារម្មណ៍​រំជួល​ខ្លាំង។

    ក្លិនពីរុក្ខជាតិងាយរកទាំង ៤ នេះអាចកាត់បន្ថយភាពតានតឹងបាន

    គណនា BMR

    ៤. ផ្កាកូលាប៖ ផ្កាកូលាបមិនត្រឹមតែស្រស់ស្អាត និងមានភាពទាក់ទាញទេ ក្លិនដ៏ស្រាល​ស្រទន់​របស់​វាអាចឱ្យយើងមានអារម្មណ៍ល្អ បន្ធូរអារម្មណ៍ កាត់បន្ថយភាពតាន់តឹង និងការថប់បារម្ភបាន។

    ដោយសារមនុស្សម្នាក់ៗមានចំណង់ចំណូលចិត្តខុសៗគ្នា បើយើងចូលចិត្តក្លិនរុក្ខជាតិមួយណា ឬក្លិនរុក្ខជាតិណាដែលធ្វើឱ្យយើងមានអារម្មណ៍ល្អ ឬធូរស្បើយ យើងអាចជ្រើសរើស​ក្លិន​រុក្ខជាតិ​នោះ​​មកបន្ថយភាពតានតឹងរបស់យើងបាន។ ការហិតក្លិន​ក្រអូបពីរុក្ខជាតិ​មិនត្រឹមតែធ្វើឱ្យ​អារម្មណ៍​ល្អទេ ថែម​ទាំងគ្មានផលប៉ះពាល់ទៀតផង។ លើសពីនេះទៅទៀត​បើមានរុក្ខជាតិ​ទាំងដូចដែល​បាន​រៀបរាប់ខាងលើនៅក្នុងទីធ្លាផ្ទះ ពួកវានឹងបន្ថែមសោភ័ណភាពដល់ផ្ទះរបស់យើងមួយកម្រិតទៀត។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    ប្រភព

    8 Smells That Can Make You Happier, According to Science
    https://www.thehealthy.com/mental-health/happiness/happy-smells/

    Six stress-buster scents
    https://tribune.com.pk/story/781028/six-stress-buster-scents

    Stress and your health
    https://medlineplus.gov/ency/article/003211.htm

    Stop to smell the roses and improve your health
    https://www.weliahealth.org/aromatherapy-for-your-health/

    រូបថត​របស់​អ្នក​និពន្ធbadge
    ដោយ សុខ វណ្ណ កែសម្រួល​ចុងក្រោយ 30/08/2021
    ត្រួតពិនិត្យដោយ វេជ្ជ. ចាន់ ស៊ីណេត