គ្នាយើងខ្លះប្រឈមនឹងរោគសញ្ញាមុនមករដូវជារៀងរាល់ខែ ដូចជាចុកពោះ ឈឺសាច់ដុំ ឬប្រែប្រួលអារម្មណ៍។ ចំណែកអាការៈទល់លាមក ក៏ជារោគសញ្ញាមួយទៀត ដែលកើតឡើងមុនពេលមករដូវដូចគ្នា។ តើមូលហេតុអ្វីបានជាគ្នាយើងទល់លាមក? គួរដោះស្រាយបែបណា?
ម៉េចបានគ្នាយើងខ្លះទល់លាមកមុនមករដូវ?
អ័រម៉ូនម្យ៉ាងឈ្មោះថា Progesterone ជាឫសគល់នៃបញ្ហាទល់លាមកមុនមករដូវ។ កម្រិតអ័រម៉ូនមួយនេះ ឡើងខ្ពស់មុនដល់ថ្ងៃសំខាន់ប្រចាំខែរបស់យើង ហើយក៏ធ្វើឲ្យប្រព័ន្ធរំលាយអាហារដំណើរការយឺតយ៉ាវផងដែរ។
ជាធម្មតា ក្រោយបញ្ចេញពងអូវុល អ័រម៉ូនProgesterone កើនឡើងយ៉ាងខ្លាំង ជាហេតុនាំឲ្យយើងទល់លាមក ពីព្រោះអ័រម៉ូននេះពន្យឺតចលនារបស់អាហារដែលឆ្លងកាត់ពោះវៀន។ យ៉ាងណាមិញ អាការៈទល់លាមក នឹងបានធូរស្បើយ នៅពេលដែលយើងមករដូវ។ ជាមួយគ្នានេះដែរ ក៏មានស្រីៗយើងមួយចំនួនជួបប្រទះបញ្ហារាករូសមួយរយៈពេលខ្លី នៅពេលមករដូវ ពីព្រោះអ័រម៉ូនដែលទទួលខុសត្រូវក្នុងការពន្យឺតដំណើរការប្រព័ន្ធរំលាយអាហារត្រូវអវត្ដមានភ្លាមៗ។
ចងពិនិត្យជំងឺសរសៃឈាមបេះដូង ចុចទីនេះ!
ធ្វើម៉េចទើបអាចកាត់បន្ថយអាការៈទល់លាមកមុនមករដូវបាន?
មិនថាបញ្ហាទល់លាមកកើតឡើងអំឡុងពេលមករដូវ ឬអត់ទេ យើងគួរតែបង្កើនការញ៉ាំពពួកអាហារដែលសម្បូរជាតិសរសៃខ្ពស់ ដូចជាផ្លែប៊ឺរ ចេក ប្លូបឺរី ផ្លែប៉ោម និងសណ្ដែកសៀង ជាដើម។ ទន្ទឹមនឹងនេះដែរ យើងគួរតែជៀសវាងអាហារដែលមានជាតិស្ករ ខ្លាញ់ខ្ពស់ និងគួរញ៉ាំទឹកឲ្យបានគ្រប់គ្រាន់។ បន្ថែមពីនេះ លំហាត់ប្រាណ និងការបញ្ចេញសកម្មភាពរាងកាយដទៃទៀតក៏អាចជួយការពារបញ្ហាទល់លាមក។
![ទល់លាមកមុនមករដូវ](https://cdn.hellokrupet.com/wp-content/uploads/2022/06/ទល់លាមកមុនមករដូវ២.jpg)
ពិតណាស់ ការធ្វើលំហាត់ប្រាណជាទៀងទាត់ មិនត្រឹមតែអាចជួយកាត់បន្ថយការទល់លាមកមុនពេលមករដូវប៉ុណ្ណោះទេ ប៉ុន្តែទម្លាប់ដ៏ល្អមួយនេះ ក៏អាចដោះស្រាយរោគសញ្ញាមុនពេលមករដូវផ្សេងទៀតបានយ៉ាងមានប្រសិទ្ធភាព។