របបអាហារញ៉ាំមិនត្រឹមតែសំខាន់សម្រាប់សុខភាពទូទៅទេ ចំពោះរឿងចង់បានកូន ក៏ចាំបាច់ត្រូវញ៉ាំរបស់ល្អៗ ជួយសុខភាពមេជីវិតឈ្មោលឲ្យខ្លាំងដូចគ្នា។ ប្តីប្រពន្ធរៀបការយូរឆ្នាំ អត់ទាន់មានកូន ពិសេសខាងប្រុស គួរសាកល្បងអាហារសម្បូរសារធាតុចិញ្ចឹមដូចរៀបរាប់ក្នុងអត្ថបទនេះ និងត្រូវចៀសវាងអាហារ ទាំងឡាយណាអាចប៉ះពាល់មេជីវិតឈ្មោល។
មេជីវិត ទឹកកាមសុខភាពល្អ អាស្រ័យលើអាហារគួរញ៉ាំ និងទម្លាប់រស់នៅទាំងនេះ!
ត្រួតពិនិត្យដោយ គឹម កាណែល
១- វីតាមីន
កង្វះវីតាមីន A ធ្វើឲ្យគុណភាពទឹកកាម និងអត្រាបង្កកំណើតថយចុះ។ ដើម្បីចៀសផុតពីបញ្ហានេះ ប្រុសៗអាចញ៉ាំគ្រាប់ធញ្ញជាតិ ការ៉ុត ដំឡូងផ្អែម កូនស្ពៃ និងផ្កាខាត់ណា។
វីតាមីន C ជួយដល់ការផ្លាស់ទីរបស់មេជីវិតឈ្មោលបានលឿន ហេតុនេះប្រុសៗគ្នាយើង គួរតែញ៉ាំស្ត្រប៊ើរី និងបន្លែពណ៌លឿងបន្ថែម។ ការផលិត ឬផ្លាស់ទីរបស់មេជីវិតឈ្មោល អាចកើនឡើងដោយសារវីតាមីន E និង B12 ដែលសម្បូរក្នុងផ្លែឈើ និងបន្លែ។ បន្ថែមពីនេះទៀត ប្រុសៗ ក៏អាចញ៉ាំអាហារបំប៉នខ្លះៗ ដើម្បីជួយបង្កើនគុណភាពមេជីវិតឈ្មោលបានដែរ។
២- ជាតិរ៉ែ
កង្វះសារធាតុរ៉ែ ដូចជា ស័ង្កសី និងសេឡេញ៉ូម អាចធ្វើឲ្យគុណភាពរបស់មេជីវិតឈ្មោលធ្លាក់ចុះបាន។ ប្រុសៗ អាចបន្ថែមជាតិរ៉ែទាំងនេះចូលក្នុងខ្លួនបាន តាមរយៈការញ៉ាំ ស៊ុត សាច់មាន់ អយស្ទ័រ សាច់គោ គ្រាប់ធញ្ញជាតិ និងគ្រាប់សណ្ដែក។ អាហារបំប៉ន ក៏អាចជួយបានខ្លះដែរ ប៉ុន្តែត្រូវញ៉ាំតាមការណែនាំឲ្យបានត្រឹមត្រូវ ដោយសារតែការញ៉ាំសារធាតុរ៉ែច្រើនលើសកម្រិត អាចធ្វើឲ្យពុលបាន។
៣- អាស៊ីដខ្លាញ់
ត្រីសាល់ម៉ុន ត្រីស្បៃកា ត្រីសាឌីន និងត្រីធូណា សុទ្ធតែជាប្រភពអាស៊ីដខ្លាញ់អូម៉េហ្កា ៣ ហើយសារធាតុនេះ អាចជួយពង្រឹងគុណភាពមេជីវិតឈ្មោល និងជួយបង្កើនអារម្មណ៍ផ្លូវភេទកាន់តែពុះកញ្ជ្រោល ដោយសារ វាធ្វើឲ្យកម្រិតដូប៉ាមីន (Dopamine) ក្នុងខួរក្បាលកើនឡើង។
គ្រាប់វ៉ល់ណាត់ ជាប្រភពនៃអាស៊ីដអាល់ហ្វាលីណូឡេអ៊ិច ( Alpha-linoleic acid) ដែលជាពពួកអាស៊ីដខ្លាញ់អូមេហ្គា ៣ អាចជួយបង្កើនមេជីវិតឈ្មោល រូបរាង និងទ្រទ្រង់ដល់ការផ្លាស់ទីរបស់មេជីវិតឈ្មោលបានកាន់តែលឿន។
៤- អាស៊ីដហ្វូលិក ឬវីតាមីន B9
អាស៊ីដហ្វូលិក មិនត្រឹមតែសំខាន់ និងចាំបាច់សម្រាប់ស្រីៗមានផ្ទៃពោះនោះទេ វាក៏មានសារៈសំខាន់ចំពោះសុខភាពទឹកកាម និងគុណភាពមេជីវិតឈ្មោលប្រុសៗដូចគ្នា។ គ្នាយើមានកម្រិតអាស៊ីដហ្វូលិកទាប ច្រើនមានមេជីវិតឈ្មោល មិនសូវល្អ។ យ៉ាងណា យើងអាចជួយឲ្យគុណភាពមេជីវិតឈ្មោលកាន់តែខ្លាំង តាមរយៈការញ៉ាំបន្លែស្លឹកបៃតង ផ្លែប៊ើរ សណ្ដែក ផ្លែឈើ និងពពួកគ្រាប់ធញ្ញជាតិ។
៥- សារធាតុលីកូប៉ែន (Lycopene)
Lycopene គឺជាការ៉ូតែនក្រហមស្រស់ មានប្រសិទ្ធភាពខ្ពស់ ជួយបង្កើនចំនួនមេជីវិតឈ្មោល។ សារធាតុ Lycopene សម្បូរនៅក្នុងប៉េងប៉ោះ ការ៉ុត ឪឡឹក។
៦- ទឹក
ផឹកទឹកឲ្យបានច្រើនជារៀងរាល់ថ្ងៃ ដើម្បីកុំឲ្យមានបញ្ហាកង្វះជាតិទឹក និងជួយការពារប្រុសៗពីបញ្ហាចំនួនមេជីវិតឈ្មោលតិច។
៧- ពពួកអាហារ និងទម្លាប់មិនល្អ អាចប៉ះពាល់មេជីវិតឈ្មោល
– អាហារកំប៉ុង៖ អាហារកំប៉ុង ភាគច្រើនបានវេចខ្ចប់ដោយប្លាស្ទិក មានផ្ទុកសារធាតុ Bisphenol-A ដែលជាសារធាតុគីមី អាចធ្វើឲ្យប៉ះពាល់ដល់អ័រម៉ូន និងប៉ះពាល់ដល់សុខភាពមេជីវិតឈ្មោលប្រុសៗ។ ដើម្បីចៀសចេញពីបញ្ហានេះ ប្រុសៗអាចញ៉ាំអាហារវេចខ្ចប់ដោយកែវ មិនមែនប្លាស្ទិកបាន។
– ខ្លាញ់ឆ្អែត៖ ខ្លាញ់ឆ្អែតនៅក្នុងសាច់ជ្រូកបីជាន់ (Bacon) សាច់ក្រក ប័រ សុទ្ធតែអាចធ្វើឲ្យសុខភាពមេជីវិតឈ្មោលថយចុះ។
– គ្រឿងស្រវឹង គ្រឿងញៀន និងបារី៖ ទម្លាប់អាក្រក់ទាំងអស់នេះ នឹងធ្វើឲ្យសុខភាពទឹកកាមធ្លាក់ចុះ។ បើមិនអាចផ្ដាច់របស់ទាំងអស់នេះបាន ក៏គួរតែផឹក ឬជក់ក្នុងកម្រិតតិចតួចបានហើយ។
– សីតុណ្ហភាព និងសម្លៀកបំពាក់៖ ងូតទឹកក្ដៅ ស្លៀកខោក្នុងច្រើនជាន់ ឬអង្គុយយូរពេក សុទ្ធតែអាចធ្វើឲ្យប៉ះពាល់ដល់ការផលិតទឹកកាម និងគុណភាពមេជីវិតឈ្មោល។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម